កំពត៖ មន្ត្រីជលផលខេត្តកំពត បានបញ្ជាក់ថា ខេត្តកំពត មានផែកការយុទ្ធសាស្ត្របង្កើតតំបន់គ្រប់គ្រងជលផលថ្មីមួយ ដែលមានទំហំប្រមាណជាង ៧ពាន់ហិកតា ស្ថិតនៅតំបន់ឆ្នេរក្នុងភូមិសាស្ត្រក្រុងបូកគោ ដើម្បីអភិរក្សព្រៃកោងកាង ផ្កាថ្ម ស្មៅសមុទ្រ សត្វកម្រ ពិសេសអភិរក្សផ្សោតសមុទ្រ ដែលជាប្រទេសសត្វកម្រជិតផុតពូជ។
នាយកខណ្ឌរដ្ឋបាលជលផលខេត្កកំពត លោក ស សុរិន បានឲ្យដឹងថា តាមអនុក្រឹត្យលេខ១២៣ បានកំណត់សត្វងាយរងគ្រោះ កំពុងរងគ្រោះ និងប្រភេទសត្វកម្រជិតផុតពូជ មានដូចជា ជ្រូកទឹក អណ្តើកសមុទ្រ សេះសមុទ្រ ឆ្លាមប្រភេទខ្លះ និងសត្វជាច្រើនទៀត សរុបប្រមាណ២៥ប្រភេទ ដែលត្រូវអភិរក្ស។ ហើយសត្វផ្សោតសមុទ្រ ក៏ស្ថិតនៅក្នុងចំណោមសត្វទាំង២៥ប្រភេទនោះដែរ ។
លោកនាយខណ្ឌ បានបន្តថា បច្ចុប្បន្នកម្ពុជា មានសត្វផ្សោតប្រមាណ ១៥៥ក្បាលប៉ុណ្ណោះ ក្នុងនោះ ខេត្តកោះកុង ៥០ក្បាល ព្រះសីហនុ ៥០ក្បាល កែប៤០ក្បាល និងកំពត១៥ក្បាល។
សត្វផ្សោត រស់នៅជាក្រុម មិនផ្លាស់ទីទៅណាឆ្ងាយនោះទេ។
សម្រាប់ខេត្តកំពត ផ្សោតបង្ហាញខ្លួនរាល់ថ្ងៃនៅតំបន់សហគមន៍ចង្ហោន ព្រែកត្នោត និងត្រពាំងរពៅ ពេលព្រឹកចន្លោះពីម៉ោង៩ ទៅម៉ោង១០ និងពេលរសៀល ចម្លោះពីម៉ោង១ ទៅម៉ោង២ ប៉ុន្តែអាកាសធាតុអួរអាប់ គឺផ្សោតបង្ហាញខ្លួន ហក់លោតលេងទឹកតែម្តង។
លោកនាយខណ្ឌរដ្ឋបាលជលផល បានបញ្ជាក់ថា សត្វផ្សោត រងការគំរាមកំហែងច្រើន ដូចជាបញ្ហាបំពុលបរិស្ថាន ការចាក់លុបឆ្នេរ និងការនេសាទដោយប្រើអួនអូស ឬមងបណ្តែត ជាដើម ហើយជា រៀងរាល់ឆ្នាំ គេតែងប្រទះឃើញសត្វផ្សោតងាប់ ពី១ក្បាល ឬពីរក្បាល។
លោកបានបញ្ជាក់បន្ថែមថា តំបន់គ្រប់គ្រងជលផលថ្មីនេះ ជាបណ្តុំតំបន់អភិរក្សព្រៃកោងកាង ស្មៅសមុទ្រ ផ្កាថ្មី និងពពួកសត្វកម្រ ដូចជាជ្រូកទឹក អណ្តើកសមុទ្រ សេះសមុទ្រ ពិសេសផ្សោតតែម្តង ដែលតំបន់នេះ មានសកត្តានុពលធំធេង សម្រាប់ការអភិវឌ្ឍវិស័យទេសចរណ៍ទៅអនាគត៕ អត្ថបទ៖ អន សារឹម