ភ្នំពេញ៖ នៅក្នុងកិច្ចប្រជុំអនុគណៈកម្មការផ្សព្វផ្សាយ និងទាក់ទាញទេសចរណ៍លើកទី១ នៃ​គណៈកម្មការគ្រប់គ្រងនិងអភិវឌ្ឍន៍ទេសចរណ៍សៀមរាប-អង្គរ នាថ្ងៃទី០៨ ខែសីហាម្សិលមិញនេះ ក្រុមមន្ត្រីបានពិភាក្សារួមគ្នាជម្រុញបង្កើតកញ្ចប់ទស្សនកិច្ចអង្គរសៀមរាបតម្លៃពិសេស ក្នុងនោះ​ក៏​នឹងជម្រុញរៀបចំបណ្ណចូលទស្សនាអង្គរពេញមួយជីវិតសម្រាប់ភ្ញៀវទេសចរអន្តរជាតិ។

បើតាមឯកឧត្តម ថោង ខុន រដ្ឋមន្ត្រីក្រសួងទេសចរណ៍ ថ្លែងថា ក្រសួងទេសចរណ៍​កំពុង​សិក្សា​ជាមួយ​ស្ថាប័នពាក់ព័ន្ធ និងផ្នែកឯកជនក្នុងវិស័យទេសចរណ៍ដាក់ចេញនូវកញ្ចប់ទស្សនកិច្ច​ទេសចរណ៍​ពិសេស​សម្រាប់ខេត្តសៀមរាប ហើយនឹងសិក្សាស្នើសុំការពិនិត្យ និងសំរេចពីរាជ​រដ្ឋាភិបាល​លើសំណើមួយចំនួននេះនៅពេលឆាប់ៗ។

ឯកឧត្តម បន្តថា នៅក្នុងការបង្កើតកញ្ចប់ទស្សនាអង្គរតម្លៃពិសេសនេះ ក្រុមការងារ​អនុគណៈកម្មការ​ផ្សព្វផ្សាយ ​និងទាក់ទាញទេសចរទស្សនាសៀមរាបអង្គរនោះ បានឯកភាពរួមគ្នា​នឹងលើក​សំណើរ​ចំនួន​៤ដាក់​ជូនរាជរដ្ឋាភិបាលពិនិត្យសម្រេចរួមមាន៖១. បង្កើតបណ្ណចូលទស្សនារមណីយដ្ឋាន​អង្គរពេញមួយជីវិត (Angkor Life time Pass) ដែលនឹងមានជាជម្រើសក្នុងការគិតគូរលក់ជាកញ្ចប់​បណ្ណទស្សនា (Angkor Pass Package) ហើយអាចឱ្យទេសចរអន្តរជាតិទស្សនាតំបន់ប្រាសាទ ឬតំបន់​ផ្សេងៗទៀតពេញមួយជីវិត ​ឬការលក់បណ្ណជាទម្រង់កញ្ចប់ទស្សនកិច្ចអាទិភាព ដែលអនុញ្ញាតឱ្យ​ទេសចរ​អន្តរជាតិអាចមានសិទ្ធិអាទិភាពក្នុងការប្រើប្រាស់សេវាកម្មទេសចរណ៍​និង​ចូលទស្សនា​រមណី​ដ្ឋានអង្គរពេញមួយជីវិត ​ដើម្បីទាក់ទាញឱ្យទេសចរមកទស្សនាច្រើនដង។ ទី២ . ការដោះស្រាយថ្លៃសំបុត្រទូកទេសចរណ៍តំបន់ចុងឃ្នៀសសម្រាប់ទេសចរជាតិ។ ទី៣. ការជំរុញការតភ្ជាប់ជើងហោះត្រង់ពីកោះត្រល់ មកកាន់ខេត្តសៀមរាប។ និងទី៤. ការជំរុញប្រតិបត្តិការរបស់ក្រុមហ៊ុនអាកាសចរណ៍ ដែលលក់សំបុត្រ តម្លៃ ទាប នៅកម្ពុជា។

ឯកឧត្តម ថោង ខុន បន្តថា តាមរយៈការបង្កើតកញ្ចប់ទេសចរណ៍នេះ នឹងរួមចំណែកជំរុញ​ចលនា​ទេសចរទៅទស្សនានៅខេត្តសៀមរាប ​ពិសេសគឺការត្រៀមចាប់ផ្តើមបើកឆ្នាំទស្សនាកម្ពុជា ២០២៣ (Visit Cambodia Year 2023) ​និងត្រៀមការប្រកួតកីទ្បាស៊ីហ្គេមលើកទី៣២ និងអាស៊ានប៉ារ៉ាហ្គេម​លើកទី១២នៅកម្ពុជា ឆ្នាំ២០២៣ខាងមុខនេះ។

នៅក្នុងកិច្ចប្រជុំនេះ ឯកឧត្តម រដ្ឋមន្ត្រីក៏បានផ្ដល់អនុសាសន៍ឲ្យក្រុមការងាររួមគ្នាដាក់បញ្ចូល​ការ​បង្កើតព្រឹត្តិ​ការណ៍​និង​ផលិតផលទេសចរណ៍ថ្មីៗ​ដែលទាក់ទាញទេសចរ ​ការពង្រឹងសុវត្ថិភាព គុណភាព សេវាកម្ម អនាម័យ ការស្តារនិងពង្រឹងឡើងវិញ​នូវគុណភាពធនធានមនុស្សផ្នែកជំនាញ​ទេសចរណ៍ និងបដិសណ្ឋារកិច្ច ​និងការពង្រឹងអនាម័យ សណ្តាប់ធ្នាប់ទីក្រុងជាដើម៕ អត្ថបទ ស៊ុមសុខជា