ភ្នំពេញ៖ បន្ទាប់ពីគណបក្សនយោបាយ និងក្រុមអង្គការសង្គមស៊ីវិលមួយចំនួនមិនពេញចិត្ត នឹងការសម្រេចរបស់រាជរដ្ឋាភិបាលកម្ពុជា ធ្វើវិសោធនកម្មរដ្ឋធម្មនុញ្ញលើកទី១០ អ្នកវិភាគនយោបាយនៅកម្ពុជា ចាត់ទុកការមិនពេញចិត្តនេះ ប្រៀបដូចការមិនទទួលស្គាល់ពីភាពរីកច្រើនរបស់ប្រទេសជាតិនាពេលបច្ចុប្បន្ន។

មានប្រសាសន៍ប្រាប់BTVនៅថ្ងៃទី០៥ខែសីហានេះ លោកបណ្ឌិត យង់ ពៅ អ្នកវិភាគនយោបាយកម្ពុជា បានលើកឡើងថា ការធ្វើវិសោធនកម្មរដ្ឋធម្មនុញ្ញលើកទី១០របស់ប្រទេសកម្ពុជា គឺស្របទៅតាមភាពរីកចំរើនរបស់សង្គមជាតិ ដែលមានវិវត្តន៍ពីសម័យកាលមួយទៅសម័យកាលមួយទៀត។ ហើយអ្នកមិនទទួលស្គាល់ការធ្វើវិសោធនកម្មរដ្ឋធម្មនុញ្ញ គឺស្មើរនឹងមិនទទួលស្គាល់ភាពរីកចំរើនរបស់សង្គមជាតិ។ក្រៅពីនេះ លោកបណ្ឌិតបន្តថា នៅក្នុងសកលលោកប្រទេសនីមួយៗ តែងមានការកែប្រែច្បាប់ ឫវិសោធនកម្ម ដើម្បីស្របទៅតាមបរិបទនៃសង្គម ព្រោះមនុស្សជាអ្នកបង្កើតសង្គម ដោយមានច្បាប់ជាអ្នកគ្រប់គ្រង។

មាត្រាមួយចំនួនដែលត្រូវធ្វើវិសោធនកម្មរដ្ឋធម្មនុញ្ញ ក្នុងពេលនេះរួមមាន៖មាត្រា១៩ ថ្មី(មួយ) មាត្រា៨៩ មាត្រា៩៨ថ្មី មាត្រា ១០២ថ្មី មាត្រា១១៩ថ្មី (មួយ) និងមាត្រា១២៥ ថ្មី នៃរដ្ឋធម្មនុញ្ញ ដោយឡែកច្បាប់ធម្មនុញ្ញវិញ មានត្រា៣ថ្មី និងមាត្រា៤ថ្មី។

បច្ចុប្បន្នវិសោធនកម្មរដ្ឋធម្មនុញ្ញ ត្រូវបានព្រឹទ្ធសភាអនុម័តទាំងស្រុង នៅថ្ងៃទី៥ ខែសីហានេះ និងបានបញ្ចូលទៅក្រុមប្រឹក្សារដ្ឋធម្មនុញ្ញ មុនព្រះមហាក្សត្រឡាយព្រះហត្ថ។

រដ្ឋធម្មនុញ្ញ នៃព្រះរាជាណាចក្រកម្ពុជា ដែលត្រូវបានប្រកាសឱ្យប្រើកាលពីថ្ងៃទី២៤ ខែកញ្ញា ឆ្នាំ១៩៩៣ ត្រូវបានធ្វើវិសោធនកម្មជាបន្តបន្ទាប់ រាប់បញ្ចូលទាំងពេលនេះ គឺចំនួន ១០លើកហើយ។ ការធ្វើវិសោធនកម្ម មានគោលបំណងធានាឱ្យបាននូវនិរន្តរភាពជាតិ ក៏ដូចជាធានានូវឧត្តមប្រយោជន៍ជាតិ និងប្រជាជនកម្ពុជា។ អត្ថបទ៖ទូច សោភ័ណ