ភ្នំពេញ​ ៖ រដ្ឋលេខាធិការ និងជាអ្នកនាំពាក្យក្រសួងអភិវឌ្ឍន៍ជនបទ ឯកឧត្តម ជ្រុន ថេរ៉ាវ៉ាត បានថ្លែងអះអាងថា បញ្ហារថយន្តធំៗដឹកលើសទម្ងន់ មិនត្រឹមតែបានបំផ្លាញផ្លូវជាតិ ផ្លូវខេត្តប៉ុណ្ណោះទេ ថែមទាំងបានបំផ្លាញផ្លូវលំនៅតាមជនបទផងដែរ ដោយសារតែរថយន្តទាំងនោះបានព្យាមគេចវេសពីអាជ្ញាធរ និងជញ្ជីងថ្លឹងនៅតាមផ្លូវជាតិឬតាមខេត្តនានាជាដើមនោះ។

ថ្លែងនៅក្នុងសន្និសីទសារព័ត៌មានរបស់អង្គភាពអ្នកនាំពាក្យរាជរដ្ឋាភិបាល ក្រោមប្រធានបទ «សមិទ្ធផលការងាររយៈពេល៥ឆ្នាំ របស់ក្រសួងអភិវឌ្ឍន៍ជនបទ» ដែលបានប្រព្រឹត្តទៅនាព្រឹកថ្ងៃទី១ ខែសីហា ឆ្នាំ២០២២នេះ ឯកឧត្តមជ្រុន ថេរ៉ាវ៉ាត បានលើកឡើងថា បច្ចុប្បន្នបញ្ហារថយន្ដដឹកលើសទម្ងន់កំណត់ ក៏ជាបញ្ហាចម្បងនាំឲ្យខូចផ្លូវជនបទ ក្រោយយានយន្ដមួយចំនួនតូច គេចពីការត្រួតពិនិត្យនៅតាមផ្លូវជាតិ និងផ្លូវខេត្តនានានោះ។

ទាក់ទងនឹងបញ្ហាខាងលើនេះ ឯកឧត្តម ជ្រុន ថេរ៉ាវ៉ាត ក្រសួងអភិវឌ្ឍន៍ជនបទ តែងសហការយ៉ាងជិតស្និតជាមួយក្រសួងសាធារណការ និងដឹកជញ្ជូន ដើម្បីធ្វើការទប់ស្កាត់ដល់អ្នកដែលរកស៊ីដឹកជញ្ជូនលើសទម្ងន់កំណត់នេះ ហើយក្រសួងសាធារណការ ក៏បានផាកពិន័យជាបន្ដបន្ទាប់។ ជាងនេះទៅទៀតក្រសួងអភិវឌ្ឍន៍ជនបទ ក៏នឹងសហការជាមួយក្រសួងសាធារណការ និងដឹកជញ្ជូន ដើម្បីបង្កើតគណៈកម្មការឲ្យបានត្រឹមត្រូវឈានទៅដាក់ជញ្ជីងថ្លឹងទម្ងន់កំណត់ដូចផ្លូវជាតិផងដែរ៕ អត្ថបទ ៖ បាន ចក់