ភ្នំពេញ៖ លោកវេជ្ជបណ្ឌិត អ៊ុង សុភ៍ស្ត នាយកមន្ទីរពេទ្យសម្តេចឪ សម្តេចម៉ែ តាមរយៈBTV ព័ត៌មាន នាព្រឹកថ្ងៃទី១ ខែសីហា ឆ្នាំ២០២២នេះ បានអំពាវនាវដល់ប្រជាពលរដ្ឋ មកចាក់វ៉ាក់សាំងបង្ការជំងឺកូវីដ-១៩ ដូមមូលដ្ឋាន និងដូសជំរុញ និង​ចូល​រួម​ទប់ស្កាត់​ការចម្លងមេរោគប្រភេទថ្មី អុតស្វា។

លោកវេជ្ជបណ្ឌិត អ៊ុង សុភ៍ស្ត បានលើកឡើងទៀតថា ​ដោយហេតុថាស្ថានភាពជំងឺកូវីដ-១៩ សព្វថ្ងៃ​មានការងើបឡើងបន្តិចវិញ ហើយថ្មីៗនេះយើងក៏មានករណីនាំចូលនូវជំងឺឆ្លងប្រភេទថ្មី​ អុតស្វា លើ​បុរសជនជាតិនីហ្សេរីយ៉ា។

ដូច្នេះដើម្បីការពារសុខភាព​នៅក្នុងសហគមន៍របស់យើងឲ្យបានល្អរឹងម៉ាំ​ សូមបងប្អូនប្រជាពលរដ្ឋ​រស់​នៅក្នុងសហគមន៍ដែលមិនទាន់​បានទទួលវ៉ាក់សាំងបង្ការជំងឺកូវីដ១៩ ​ដូសមូលដ្ឋានពេញលេញ ឬ​ក៏ដល់ពេលមកទទួលវ៉ាក់សាំងដូសជំរុញហើយនោះ ​សូមអញ្ជើញមកទទួលវ៉ាក់សាំង​នៅ​មនី្ទរ​ពេទ្យបង្អែកសម្តចឪ សម្តេចម៉ែ ​ឬក៏មនី្ទរពេទ្យ ​មណ្ឌលសុខភាពទូទាំងប្រទេស ដែលបើក​ដំណើរ​ការចាក់វ៉ាក់សាំង​បង្ការជំងឺកូវីដ១៩ជូន​ និងសូមឲ្យបងប្អូនប្រជាពលរដ្ឋទាំងអស់ កុំមាន​ការធ្វេស​ប្រហែស ត្រូវពង្រឹងឡើងវិញនូវវិធានការការពារ គឺ៣កុំ ៣ការពារ របស់​សម្តេចអគ្គមហាសេនា​បតី​តេជោ ហ៊ុន សែន នាយករដ្ឋមន្រី្ត​ នៃព្រះរាជាណាចក្រកម្ពុជា ​និងវិធានការរបស់ក្រសួងសុខាបាល ដែលបានដាក់ចេញ។

ក្នុងឱកាសថ្នាក់ដឹកនាំក្រសួងសុខាភិបាល បានចុះមកអភិបាលកិច្ចនៃការងារចាក់វ៉ាក់សាំង​បង្ការ​ជំងឺកូវីដ-១៩ គឺលោក ស៊ីផាន់ សុវណ្ណរ៉ា ​សមាជិកនៃអនុគណៈកម្មការបណ្តុះបណ្តាល និង​ការត្រួត​ពិនិត្យបច្ចេក ​បានថ្លែងអំណរគុណថ្នាក់ដឹកនាំនៃមនី្ទរពេទ្យសម្តេចឪ ​សម្តេចម៉ែ បានខ្នះខ្នែង​ព្យាយាម​ក្នុងការងារផ្តល់ថ្នាំបង្ការ ​តាំងពីចាប់ផ្តើមយុទ្ធនាការចាក់វ៉ាក់សាំងបង្ការជំងឺកូវីដ-១៩ រហូត​មក​ដល់ពេលនេះ។

ជាចុងក្រោយនាយកមន្ទីរពេទ្យសម្តេចឪ សម្តេចម៉ែ បានបញ្ជាក់ទៀតថា មកដល់ពេលនេះ​បុគ្គលិក​សុខាភិបាល ក្នុងមន្ទីរពេទ្យ ​មានចំនួន៦៤នាក់ និងគ្រែទទួលសម្រាកព្យាបាលជំងឺមាន​ប្រមាណ​ជាង​៤០ កំពុងផ្តល់សេវាសុខាភិបាលជូនប្រជាពលរដ្ឋជាច្រើនផ្នែក ដូចជា ​ពិនិត្យពិគ្រោះជំងឺឯកទេស សង្រ្គោះ​បន្ទាន់ វះកាត់តូច ជំងឺទូទៅផ្នែកកុមារ ​និងមនុស្សពេញវ័យ ​សម្ភព និងរោគស្រី្ត និង​ព្យាបាលពន្យាអ្នកផ្ទុកមេរោគអេដស៍ ជំងឺរបេង ​ជំងឺផ្លូវចិត្ត ​និងផ្នែកមនី្ទរពិសោធន៍៕អត្ថបទ៖ រដ្ឋា