កោះតៃវ៉ាន់៖ គណៈប្រតិភូសហរដ្ឋអាមេរិកមួយក្រុមបានទៅដល់កោះតៃវ៉ាន់ សម្រាប់ដំណើរទស្សនកិច្ចរយៈពេល ២ថ្ងៃ ដែលក្នុងអំឡុងពេលនោះពួកគេនឹងជួបពិភាក្សាជាមួយមេដឹកនាំកោះនេះលោកស្រី Tsai Ing-wen ជាក្រុមមន្ត្រីជាន់ខ្ពស់ទី២ ដែលបានមកកាន់កោះនេះ ស្របពេលមានភាពតានតឹងខាងយោធានៅតែបន្ត ជាមួយប្រទេសជិតខាងធំបំផុតរបស់កោះនេះគឺប្រទេសចិន។
ប្រទេសចិនដែលអះអាងសិទ្ធិលើកោះតៃវ៉ាន់គ្រប់គ្រងតាមបែបប្រជាធិបតេយ្យ ជាផ្នែកមួយនៃដែនដីរបស់ខ្លួននោះបានធ្វើសមយុទ្ធទ្រង់ទ្រាយធំបំផុតមិនធ្លាប់មានជុំវិញកោះនេះ ដើម្បីបង្ហាញពីកំហឹងរបស់ខ្លួនចំពោះដំណើរទស្សនកិច្ចនៅខែនេះមកកាន់ទីក្រុងតៃប៉ិ (Taipei) ពីសំណាក់ប្រធានសភាអាមេរិកលោកស្រី Nancy Pelosi។ ស្ថានទូតសហរដ្ឋអាមេរិកតាមជាក់ស្ដែងនៅក្នុងទីក្រុង Taipei កាលពីថ្ងៃអាទិត្យនិយាយថា គណៈប្រតិភូនេះត្រូវបានដឹកនាំដោយសមាជិកព្រឹទ្ធសភាលោក Ed Markey ដែលត្រូវបានអមដំណើរដោយក្រុមតំណាងរាស្ត្រផ្សេងទៀត សម្រាប់អ្វីដែលខ្លួនហៅថា ជាផ្នែកមួយនៃដំណើរទស្សនកិច្ចទ្រង់ទ្រាយធំជាងមុនមកកាន់តំបន់អាស៊ី-ប៉ាស៊ីហ្វិក។
វិទ្យាស្ថានអាមេរិកនៅកោះតៃវ៉ាន់បាននិយាយថា គណៈប្រតិភូនេះនឹងជួបក្រុមមេដឹកនាំជាន់ខ្ពស់កោះតៃវ៉ាន់ ដើម្បីពិភាក្សាទំនាក់ទំនងរវាងអាមេរិក-កោះតៃវ៉ាន់ សន្តិសុខក្នុងតំបន់ ពាណិជ្ជកម្ម និងការវិនិយោគ ខ្សែសង្វាក់ផ្គត់ផ្គង់សកល បម្រែបម្រួលអាកាសធាតុ និងបញ្ហាសំខាន់ៗផ្សេងទៀតនៃផលប្រយោជន៍ទៅវិញទៅមក ដែលតំណាងឲ្យរដ្ឋាភិបាលសហរដ្ឋអាមេរិក នៅលើកោះនេះពួកគេពុំមានទំនាក់ទំនងផ្លូវការឡើយ។ ការិយាល័យមេដឹកនាំកោះតៃវ៉ាន់បាននិយាយថា ក្រុមនេះនឹងជួបលោកស្រី Tsai Ing-wen នៅព្រឹកថ្ងៃចន្ទនេះ៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
