ត្បូងឃ្មុំ៖ កសិករគោលដៅចំនួន៧៥២គ្រួសារ ក្នុងស្រុកពញាក្រែក ខេត្តត្បូងឃ្មុំ ដែលដំណាំស្រូវ​របស់​ពួកគេរងការខូចខាតប្រមាណ៥៤២ហិចតា ដោយទឹកជំនន់ក្នុងឆាំ្ន២០២២នេះ ត្រូវបាន​សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា ផ្តល់ស្រូវពូជ ចំនួនជាង ៥៦តោន ដើម្បីជួយសម្រួលដល់ការស្តារការដាំដុះឡើងវិញ។

ឯកឧត្តម វង់ សណ្តាប់ រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងឯកឧត្តម ជាម ច័ន្ទសោភ័ណ អភិបាលខេត្តត្បូងឃ្មុំ បានជំរុញលើកទឹកចិត្តដល់កសិករខិតខំបន្តយកចិត្ត​ទុកដាក់​បង្កបង្កើន​ផលម្តងទៀត បើទោះជួបគ្រោះធម្ម ជាតិក៏ពិតមែន ​ប៉ុន្តែរាជរដ្ឋាភិបាល មិនបោះបង់​ពួកគេចោលឡើយ។

ឯកឧត្ដម បានលើកឡើងក្នុងពិធីប្រគល់ ​និងផ្តល់ស្រូវពូជ​ ក្នុងឃុំដូនតី​ ស្រុកពញាក្រែក កាលពីថ្ងៃទី​០៣ ខែសីហា ម្សិលមិញ។

បន្ទាប់ទទួលបានពូជស្រូវ កសិករក្នុងឃុំដូនតី បានបង្ហាញសប្បាយរីករាយ ដោយពួកគេអាច​បន្តទៅបង្ក បង្កើនផលម្តងទៀត ​ដោយមិនចាំបាច់ចំណាយថវិកាទិញពូជស្រូវបន្ថែមទៀត។

ក្នុងរដូវវស្សាឆ្នាំនេះ មានភ្លៀងធ្លាក់ខ្លាំងជាបន្តបន្ទាប់​ ចាប់តាំងពីដើមខែឧសភាមក បង្កជាទឹកជំនន់​ជន់លិចស្រូវ ដែលជាការឆ្លើយតបភ្លាមៗ អាជ្ញាធរ បានសហការជាមួយមន្ទីរ កសិកម្ម រុក្ខាប្រមាញ់ និងនេសាទខេត្តត្បូងឃ្មុំ បានចុះ ត្រួតពិនិត្យ វាយតម្លៃផលប៉ះពាល់ និងខូចខាត ដោយឃើញថា ក្នុងឃុំដូនតី ​មានប្រជាកសិកររងគ្រោះ ចំនួន៧៥២ គ្រួសារ លើផ្ទៃជាង៥៤២ហិកតា ត្រូវការគ្រាប់ពូជ ចំនួន៥៦,៥៥០គីឡូក្រាម៕អត្ថបទ៖ ថុង សីហា