ភ្នំពេញ៖ រយៈពេល ១១ខែ នៃកម្មវិធីជជែកដេញដោលយុវជនថ្នាក់ជាតិឆ្នាំ ២០២២ ដែលរៀបចំដោយក្រសួងអប់រំ យុវជន និងកីឡា បានឈានដល់វគ្គផ្ដាច់ព្រ័ត ក្រោមប្រធានបទ “ យុវជនត្រូវមានចំណេះដឹង បំណិន និងចរិយាធ៌មជាពលរដ្ឋល្អ ដើម្បីក្លាយទៅជាសសរទ្រូងពិតប្រាកដរបស់ប្រទេសជាតិ”។ វគ្គផ្ដាច់ព្រ័ត បានរកឃើញនូវម្ចាស់ជ័យលាភី ជាក្រុមសិស្សដែលមកពីវិទ្យាល័យហ៊ុនសែនប្រាសាទបាគង ខេត្តសៀមរាប។

កម្មវិធីជជែកដេញដោលយុវជនថ្នាក់ជាតិឆ្នាំ ២០២២ ឈានដល់វគ្គផ្ដាច់ព្រ័តនៅថ្ងៃនេះ ក្រោម​ការ​ប្រកួតប្រជែង​ដ៏​ស្វិត​ស្វាញ រវាងក្រុមមកពីសាលាប៊ែលធីអន្តរជាតិ ជាក្រុមស្រប និងក្រុមមកពី វិទ្យាល័យហ៊ុនសែនប្រាសាទបាគង ខេត្តសៀមរាប ជាក្រុមបដិសេធ។

ការប្រកួតនេះរៀបចំឡើងក្រោមប្រធានបទ“ យុវជនត្រូវមានចំណេះដឹង បំណិន និងចរិយាធ៌មជាពលរដ្ឋល្អ ដើម្បី​ក្លាយ​ទៅជាសសរទ្រូងពិតប្រាកដរបស់ប្រទេសជាតិ” ដោយមានការដាក់ពិន្ទុសុក្រឹត្យពី សមាសភាព​គណៈកម្មការ​ពោ​ពេញ​​ដោយសមត្ថភាពចំនួន ៧រូប មកពីវិស័យផ្សេងៗគ្នា និងមានការបោះឆ្នោត​គាំទ្រផងដែរ។

ជាលទ្ធផលក្រោយបញ្ចប់ការប្រកួត គឺក្រុមមកពី វិទ្យាល័យហ៊ុនសែនប្រាសាទបាគង ខេត្តសៀមរាប បានក្លាយ​ជាម្ចាស់​ជ័យលាភី រីឯក្រុមមកសាលាប៊ែលធី ទទួលចំណាត់ថ្នាក់លេខពីរ។

ទោះការប្រកួតនេះមានការចាញ់ ឈ្នះយ៉ាងណាក្ដី ក្រុមទាំងពីរសុទ្ធតែពេញចិត្ត និងចាត់ទុកថានេះ ជាជោគជ័យ។ ពួកគាត់ជាយុវជនលើកឡើងថា នេះជាចំណុចចាប់ផ្ដើម ហើយពួកគាត់នឹងប្រឹងប្រែងបន្តទៀត។ ប្រឹងប្រែងដើម្បីខ្លួន​ឯង ប្រឹងប្រែងដើម្បីគ្រួសារ និងប្រឹងប្រែងដើម្បីសង្គមជាតិ។

ជាការមើលឃើញរួមនៃកម្មវិធីនេះ លោកជំទាវ ស្រូយ សុជាតិ អគ្គនាយកយុវជន នៃក្រសួងអប់រំ ជាអ្នក​រៀបចំ​ឱ្យមា​ន​កម្ម​វិធីជជែកដេញដោលនេះឡើង លើកឡើងជាការពេញចិត្តជាខ្លាំង ចំពោះសមត្ថភាពយុវជន ដែលបាន​ចូលរួម​ប្រកួត។ លោកជំទាវ វាយតម្លៃថាសមត្ថភាពយុវជនកម្ពុជា ក្នុងការចូលរួមការប្រកួតនេះ គឺកាន់តែមានភាព​ប្រសើរពី​មួយឆ្នាំ​ទៅមួយឆ្នាំ។

កម្មវិធីជជែកដេញដោលយុវជនថ្នាក់ជាតិឆ្នាំ ២០២២ ក្រៅពីមានវត្តមាន សមាសភាពគណៈកម្មការចំនួន ៧រូប ក៏មាន​វត្ត​មាន ឯកឧត្តម ហង់ ជួនណារ៉ុន រដ្ឋមន្រ្តីក្រសួងអប់រំ យុវជន និងកីឡា ទស្សនាដោយផ្ទាល់ផងដែរ។

ឯកឧត្តម ក៏​បាន​ផ្ដល់​អនុសាសន៍មួយចំនួន ដោយបញ្ជាក់ឱ្យយុវជនត្រូវខិតខំ ព្រោះការសិក្សាគ្មានទីបញ្ចប់នោះទេ។ ឯកឧត្តម​បន្ត​ថា គ្រប់រូបអាចធ្វើការស្វ័យសិក្សា តាមការអានសៀវភៅ ការប្រើប្រាស់អ៊ីនធរណិត ដើម្បីបន្តវិវត្តខ្លួន​ឱ្យ​ទាន់​នឹង​សង្គម​ជាតិ​។អត្ថបទ៖ គឹមហុក