ភ្នំពេញ៖ បណ្តាភ្ញៀវទេសចរអន្តរជាតិដែលបានទស្សនាខេត្តសៀមរាប ក្នុងអំឡុងពេលនេះ គឺហាក់​មាន​ភាពសប្បាយរីករាយខ្លាំងជាមួយនឹងការអញ្ជើញទស្សនាអង្គរវត្ត និងការទស្សនាតំបន់​រមណីយ​ដ្ឋាន​ទេសចរណ៍ ​និង​តំបន់ទេសភាព​ច្រើនកន្លែងទៀត​នៅ​ក្នុងបឹង​ទន្លេសាប​ ហើយ​ភ្ញៀវ បានថ្លែងថា ការទស្សនានេះ ​គឺហាក់ទទួល​បានការលើកទឹកចិត្តច្រើនពីប្រជាជន​ដែល​មាន​ភាព​ញញឹម​រាក់ទាក់ ​ជា​ពិសេសតម្លៃសេវា​សមរម្យ ​អាហារឆ្ងាញ់ ​និងមានគុណភាពសុវត្ថិភាព។

បើតាមបណ្តាភ្ញៀវទេសចរអន្តរជាតិ ​ដែលបានទៅទស្សនាតំបន់ទេសភាពបឹងទន្លេសាបចុងឃ្នាស ខេត្តសៀមរាប បានថ្លែងប្រាប់BTVនៅថ្ងៃទី២ ខែសីហានេះថា សម្រាប់ការមកទស្សនា​ខេត្តសៀមរាប​នៅក្នុងអំឡុងពេលនេះ ​គឺគេសុទ្ធតែមានការពេញចិត្តជាខ្លាំង ខណៈគេបាន​មក​សប្បាយ ​និងបានឃើញតំបន់ទេសភាពល្អស្រស់បំព្រមជាច្រើនកន្លែង ក្រៅពីការទស្សនា​ប្រាសាទអង្គរ ​និងប្រាង្គប្រាសាទនានាទៀត។

នៅក្នុងពិធីជួបសំណេះសំណាលប្រជាសហគមន៍ផ្តល់សេវាទូកទេសចរណ៍ចុងឃ្នាស ខេត្តសៀមរាប ​ឯកឧត្តម ថោង ខុនរដ្ឋមន្ត្រីក្រសួងទេសចរណ៍​ បានថ្លែងថា ​យ៉ាងណាក៏ដោយ គ្រប់​ការផ្តល់​សេវាកម្មជូនភ្ញៀវទេសចរអន្តរជាតិ​ នៅក្នុងអំឡុងពេលនេះ គឺគ្រប់​បណ្តាអាជីវកម្មទេស​ចរណ៍​នៅខេត្តសៀមរាប គួរត្រូវរួមបញ្ចុះតម្លៃ ផ្តល់សេវាតម្លៃសមរម្យ ​ដើម្បីបង្កើនភាពទាក់ទាញ ជាពិសេសឲ្យគេយក​រឿងរ៉ាវ​ការមកទស្សនាខេត្តសៀមរាបនេះទៅនិយាយផ្សព្វផ្សាយបន្ត និង​ទាក់ទាញភ្ញៀវ​ទេសចរអន្តរជាតិនានាមកទស្សនាកម្ពុជា។

ជាក់ស្តែង ដើម្បីទាក់ទាញភ្ញៀវទេសចរមកកាន់ខេត្តសៀមរាប ​ឯកឧត្តម ថោង ខុន ថ្លែងថា ក្នុង​អំឡុង​ពេលនេះ ​រាជរដ្ឋាភិបាលបានផ្តល់គោលនយោបាយលើកទឹកចិត្តដល់ភ្ញៀវទេសចរជាតិ ក្នុងនោះ ​សម្រាប់ការទិញសំបុត្រចូលរមណីយដ្ឋានអង្គរ ​ប្រភេទ ១ថ្ងៃ អាចចូល​ទស្សនា​បានរយៈពេល ២ថ្ងៃ, សុពលភាព រយៈពេល ៥ថ្ងៃ -ទិញបណ្ណប្រភេទ ៣ថ្ងៃ អាចចូលទស្សនា​បានចំនួន៥ថ្ងៃមានសុពលភាព រយៈពេល ១០ថ្ងៃ -ទិញ​បណ្ណប្រភេទ ៧ថ្ងៃ ​អាចចូលទស្សនាបាន ១០ថ្ងៃមាន ​សុពលភាព រយៈពេល ១ខែ ។ ដោយឡែក​ សម្រាប់អ្នកវិនិយោគទុនអន្តរជាតិវិញ ដែល​រស់នៅកម្ពុជាចាប់ពី២ឆ្នាំឡើង ​អាច​ទស្សនាអង្គរដោយមិនបាច់ទិញសំបុត្រនោះទេ។

សូមបញ្ជាក់ថា ​ខេត្តសៀមរាបនៅក្នុងរយៈពេល ៦ខែកន្លងមកនេះ ​ឆ្នាំ២០២២ នេះ ទទួល​បាន​ទេសចរអន្តរជាតិប្រមាណ ​៦ម៉ឺននាក់ ​កើនឡើងក្នុងអត្រា ១០២៥% និងទទួលទេសចរផ្ទៃ​ក្នុង​ប្រមាណជាង ១លាននាក់​ កើនឡើងក្នុងអត្រា​ ៧៩៨% ធៀបរយៈពេលដូចគ្នាឆ្នាំ២០២១ ក្នុងនោះជើង​ហោះហើរមកកាន់ខេត្តសៀមរាប មានចំនួន ៣៨៧ជើង នៅក្នុងឆមាសទី១ ឆ្នាំ២០២២នេះ។

ឈរលើស្មារតីនេះ ខេត្តសៀមរាបនឹងទទួលបានទេសចរអន្តរជាតិប្រមាណជាង​ ១០ម៉ឺននាក់ នៅក្នុងឆ្នាំ២០២២ នេះ ​ហើយនឹងកើនដល់ប្រមាណ ​៥០ម៉ឺននាក់​ នៅក្នុងឆ្នាំ២០២៣ ខាងមុខ ដោយ​នឹងស្រូបយក ១/៤ នៃភ្ញៀវទេសចរអន្តរជាតិដែលមកទស្សនាកម្ពុជា៕អត្ថបទ៖ ស៊ុម សុខជា