ភ្នំពេញ៖ ក្នុងរយៈពេល៥ឆ្នាំ គឺចាប់ពីឆ្នាំ២០១៩ ដល់ឆ្នាំ២០២២ រាជរដ្ឋាភិបាល បានសាងសង់​សាលា​រៀន​នៅទូទាំងប្រទេសបានចំនួនជាង ៤០០ខ្នង ​ដើម្បីបំពេញតម្រូវការ នៃការកើនឡើង​ចំនួន​សិស្សជាបន្តបន្ទាប់ជារៀងរាល់ឆ្នាំ។

ក្នុងរបាយការណ៍សម្រេចបានរយៈពេល៥ឆ្នាំ របស់ក្រសួងអប់រំ យុវជន ​និងកីឡា បានឲ្យដឹងថា គិតត្រឹមឆ្នាំសិក្សា២០២១-២០២២​ កម្ពុជាមានសាលាមត្តេយ្យ ​និងសាលារៀនចំណេះដឹងទូទៅ ទាំង​សាលាសាធារណៈ និងសាលាឯកជនមានចំនួនជាង​ ១៨ ៤០០ ក្នុងនោះមត្តេយ្យសិក្សា​សហគមន៍​ចំនួន ជាង៣០០០កន្លែង សាលារៀនសាធារណៈជាង ​១៣ ៦០០ ​និងសាលារៀនឯកជនចំនួន ១ ៦៦៦ ។

របាយការណ៍ បន្តថា នៅឆ្នាំសិក្សាដដែលនេះ មានសិស្សសរុបចំនួនជាង ៣ ៥៨៦ ០០០នាក់ (សិស្សស្រីជាង ១ ៨០០ ០០០នាក់) ។ ​គ្រឹះស្ថានឧត្តមសិក្សានៅទូទាំងប្រទេស​មានចំនួន ១៣០ ក្នុងនោះគ្រឹះស្ថានឧត្តមសិក្សារដ្ឋចំនួន៤៨ ​និងឯកជន៨២ ហើយនិស្សិតកំពុងសិក្សានៅថ្នាក់​ឧត្តម​សិក្សាមានចំនួនជិត ​២០ម៉ឺននាក់ ក្នុងនោះមាន​និស្សិត​បរទេស​អាហាររូបករណ៍ចំនួន ​១៥៩នាក់ ។

ក្រសួងអប់រំ ​បានបង្ហាញទៀតថា ​ចាប់ពីឆ្នាំ២០១៩​ ដល់២០២២ ក្រសួង បានសាងសង់​អគារសិក្សា​បាន​ចំនួន៤២៧ខ្នង ​បានជួសជុលអគារសិក្សាបានចំនួនជិត៤ពាន់ខ្នង រួមទាំងបានសាងសង់នូវ​ហេដ្ឋា​រចនាសម្ព័ន្ធ នៅតាមសាលាគរុកោសល្យ ​ក៏ដូចជាបំពាក់នូវសម្ភារបច្ចេកទេសជាច្រើនទៀត នៅ​តាមថ្នាក់រៀន ។

ក្រៅពីនោះ ក្រសួងអប់រំ ​បានសាងសង់ផ្ទះសំណាក់គ្រូ ផ្ទះសំណាក់សិស្ស ​បង្គន់អនាម័យ អណ្ដូងទឹក ផ្លូវបេតុង​ របងសាលារៀន​ តារាងបាល់បោះ​ តារាងបាល់ទាត់ និងទីលាន​កីឡាផ្សេងៗ​ជាច្រើន ។

គិតត្រឹមខែមេសា ឆ្នាំ២០២២ សម្ដេចតេជោ ហ៊ុន សែន នាយករដ្ឋមន្ត្រី ​នៃព្រះរាជាណាចក្រកម្ពុជា និង​សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ​បានផ្ដល់នូវអំណោយសំណង់អគារសិក្សាបានចំនួន ៤ ៤៨៧ខ្នង ស្មើនឹង ២៨ ៨១០បន្ទប់ ៕អត្ថបទ បាន សុខរិទ្ធិ