ស្វាយរៀង៖ សមាគមក្រុមគ្រូពេទ្យសហគមន៍ឱសថការី មកពីប្រទេសបារាំង ប្រមាណជាង១០នាក់ ដឹកនាំដោយ ឯកឧត្តម ម៉ក់ សារុន ប្រធានក្រុមការងាររាជរដ្ឋាភិបាលចុះជួយស្រុកស្វាយទាប ខេត្តស្វាយរៀង កាលពីថ្ងៃទី១៤ ខែ​សីហាម្សិលមិញ បានចុះពិនិត្យ និងព្យាបាលជំងឺ​ជូនពលរដ្ឋ​ឥតគិតថ្លៃ ប្រមាណជាង៥០០នាក់ នៅឃុំគគីសោម ស្រុកស្វាយទាប ។

លោកស្រីវេជ្ជបណ្ឌិតប្រធានសមាគម បានឲ្យដឹងថា ការពិនិត្យ និងព្យាបាលជំងឺជូនពលរដ្ឋ នៅ ស្រុកស្វាយទាប បានធ្វើឡើងរយៈពេល១ថ្ងៃពេញ ​ដោយក្រុមគ្រូពេទ្យឯកទេស ​បានពិនិត្យ និង​ព្យាបាល ជំងឺបេះដូង ជំងឺទូទៅ និងជំងឺកុមារ ។

ឯកឧត្តម ម៉ក់ សារ៉ុន ប្រធានក្រុមការងារថ្នាក់ជាតិចុះជួយស្រុកស្វាយទាប ជួសមុខឲ្យពលរដ្ឋ​ បាន​សម្ដែងអំណរគុណយ៉ាងជ្រាលជ្រៅចំពោះក្រុមគ្រូពេទ្យសមាគមឱសថការីប្រទេសបារាំង ដែលបាន ចុះជួយពិនិត្យ និងព្យាបាលជំងឺពលរដ្ឋនៅតំបន់ជនបទក្នុងខេត្តស្វាយរៀង ដែល​ជា​ការរួមចំណែកក្នុងការ លើកកម្ពស់សុខុមាលភាពរបស់ពលរដ្ឋ និងកុមាររបស់កម្ពុជា។

ឯកឧត្តម បានអំពាវនាវដល់ពលរដ្ឋ ឱ្យបន្តអនុវត្តវិធានសុខាភិបាល​ ៣ការពារ និង ៣កុំ បន្ថែម ទៀត ពិសេសត្រូវនាំគា្នទៅចាក់វ៉ាក់សាំង ​ដែលជាមធ្យោបាយដ៏មានប្រសិទ្ធភាពក្នុងការទប់ទល់នឹងជំងឺ កូវីដ-១៩ ដែលកំពុងតែកម្រើកឡើងវិញហើយនោះ៕ អត្ថបទ៖ ភា សារិត