​កូរ៉េខាងជើង៖ ប្រទេស​កូរ៉េខាងជើង​បាន​រិះគន់​ប្រធាន​សភា​សហរដ្ឋអាមេរិក​លោកស្រី Nancy Pelosi នៅ​ថ្ងៃ​សៅរ៍​នេះ ចំពោះ​ការ​គាំទ្រ​ការរារាំង​ប្រទេស​កូរ៉េខាងជើង ក្នុងអំឡុងពេល​ដំណើរ​ទស្សនកិច្ច​របស់​លោកស្រី​ទៅកាន់​ប្រទេស​កូរ៉េខាងត្បូង​ក្នុង​សប្តាហ៍​នេះ​។​

​លោកស្រី Pelosi និង​សម​ភាគី​កូរ៉េខាងត្បូង​ប្រធាន​រដ្ឋ​សភា​ជាតិ​លោក Kim Jin-pyo បាន​ប្តេជ្ញា​ថា នឹង​សម្រេច​ឲ្យ​បានការ​រំសាយ​អាវុធ​នុយក្លេអ៊ែរ​របស់​កូរ៉េខាងជើង អំឡុង​ពេល​លោកស្រី​ធ្វើ​ទស្សនកិច្ច​នៅ​កូរ៉េខាងត្បូង បន្ទាប់ពី​លោកស្រី​បាន​បំពេញ​ទស្សនកិច្ច​នៅ​កោះ​តៃវ៉ាន់​។​ ​ប្រព័ន្ធ​ផ្សព្វផ្សាយ​រដ្ឋ​កូរ៉េខាងជើង KCNA បាន​រាយការណ៍​ថា ការ​លើក​ឡើង​របស់​លោក​ស្រី Pelosi គឺជា​ផ្នែក​មួយ​នៃ​ផែន​ការ​របស់​សហរដ្ឋ​អាមេរិក ក្នុង​ការ​បង្កើន​ភាព​តានតឹង​នៅ​ឧបទ្វីប​កូរ៉េ​។

​លោក Jo Yong Sam អគ្គ​នា​យ​ក​នាយកដ្ឋាន​ព័ត៌មាន​ក្រសួង​ការ​ការបរទេស​កូរ៉េខាងជើង​និយាយ​ថា ​លោកស្រី Pelosi កំពុង​ព្យាយាម​បង្ហាញ​ពី​គោលនយោបាយ​បង្កជម្លោះ​ របស់​សហរដ្ឋ​អាមេរិក​ប្រឆាំង​កូរ៉េខាងជើង និង​គាំទ្រ​ការ​បង្កើត​អាវុធ​របស់​អាមេរិក​។ លោកស្រី Pelosi ជា​អ្នក​បំផ្លាញ​សន្តិភាព និង​ស្ថិរភាព​អន្តរជាតិ​ដ៏​អាក្រក់​បំផុត ដែល​បាន​ធ្វើ​ឲ្យ​ប្រជាជន​ចិន​មាន​កំហឹង​ចំពោះ​ដំណើរ​ទស្សនកិច្ច​របស់​លោកស្រី​ទៅកាន់​កោះ​តៃវ៉ាន់​៕

អត្ថបទ៖ ប៊ុនថន