​អ៊ុយក្រែន៖ មនុស្សម្នា​ក់​បាន​ស្លាប់​កាលពី​ថ្ងៃ​អង្គារ ​នៅ​ពេល​មូលដ្ឋាន​ទ័ពអាកាស​មួយ​កន្លែង​របស់​រុស្ស៊ី​ជិត​រមណីយដ្ឋាន​មាត់សមុទ្រ​ក្នុង​ឧបទ្វីប Crimea ដែល​ត្រូវ​បាន​ដាក់បញ្ចូល​ក្នុង​ឧប​សម្ព័ន្ធ ត្រូវ​បាន​ធ្វើ​ឲ្យ​កក្រើក​ដោយសារតែ​ការ​ផ្ទុះ​ជាច្រើន​គ្រាប់ ដែល​ក្រុង Moscow បាន​និយាយ​ថា ​ជា​ការ​ផ្ទុះ​នៅ​ឃ្លាំង​ស្តុក​អាវុធ មិន​មែន​ជា​ការ​វាយ​ប្រហារណា​មួយ​ទេ។

​សាក្សី​និយាយ​ថា ពួកគេ​បាន​លឺ​សំឡេង​ផ្ទុះ ​១២​លើក​នៅ​ម៉ោង​ប្រហែល ​៣:២០​នាទី​រសៀល​ម៉ោង​ក្នុងស្រុក​ពី​មូលដ្ឋាន​ទ័ពអាកាស Saky ជិត​មូលដ្ឋាន​ទ័ពអាកាស Novofedorivka នៅ​តំបន់​ឆ្នេរសមុទ្រ​ភាគ​ខាងលិច​នៃ​ឧបទ្វីប​នេះ​ ដែល​ត្រូវ​បាន​រុស្ស៊ី​កាត់​យក​ពី​អ៊ុយក្រែន​ដាក់​ចូល​ក្នុង​ឧប​សម្ព័ន្ធ​កាល​ពីឆ្នាំ២០១៤ និង​ត្រូវ​បាន​ប្រើប្រាស់​កាលពី​ខែ​កុម្ភៈ ជា​ចំណត​មួយ​ក្នុងចំណោម​ចំណត​យន្តហោះ​សម្រាប់​ការ​វាយ​លុក​របស់​ខ្លួន​។​ ​តំបន់ Crimea ជា​គោលដៅ​វិស្សមកាល​សម្រាប់​ជនជាតិ​រុស្ស៊ី​ជាច្រើន កន្លងមក​បាន​រួច​ផុត​ពី​ការ​វាយ​ហារ​ដោយ​ទម្លាក់​គ្រាប់បែក និង​កាំភ្លើង​ផ្លោង ដូចដែល​កើតមាន​នៅ​តំបន់​ភាគ​ខាងកើត និង​ខាងត្បូង​របស់​អ៊ុយ​ក្រែ​ន​នោះ​ទេ​។​

​ពេល​សួរ​ថា ​តើ​អ៊ុយ​ក្រែ​ន​អះអាង​ទទួលខុសត្រូវ​ចំពោះ​ការ​ផ្ទុះ​ទាំង​នោះ​ទេ មនុស្ស​ជំនិត​ប្រធានាធិបតី​អ៊ុយ​ក្រែ​ន​លោក Mykhailo Podolyak បាន​ប្រាប់​ប៉ុស្តិ៍​ទូរទស្សន៍ Dozhd online ថា មិន​អាច​ទេ តើ​យើង​មានអី​ជាប់​ពាក់ព័ន្ធ​នឹង​រឿង​នេះ​ទៅ​។ ទីក្រុង Moscow អាច​ចោទប្រកាន់​ទីក្រុង Kyiv ពី​បទ​ឆ្លងកាត់​បន្ទាត់​ក្រហម បើ​អ៊ុយ​ក្រែ​ន​ទទួល​ស្គាល់​ថា​ ខ្លួន​បាន​វាយប្រហារ​ទៅលើ​ដែនដី​ដែល​រុស្ស៊ី​ចាត់ទុកថា ​ជា​កម្ម​សិទ្ធ​របស់​ខ្លួន​នោះ៕

អត្ថបទ៖ សុខមាន