ស៊ីហ្គេម៖ ឯកឧត្តម វ៉ាត់ ចំរើន អគ្គលេខាធិការគណៈកម្មាធិការជាតិ រៀបចំការប្រកួតកីឡាស៊ីហ្គេមលើកទី៣២ ឆ្នាំ២០២៣ (CAMSOC) កាលពីចុងសប្ដាហ៍កន្លងទៅ បានជួបជាមួយថ្នាក់ដឹកនាំសហព័ន្ធកីឡាអេឡិចត្រូនិចវៀតណាម នៅទីស្នាក់ការគណៈកម្មាធិការជាតិអូឡាំពិកកម្ពុជា (NOCC) ដើម្បីពិភាក្សាការងារលម្អិតអំពីការចុះអនុស្សារណៈយោគយល់គ្នា (MOU) ដែលភាគីទាំងពីរបានចុះកិច្ចសន្យាបឋមកាលពីខែឧសភាកន្លងទៅ នៅប្រទេសវៀតណាម។
ឯកឧត្តម វ៉ាត់ ចំរើន បានបញ្ជាក់ថា ខ្លឹមសារសំខាន់ក្នុង MOU ដែលសហព័ន្ធអេឡិចត្រូនិកកម្ពុជា និងវៀតណាមបានចុះកិច្ចសន្យាបឋមជាមួយគ្នា ហើយត្រូវបានលើកមកជជែកគ្នាលម្អិតនាពេលនេះផ្ដោតសំខាន់លើ ២ចំណុចដែលវៀតណាមសន្យារជួយដល់កម្ពុជា ទី១-ការជួយរៀបចំលក្ខណៈបច្ចេកទេសក្នុងការរៀបចំ ការប្រកួតកីឡាអេឡិចត្រូនិចក្នុងព្រឹត្តិការណ៍ស៊ីហ្គេមឆ្នាំ២០២៣ និងទី២-ការជួយពង្រឹងធនធានមនុស្សត្រៀមព្រឹត្តិការណ៍ជាប្រវត្តិសាស្ដ្រលើកដំបូងនៅកម្ពុជានេះ។
សូមបញ្ជាក់ថា កីឡាអេឡិចត្រូនិចគឺជាកីឡា១ ក្នុងចំណោមកីឡាទាំង ៣៩ប្រភេទបូកនឹងកីឡាសម្ដែង ១ប្រភេទ ដែលត្រូវបានក្រុមប្រឹក្សាសហព័ន្ធកីឡាអាស៊ីអាគ្នេយ៍ អនុម័តរួចរាល់សម្រាប់ស៊ីហ្គេមឆ្នាំ២០២៣ នៅកម្ពុជា។ កីឡាអេឡិចត្រូនិចទើបបង្ហាញខ្លួនក្នុងព្រឹត្តិការណ៍កីឡាប្រចាំតំបន់នេះ ២ដងប៉ុណ្ណោះកាលស៊ីហ្គេមឆ្នាំ២០១៩ នៅហ្វីលីពីន និងឆ្នាំ២០២២ នៅវៀតណាម ខណៈកម្ពុជាគឺជាលើកទី៣ ដែលកីឡាទំនើបមួយនេះត្រូវបង្ហាញវត្តមាន៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
