​គុនខ្មែរ៖ កម្មវិធី​ទី​៣ នៃ​ព្រឹត្តិការណ៍ “​សង្វៀន​គុន​ខ្មែរ​ជើងឯក​ពិភពលោក ឬ​ World Fight Kun Khmer Series” ដែល​គ្រោង​រៀបចំ​ការប្រកួត​នា​ថ្ងៃទី​១៧ ខែសីហា​ស្អែក​នេះ ត្រូវបាន​លើក​ពេល​ទៅ​រៀបចំ​ការប្រកួតនា​ថ្ងៃទី​៣១ ខែសីហា​វិញ​ហើយនៅ​កីឡដ្ឋាន​កងយោធពល​ខេមរភូមិន្ទ។ នេះ​បើតាម​ការបញ្ជាក់​របស់​គណៈកម្មការ​រៀបចំ​ព្រឹត្តិការណ៍​អន្ដរជាតិ​មួយ​នេះ។​

​មុន​លើក​ពេល​ការប្រកួត​នេះ ស្ថាប័ន​ World Fight ​ដែលជា​អ្នក​ផ្ដួចផ្ដើម​រៀបចំ​ព្រឹត្តិការណ៍​នេះបាន​ផ្គូរ​ផ្គង់​គូប្រកួត សម្រាប់​កម្មវិធី​ទី​៣ របស់ខ្លួន​រួចហើយដោយមាន ៥​គូក្នុងនោះ​អ្នកលេង​គុន​ខ្មែរ ៦​រូបរួមមាន​កីឡាករ ឡៅ ចិ​ន្ទ្រា ជួប​កីឡាករ​បារាំង​ Sebastien Billard, កីឡាករ ប៉ឺ​ត ស​ង្ឃឹ​ប ជួប​កីឡាករ​ថៃ​ Ratchcharoen Sakchatree, ​កីឡាករ ឡៅ ស៊ី​នេ​ត ជួប​កីឡាករ​ថៃ​ Panhod The Baear, ​កីឡាករ រិ​ន សា​រ័ត្ន ជួប​កីឡាករ​ឡាវ​ Khunphonnoi Sor.Khamsing ​និង​កីឡាការិនី សំ សំណាង ជួប​មិត្ត​រួម​ជាតិ លីន ស្រី​ម៉ៅ។​

​សូមបញ្ជាក់ថា ព្រឹត្តិការណ៍​នេះបាន​ដំណើរ​ការប្រកួត​ចំនួន ២​លើក​រួចមកហើយកាលពី​ខែកក្កដា​កន្លងទៅ នៅ​ពហុ​កីឡដ្ឋាន​ជាតិ​មរតក​តេ​ជោ ក្នុងចំណោម ១១​កម្មវិធីដែល​ទទួលបាន​ការគាំទ្រ​ពី​ក្រសួង​អប់រំ យុវជន និង​កីឡា​, គណៈកម្មាធិការ​ជាតិ​អូឡាំពិក​កម្ពុជា និង​សហព័ន្ធ​កីឡាប្រដាល់​គុន​ខ្មែរ ដើម្បី​ផ្សព្វផ្សាយ​ពី​វិស័យ​កីឡា​គុន​ខ្មែរទៅកាន់​ឆាក​អន្ដរជាតិ ហើយក៏​រួមចំណែក​ផ្សព្វផ្សាយ​ដំណើរ​ឆ្ពោះទៅ​ស៊ី​ហ្គេម​លើក​ទី​៣២ ឆ្នាំ​២០២៣ នៅ​កម្ពុជា​ផងដែរ៕

​អត្ថបទ លី ឈុន​ឡា