កំពង់ឆ្នាំង៖ នៅថ្ងៃទី១០ ខែសីហា ឆ្នាំ២០២២នេះ សាខាកាកបាទក្រហមកម្ពុជាខេត្តកំពង់ឆ្នាំង បានរៀបចំប្រារព្ធខួបលើកទី១៥៩ ទិវាពិភពលោកកាកបាទក្រហម អឌ្ឍចន្ទក្រហម ៨ ឧសភា ឆ្នាំ២០២២ ក្រោមប្រធានបទ “ទាំងអស់គ្នារួមជាមួយកាកបាទក្រហមកម្ពុជា ដោះស្រាយ​បញ្ហា​ប្រឈម​នានា និងបន្តពង្រឹងភាពធន់នឹងសហគមន៍” ដោយប្រមូល​ថវិកា​បាន​ប្រមាណ​ជាង​ ២០ម៉ឺនដុល្លារ។

ក្នុងពិធីនេះ មានការចូលរួមពីលោកជំទាវ ពុំ ចន្ទីនី អគ្គលេខាធិការកាកបាទក្រហមកម្ពុជា, ឯកឧត្តម អ៊ុក រ៉ាប៊ុន ប្រធានកិត្តិយសសាខាកាកបាទក្រហមខេត្ត, ឯកឧត្តម ជា ហន រដ្ឋមន្ត្រី​ក្រសួង​ព្រះបរមរាជវាំង, ឯកឧត្តម ស៊ុន សុវណ្ណារិទ្ធិ ប្រធាន​គណៈកម្មាធិការ​សាខា​កាកបាទក្រហម​ខេត្តកំពង់ឆ្នាំង។

ឯកឧត្តម ស៊ុន សុវណ្ណារិទ្ធិ បានថ្លែងថា ឆ្នាំនេះសាខាកាកបាទក្រហមកម្ពុជាខេត្ដកំពង់ឆ្នាំង ទទួល​បាន​ទឹកប្រាក់ប្រមាណជាង ២០ម៉ឺនដុល្លារ​នៅក្នុង​ឱកាស​ប្រារព្ធ​ខួប​ទិវា​ពិភព​លោក​កាក​បាទ​ក្រហម អឌ្ឍចន្ទក្រហម ៨ឧសភា ២០២២។ ឯកឧត្តមបានថ្លែងអំណរគុណយ៉ាងជ្រាលជ្រៅចំពោះសប្បុរសជនទំាងអស់ ដែល​បាន​គាំទ្រ​ដល់​សកម្មភាព​មនុស្សធម៌របស់កាកបាទក្រហមកម្ពុជា ដោយបានជួយឧបត្ថម្ភជាទឹកប្រាក់ ជូន​ដល់​សាខា​កាកបាទក្រហមកម្ពុជា ។ ក្នុងនាមប្រធានសាខាកាកបាទក្រហមកម្ពុជាខេត្តកំពង់ឆ្នាំង ឯកឧត្តម​បានប្តេជ្ញាយកថវិកាទំាងនេះ ទៅជួយឱ្យ​ចំ​គោលដៅ​នៃ​ការ​លំបាក​របស់​បង​ប្អូន​ប្រជាពលរដ្ឋ​ជាជនរងគ្រោះដូចជា ជនចាស់ជរា កុមារកំព្រា ស្រ្តីមេម៉ាយមានកូនច្រើន អ្នក​ផ្ទុក​មេរោគ​អេដស៍ អ្នកមានជំងឺរាំរ៉ៃ ជាពិសេស គឺជួយជនរងគ្រោះនៅពេលជួបនូវគ្រោះធម្មជាតិ ឧបទ្ទវហេតុផ្សេងៗ ដោយមិនបានប្រកាន់ពូជសាសន៍ ពណ៌សម្បុរ និង​និន្នាការ​នយោបាយ​អ្វី​ឡើយ​។ 

លោកជំទាវ ពុំ ចន្ទីនី អគ្គលេខាធិការកាកបាទក្រហមកម្ពុជាបានមានប្រសាសន៍ថា៖ ការប្រារព្ធ​ខួប​លើកទី១៥៩ ទិវាពិភពលោកកាកបាទក្រហម អឌ្ឍចន្ទក្រហម ៨ ឧសភា ឆ្នាំ២០២២ ក្រោម​ប្រធានបទ “ទាំងអស់គ្នារួមជាមួយកាកបាទក្រហមកម្ពុជា ដោះស្រាយបញ្ហាប្រឈមនានា និង​បន្ត​ពង្រឹង​ភាពធន់នឹងសហគមន៍” ក្នុងគោលបំណង​លើក​កម្ពស់​ការ​យល់​ដឹង​ពី​បញ្ហា​ប្រឈម​ជា​សាកល​នៃ​ចលនាកាកបាទក្រហម អឌ្ឍចន្ទក្រហម ដើម្បីកៀរគររកមូលនិធិ ដែលជា​ប្រភព​ធនធាន​សម្រាប់ធ្វើប្រតិបត្តិការមនុស្សធម៌ ។ សកម្មភាពមនុស្សធម៌របស់កាកបាទក្រហមកម្ពុជា នៅតែបន្តគោលដៅរួមចំណែកយ៉ាងសកម្ម លើកទឹកចិត្តខ្ពស់ដល់កិច្ចប្រតិបត្តិការនានា នៅក្នុង​បុព្វហេតុ​មនុស្សធម៌ ជាពិសេសការជួយសំរាលទុក្ខលំបាករបស់បងប្អូនប្រជាជន ដែល​ទទួល​រង​នូវ​គ្រោះ​ថ្នាក់​ដោយសារគ្រោះមហន្តរាយផ្សេងៗ ចាស់ជរាឥតទីពឹង កុមារកំព្រា ស្រ្តីមេម៉ាយ​មាន​កូន​ច្រើន អ្នកផ្ទុកមេរោគអេដស៍ អ្នកមានជំងឺរាំរ៉ៃ ហើយកំពុងត្រូវការនូវជំនួយសង្រ្គោះបន្ទាន់ ជា​ពិសេស គឺយើង​កំពុង​រួម​គ្នា​ជា​មួយ​រាជរដ្ឋាភិបាលកម្ពុជា​ក្នុង​ការ​ប្រយុទ្ធ​ប្រឆាំង​នឹង​ជំងឺ​កូវីដ​១៩​បន្តទៀត៕ អត្ថបទ៖ ហុង វាស្នា