ភ្នំពេញ៖ ក្រសួងធនធានទឹក និងឧតុនិយម អំពាវ​នាវ​ឲ្យ​ប្រជាពលរដ្ឋបន្តយកចិត្តទុកដាក់ និងបង្កើនការប្រុងប្រយ័ត្នខ្ពស់ ខណៈខេត្តចំនួន៨ នៅ​ក្នុង​ព្រះរាជាណាចក្រកម្ពុជា អាច​នឹង​ប្រឈម​​​ជំនន់ទឹកភ្លៀងសារជាថ្មី។ នេះបើយោងតាមសេចក្ដីជូន​ដំណឹង​ដែល​ទទួល​បាន​នៅ​ថ្ងៃ​នេះ​។​

សេចក្ដីជូនដំណឹងបានបញ្ជាក់ថា យោងតាមការវិវត្តជាក់ស្តែង នៃស្ថានភាពអាកាសធាតុ បាន​បង្ហាញ​ឲ្យ​ឃើញជ្រលងសម្ពាធទាបឥណ្ឌា នឹងរំកិលធ្លាក់ចុះជាមួយនឹងប្រព័ន្ធសម្ពាធទាប (ITCZ) ដែល​អូសបន្លាយនៅ ភាគខាងជើងប្រទេសថៃ ឡាវ និងវៀតណាម ដោយ​ភ្ជាប់​ជា​មួយ​នឹង​សម្ពាធ​ទាប ស្ថិតនៅក្នុងសមុទ្រ ចិនខាងត្បូង និងរបប​ខ្យល់​មូសុង​និរតី​ក្នុង​កម្រិត​ពី​មធ្យម​ទៅ​បង្ហូរ​។

លក្ខណៈបែបនេះនឹងធ្វើឲ្យព្រះរាជាណាចក្រកម្ពុជា ចាប់ពីថ្ងៃទី ១៥ ដល់ថ្ងៃទី ១៩ ខែសីហា ឆ្នាំ ២០២២ភ្លៀងនឹងបន្តធ្លាក់ក្នុងសភាពជាលក្ខណៈឡូកាល់ ស្ទើរគ្រប់ទីកន្លែងជាបន្តបន្ទាប់ ក្នុងកម្រិត​ពីតិចទៅបង្គួរ និងច្រើនដោយអន្លើ ។

ស្ថានភាពបែបនេះ អាចធ្វើបណ្តាឲ្យតំបន់ផ្ទៃរងទឹកភ្លៀង និង​បណ្តា​ខេត្ត​មួយ​ចំនួន​ដែល​កន្លង​មក ទទួល​បាននូវបរិមាណទឹកភ្លៀងបង្គួរ និងច្រើនរួចមកហើយ នឹង​​បន្ថែម​បរិមាណ​កើន​ឡើង​ទៀត ដែល​ជា​ហេតុ​បង្កើត​ឡើង​នូវ​ជំនន់ទឹកភ្លៀង​សារជាថ្មី មានជាអាទិ៍ ៖ ខេត្តកំពង់ធំ ព្រះវិហារ រតនគិរី ស្ទឹងត្រែង ក្រចេះ ត្បូងឃ្មុំ កំពង់ចាម និង ខេត្តឧត្តរមានជ័យ៕