កូសូវ៉ូ៖ កងទ័ពអង្គការណាតូត្រូវបានដាក់ពង្រាយនៅតាមផ្លូវធំៗ នៅតំបន់ភាគខាងជើងប្រទេសកូសូវ៉ូកាលពីថ្ងៃសុក្រ ខណៈភាពតានតឹងបានកើនឡើងបន្ទាប់ពីការដួលរលំ នៃកិច្ចចរចានយោបាយរវាងមេដឹកនាំប្រទេសស៊ែប៊ី និងកូសូវ៉ូនៅទីក្រុងប្រ៊ុចសែល ប្រទេសប៊ែលហ្ស៊ីក។
ប្រធានាធិបតីស៊ែប៊ីលោក Aleksandar Vucic និងនាយករដ្ឋមន្ត្រីកូសូវ៉ូលោក Albin Kurti កាលពីថ្ងៃព្រហស្បតិ៍មិនបានឈានដល់កិច្ចព្រមព្រៀងស្តីពីបញ្ហាព្រំដែនជាយូរមកហើយ និងបញ្ហាការទទួលស្គាល់ទៅវិញទៅមក ដែលបានបង្កើនភាពតានតឹងនៅក្នុងតំបន់បាល់កង់ និងបានបន្ថែមអស្ថិរភាពរបស់អឺរ៉ុបក្នុងអំឡុងពេលសង្គ្រាមនៅអ៊ុយក្រែន។ លោក Josep Borrell តំណាងជាន់ខ្ពស់ទទួលបន្ទុកកិច្ចការបរទេសរបស់សហភាពអឺរ៉ុប បានប្រកាសបន្ទាប់ពីកិច្ចប្រជុំថា ថ្ងៃនេះពុំមានកិច្ចព្រមព្រៀងទេ។ ពលរដ្ឋជាច្រើនភ័យខ្លាចថា ការបរាជ័យនៃកិច្ចពិភាក្សានយោបាយទាំងនេះ ដែលមានគោលបំណងដោះស្រាយភាពជាប់គាំងរយៈពេល 20ឆ្នាំកន្លងមកនេះរវាងប្រទេសស៊ែប៊ី និងកូសូវ៉ូ អាចនាំឱ្យមានជម្លោះក្នុងតំបន់រវាងកូសូវ៉ូ ស៊ែប៊ី និងអាល់បានី។ កូសូវ៉ូគឺជាអតីតខេត្តមួយរបស់ប្រទេសស៊ែប៊ី ដែលបានបដិសេធមិនទទួលស្គាល់ការប្រកាសឯករាជ្យរបស់ប្រទេសនេះក្នុងឆ្នាំ2008 ។
ភាពតានតឹងរវាងប្រទេសស៊ែប៊ី និងកូសូវ៉ូបានកើនឡើងកាលពីចុងខែមុន នៅពេលដែលរដ្ឋាភិបាលរបស់លោក Kurti បានប្រកាសថា ឯកសារអត្តសញ្ញាណ និងស្លាកលេខរថយន្តរបស់ប្រទេសស៊ែប៊ី នឹងលែងមានសុពលភាពនៅក្នុងទឹកដីរបស់កូសូវ៉ូទៀតហើយ។ ប្រទេសស៊ែប៊ីបាននឹងកំពុងអនុវត្តវិធានការដូចគ្នា សម្រាប់ពលរដ្ឋកូសូវ៉ូដែលឆ្លងចូលប្រទេសស៊ែប៊ីរយៈពេល 10ឆ្នាំមកហើយដោយនិយាយថា ប្រសិនបើខ្លួនទទួលស្គាល់ស្លាកលេខ និងឯកសាររបស់កូសូវ៉ូនោះមានន័យថា ខ្លួនទទួលស្គាល់កូសូវ៉ូជាដែនដីឯករាជ្យ។ រួមជាមួយប្រទេសស៊ែប៊ី សម្ព័ន្ធមិត្តរុស្ស៊ី និងចិនមិនទទួលស្គាល់ឯករាជ្យភាពរបស់កូសូវ៉ូដែលត្រូវបានគាំទ្រដោយសហរដ្ឋអាមេរិក និងរដ្ឋប្រទេសលោកខាងលិចភាគច្រើនផ្សេងទៀត។ មានការព្រួយបារម្ភនៅក្នុងប្រទេសលោកខាងលិចថា រុស្ស៊ីអាចជំរុញទឹកចិត្តប្រទេសស៊ែប៊ីឱ្យធ្វើអន្តរាគមន៍ប្រដាប់អាវុធនៅភាគខាងជើងប្រទេសកូសូវ៉ូ ដែលនឹងធ្វើឱ្យមានអស្ថិរភាពបន្ថែមទៀតនៅតំបន់បាល់កង់ និងផ្លាស់ប្តូរការយកចិត្តទុកដាក់មួយចំនួនពីសង្គ្រាមរបស់រុស្ស៊ីនៅអ៊ុយក្រែន៕
អត្ថបទ៖ ប៊ុនថន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
