កោះតៃវ៉ាន់៖ ប្រធានសភាអាមេរិកលោកស្រី Speaker Nancy កាលពីថ្ងៃពុធបាននិយាយថា ដំណើរទស្សនកិច្ចរបស់លោកស្រីទៅកាន់កោះតៃវ៉ាន់ គួរតែត្រូវបានមើលឃើញថា ជាសេចក្ដីថ្លែងការណ៍ម៉ឺងម៉ាត់មួយដែលថា អាមេរិកឈរនៅខាងកោះនេះ ហើយថា ចិនមិនអាចរារាំងមិនឲ្យមេដឹកនាំពិភពលោកទៅទស្សនកិច្ចនៅកោះនេះបានឡើយ។
សេចក្ដីថ្លែងការណ៍របស់លោកស្រី Pelosi មានឡើងស្របពេលមានរបាយការណ៍ថា យន្តហោះចម្បាំងរបស់ចិន ២៧គ្រឿងបានហោះចូលតំបន់ការពារដែនអាកាសរបស់កោះតៃវ៉ាន់ ប៉ុន្មានម៉ោងក្រោយលោកស្រីចាកចេញពីក្រុងតៃប៉ិ បន្ទាប់ពីដំណើរទស្សនកិច្ចមន្ត្រីកំពូលរូបនេះ ដែលបង្កឲ្យភាពតានតឹងកើនឡើងកាន់តែខ្លាំងនៅច្រកសមុទ្រតៃវ៉ាន់។ លោកស្រី Pelosi បាននិយាយនៅក្នុងសេចក្ដីថ្លែងការណ៍ថា គួរឲ្យស្ដាយកោះតៃវ៉ាន់ត្រូវបានរារាំងមិនឲ្យចូលរួមក្នុងកិច្ចប្រជុំនានាថ្នាក់ពិភពលោក ដូចជាអង្គការសុខភាពពិភពលោកជាដើម ដោយសារការជំទាស់ពីប្រទេសចិន។ ចិនបានបង្ហាញកំហឹងបន្ថែមទៀតជុំវិញដំណើរទស្សនកិច្ច ទៅកាន់កោះនេះក្នុងរយៈពេល ២៥ឆ្នាំមកនេះ ដោយបង្កើតសកម្មភាពយោធានៅក្នុងដែនទឹកជុំវិញកោះមួយនេះ កោះអញ្ជើញឯកអគ្គរដ្ឋទូតអាមេរិកប្រចាំទីក្រុងប៉េកាំង និងផ្អាកការនាំចេញផលិតផលកសិកម្មពីកោះតៃវ៉ាន់៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
