ភ្នំពេញ ៖ លោក វ៉ាង វិនធាន ឯកអគ្គរដ្ឋទូតចិនប្រចាំនៅកម្ពុជា បានថ្លែងថា«មិនថាឆ្មាសឬឆ្មាខ្មៅទេ ឱ្យតែចេះចាប់កណ្ដុរសុទ្ធតែជាឆ្មាល្អ» ហើយប្រៀបបានដូចជាវ៉ាក់សាំងការពារមេរោគកូវីដ១៩យ៉ាងដូច្នេះដែរ មិនថាជារបស់ចិន ឬជារបស់ប្រទេសណានោះទេ ឱ្យតែអាចជួយប្រជាជនកម្ពុជាបានរួចផុតពីការរីករាលដាលនូវមេរោគកូវីដ១៩បាន គឺសុទ្ធតែជាវ៉ាក់សំាងល្អទាំងអស់។

 ថ្លែងនៅក្នុងកិច្ចសម្ភាសន៍ជាមួយទូរទស្សន៍ប៊ីធីវី នារសៀលថ្ងៃទី១ មេសា ឆ្នាំ២០២១នេះ លោក វ៉ាង វិនធាន បានលើកឡើងថា សុវត្ថិភាព និងប្រសិទ្ធភាពនៃវ៉ាក់សាំងចិនត្រូវបានបញ្ជាក់យ៉ាងច្បាស់លាស់ នាពេលបច្ចុប្បន្ននេះជាង ៧០ប្រទេសបានអនុញ្ញាតឱ្យប្រើវ៉ាក់សាំងចិនជាបន្តបន្ទាប់។ តាមតួលេខវ៉ាក់សាំងដែលត្រូវបានចាក់នៅក្នុងប្រទេសចិនមានចំនួនលើសពី១២០លានដូស ខណៈប្រទេសកម្ពុវិញ អ្នកចាក់វ៉ាក់សាំងចិន មានចំនួនរាប់សិបម៉ឺននាក់ ក៏មិនទាន់ឃើញមានករណីប្រតិកម្មណាធ្ងន់ធ្ងរកើតឡើងដែរ។

 លោកឯកអគ្គរដ្ឋទូតបានបញ្ជាក់ថា បុគ្គលមួយចំនួនបានបង្កើតពាក្យចចាមអារ៉ាមលើបណ្ដាញអ៊ិនធើណេតថា វ៉ាក់សាំងចិនមិនមានសុវត្ថិភាព បុគ្គលមួយចំនួនធ្វើបែបនេះក្នុងគោលបំណងចង់ទាក់ទាញក្រសែភ្នែកដោយតាមរយៈព័ត៌មានមិនពិតទាំងនេះ ហើយមួយចំនួនទៀតមានគោលបំណងនយោបាយចង់បង្ខូចឈ្មោះចិន និងចង់ជ្រៀតជ្រែកការងារទប់ស្កាត់នឹងវីរុសនៅក្នុងប្រទេសកម្ពុជា។ ប៉ុន្តែទោះជាយ៉ាងនេះក្តី ចិនមានសុភាសិតមួយតែងពោលថា «ការពិតនៃរឿងរ៉ាវអាចយកឈ្នះរាល់ពាក្យចចាមអារ៉ាមទាំងឡាយ»។ សុវត្ថិភាព និងប្រសិទ្ធភាព នៃវ៉ាក់សាំងចិននឹងបង្ហាញបញ្ជាក់ជូនអ្នកទាំងអស់គ្នានាពេលក្រោយនេះ។ ទាក់ទងនឹងពាក្យចចាមអារ៉ាមថា រដ្ឋាភិបាលកម្ពុជាប្រើប្រាស់វ៉ាក់សាំងចិន ដើម្បីសម្លាប់ប្រជាជនខ្លួនជាពាក្យផ្តេសផ្ដាស មិនគួរនិយាយបែបនេះនោះទេ។

 ឆ្លើយតបនឹងការរិះគន់បែបនយោបាយពីមជ្ឈដ្ឋាននានា នាពេលកន្លងទៅទាក់ទងនឹងការប្រើប្រាស់វ៉ាក់សាំងរបស់ចិននៅកម្ពុជានោះ លោកឯកអគ្គរដ្ឋទូតចិន បានសង្កត់ធ្ងន់ថា «ចិនតែងមានសុភាសិតមួយពោលថា «មិនថាឆ្មាសឬឆ្មាខ្មៅទេ ឱ្យតែចេះចាប់កណ្ដុរសុទ្ធតែជាឆ្មាល្អ»។ ដូច្នេះហើយ មិនថាជាវ៉ាក់សាំងចិន ឬវ៉ាក់សាំងផ្សេងទៀតនោះទេ ឱ្យតែអាចជួយប្រជាជនកម្ពុជា ក្នុងការទប់ទល់ជាមួយការយាយីនៃវីរុសកូវីដ-១៩ អាចដើរតួយ៉ាងសកម្មក្នុងការប្រយុទ្ធប្រឆាំងនឹងជំងឺវីរុស ការចាក់វ៉ាក់សាំងប្រភេទណាក៏ដោយសុទ្ធតែជាបញ្ហាបច្ចេកទេសទាំងស្រុង មិនគួរយកវាធ្វើជាឈ្នាន់នៃនយោបាយឡើយ»។

 នៅក្នុងកិច្ចសម្ភាសន៍ជាមួយទូរទស្សន៍ប៊ីធីវីនេះដែរ លោកទូតក៏បានលើកឡើងផងដែរថា ក្រោយពីកម្ពុជាមានការផ្ទុះឡើងនូវជំងឺវីរុសកូវីដ-១៩មក រដ្ឋាភិបាលចិន និងកងទ័ពរំដោះប្រជាជនចិន បានចាត់បញ្ជូនក្រុមអ្នកជំនាញវេជ្ជសាស្រ្តមកកាន់ប្រទេសកម្ពុជាដែលជាប្រទេសដំបូងគេក្នុងតំបន់ និងនៅលើពិភពលោក និងបានផ្តល់ជំនួយជាសម្ភារទប់ស្កាត់នឹងវីរុសយ៉ាងច្រើនផងដែរ។ ក្រោយពីវ៉ាក់សាំងចិនមានលក្ខខណ្ឌគ្រប់គ្រាន់ក្នុងការប្រើប្រាស់នៅលើទីផ្សារ ភាគីចិនបានផ្តល់ជំនួយជាវ៉ាក់សាំងមុនគេមកកាន់ប្រទេសកម្ពុជា។ នេះគឺជាអត្ថន័យនៃមិត្តភាពដែកថែបរវាងប្រទេសទាំងពីរ និងសហគមន៍ជោគវាសនារួមគ្នានោះ។

 សូមបញ្ជាក់ថាកាលពីថ្ងៃទី៧ ខែកុម្ភៈ វ៉ាក់សាំងដែលជាជំនួយជំហានដំបូងរបស់ចិនចំនួន ៦០ម៉ឺនដូស ត្រូវបានដឹកជញ្ជូនមកកាន់រាជធានីភ្នំពេញ ខណៈជំហានទី២​ចំនួន ៧០ម៉ឺនដូស ត្រូវបានដឹកជញ្ជូនមកដល់រាជធានីភ្នំពេញកាលពីថ្ងៃទី៣១ ខែមីនាកន្លងទៅផងដែរ ហើយប្រទេសចិន នឹងបន្តផ្តល់ជំនួយឥតសំណងជាវ៉ាក់សាំងដល់ប្រទេសកម្ពុជានាពេលខាងមុខនេះទៀតផងដែរ ដើម្បីជួយដល់ប្រជាជនកម្ពុជាឲ្យរួចផុតពីការបន្តឆ្លងនូវមេរោគដ៏កាចសហាវមួយនេះទៀត ដែលរហូតមកដល់បច្ចុប្បន្ននេះមានប្រជាជនកម្ពុជា ក៏ដូចជាឥស្សរជន កងកម្លាំងប្រដាប់អាវុធ មន្រ្តីរាជកា ធ្វើការចាក់វ៉ាក់សំាងចិន និងវ៉ាក់សាំងដែលជាជំនួយរបស់អង្គការសុខភាពពិភពលោកជាបន្តបន្ទាប់បានចំនួនជាងបួនសែននាក់ហើយនោះ៕​ អត្ថបទ៖ បាន ចក