​ភ្នំពេញ៖ ក្រសួងការងារ និងបណ្តុះបណ្តាលវិជ្ជាជីវៈ បានបញ្ជាក់ថា ក្រសួង នឹងដោះស្រាយវិវាទ​ប្រាក់ឈ្នួល និងប្រាក់អត្ថប្រយោជន៍ផ្សេងទៀតជូនកម្មករនិយោជិតរោងចក្រ ​ឃែនធើរេន អឺភែរឹល ខេមបូឌា Canteran Apparel (Cambodia) Co Ltd ឱ្យចប់ជាស្ថាបពរនៅសប្តាហ៍ក្រោយ។

ក្នុងសេចក្តីជូនដំណឹងក្រសួងការងារ បញ្ជាក់ថា នឹងដោះស្រាយជូនកម្មករនិយោជិតចំនួន ៣ចំណុច រួមមាន៖ ១.ប្រាក់ឈ្នួលខែចុងក្រោយដែលមិនទាន់បានបើក ២.ប្រាក់បំណាច់ជួសការឈប់សម្រាកប្រចាំឆ្នាំដែលនៅសល់ និង៣.ប្រាក់បំណាច់អតីតភាពការងារថ្មីក្នុងឆ្នាំ និងប្រាក់រំលឹកប្រាក់បំណាច់អតីតភាពការងារ​ដែលមានមុនឆ្នាំ២០១៩។

ចំណាត់ការរបស់ក្រសួងការងារនេះ ឡើងបន្ទាប់ពី ប្រមុខរាជរដ្ឋាភិបាល ​បានជំរុញ ឯកឧត្តម អ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ ត្រូវដោះស្រាយឱ្យមានប្រសិទ្ធភាព ចំពោះបញ្ហា របស់របស់កម្មករកម្មការិនីដែលរងការរំលោភបំពាន និងវិវាទការងារ។

ពាក់ព័ន្ធនឹងការដោះស្រាយខាងលើនេះ ក្រុមកម្មករ កម្មការិនីដែលរងគ្រោះ បានសម្តែង​ការអរគុណ​ជូនសម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា ដែលផ្តល់ដំណោះស្រាយ​ជូនពួកគាត់ និងគិតគូរ​យក​ចិត្តទុកដាក់ពីការជួបលំបាកប្រមាណ ៣ខែមកនេះ ក្រោយថៅកែរោងចក្រមិន​ទទួល​ខុសត្រូវ បើទោះបីជាមានការអន្តរាគមន៍នានា​ពីអាជ្ញាធរពាក់ព័ន្ធយ៉ាងណាក៏ដោយ។

ទន្ទឹមនឹងការសាទរចំពោះដំណោះស្រាយរបស់ក្រសួងលើករណី ​វិវាទកម្មករកម្មការិនី នៅ​រោងចក្រ​ខាងលើនេះ លោក ប៉ាវ ស៊ីណា ប្រធានសម្ព័ន្ធសហជីពចលនាកម្មករកម្ពុជា ​យល់ឃើញថា មន្ត្រីជំនាញ​ត្រូវបង្កើនការយកចិត្តទុកដាក់ក្នុងការដោះស្រាយ​បញ្ហាជូនដល់​កម្មករនិយោជិត​ឲ្យបានលឿន ដោយមិនត្រូវពន្យារពេលដែលរឹតតែនាំឱ្យមានផលលំ​បាកចំពោះកម្មករ​ទៀតនោះទេ។

សូមបញ្ជាក់ថា កម្មករ កម្មការិនី ចំនួន៣២០នាក់ បម្រើការងារនៅរោងចក្រ ​ឃែនធើរេន អីភែរឹល ខេមបូឌា ​ស្ថិតនៅភូមិត្រពាងថ្លឹង៣ ​សង្កាត់ចោមចៅទី១ ខណ្ឌពោធិ៍សែនជ័យ​ រាជធានី មានវិវាទជាមួយថៅកែរោងចក្រ​ លើការបើកប្រាក់ឈ្នួល ​ដោយសារក្រុមហ៊ុនក្ស័យធន ហើយថៅ​កែរត់ចោលកម្មករ៕ អត្ថបទ៖ ឈិត បូរ៉ាវី