ភ្នំពេញ៖ ក្នុងជំនួបជាមួយសម្តេចអគ្គមហាពញាចក្រី ហេង សំរិន ,លោក អាប់ឌូឡា សាហ៊ីដ ប្រធានរដ្ឋសភាកម្ពុជា ប្រធានមហាសន្និបាតអង្គការសហប្រជាជាតិលើកទី៧៦ បានកោតសរសើរកម្ពុជាចំពោះការអភិវឌ្ឍខ្លួនយ៉ាងឆាប់រហ័ស។

ក្នុងពេលបំពេញទស្សនកិច្ច និងអញ្ជើញជួបជាមួយថ្នាក់ដឹកនាំសំខាន់ៗរបស់កម្ពុជា នៅថ្ងៃទី២២ ខែសីហា ឆ្នាំ២០២២ សម្តេចអគ្គមហាពញាចក្រី ហេង សំរិន ប្រធានរដ្ឋសភា នៃព្រះរាជាណាចក្រ​កម្ពជា បានអញ្ជើញស្វាគមន៍ និងជួបពិភាក្សាការងារជាមួយ លោក អាប់ឌូឡា សាហ៊ីដ (Abdulla SHAHID) ប្រធានមហាសន្និបាតអង្គការសហប្រជាជាតិលើកទី៧៦ និងជារដ្ឋមន្ត្រីការបរទេស​នៃសាធារណរដ្ឋម៉ាល់ឌីវ នៅវិមានរដ្ឋសភា។

នាឱកាសនោះ លោក អាប់ឌូឡា សាហ៊ីដ បានសម្តែងសេចក្តីសោមនស្សរីករាយដែល​បាន​ទទួល​ការស្វាគមន៍នៃដំណើរទស្សនកិច្ចរបស់ឯកឧត្តម មកកាន់កម្ពុជា ​ក្នុងតួនាទីជាប្រធាន​មហា​សន្និបាត​អង្គការសហប្រជាជាតិលើកទី៧៦ ។

លោក មានប្រសាសន៍ថា បន្ទាប់ពីបានមកដល់កម្ពុជា និងបានជួបថ្នាក់ដឹកនាំសំខាន់ៗ បង្ហាញថា អតីតកាលកម្ពុជា ពោរពេញដោយការលំបាក ទំរាំអាចរំដោះប្រទេស និងមានការអភិវឌ្ឍ​ដល់​សព្វថ្ងៃ។

លោកបានកោតសរសើរកម្ពុជាអំពីការអភិវឌ្ឍយ៉ាងឆាប់ ប្រែក្លាយពីប្រទេសអភិវឌ្ឍដែលទទួលរង​សង្គ្រាមរាំរ៉ៃ ​រហូតធ្វើឱ្យប្រទេសពីមានការអភិវឌ្ឍក្នុងកម្រិតតិចតួចទៅ​ជាប្រទេស​អភិវឌ្ឍ​ក្នុងកម្រិតមធ្យម។

ក្នុងជំនួបនោះ លោក អាប់ឌូឡា សាហ៊ី បានបញ្ជាក់ថា ក្នុងដំណើរទស្សនកិច្ចនៅកម្ពុជា ក្នុងតួនាទី​ជាប្រធាន​មហាសន្និបាតអង្គការ​សហប្រជាជាតិនាពេលនេះ ក្នុងគោលបំណងដើម្បីឯកភាព​កិច្ច​ព្រមព្រៀងនានា ដែលទាមទារឱ្យមានកិច្ចសហការពីរដ្ឋសភាកម្ពុជាតាមរយៈអន្តរសភា ពិភពលោក (IPU)។ លោក បន្តថា ដំណើរទស្សនកិច្ចនេះក៏មានបំណងឆ្ពោះទៅរកគោលដៅសហសវត្សន៍ SDG ដែល​ចាំបាច់ត្រូវមានកិច្ចសហប្រតិបត្តិការជាមួយរដ្ឋសភា។

ក្រៅពីនេះ លោកប្រធានមហាសន្និបាតអង្គការសហប្រជាជាតិលើកទី៧៦ បាន​ស្ញប់ស្ញែង​ពី​តួនាទី​របស់កម្ពុជា​ ក្នុងការបញ្ជូនកងរក្សាសន្តិភាពទៅជួយសកម្មភាពដោះមីន​តាមរយៈឆ័ត្រអង្គការ​សហប្រជាជាតិ ​ដែលនេះបង្ហាញអំពីគំរូភាព​ដល់បណ្តាប្រទេសដ៏ទៃផ្សេងទៀត។

ជាការ​ឆ្លើយតប សម្តេចប្រធានរដ្ឋសភា ​ បានថ្លែងអំណរគុណអង្គការសហប្រជាតិ ដែលតែង​គាំទ្រ​កម្ពុជា ចាប់តាំងពីការបង្កើតរដ្ឋាភិបាលក្នុងអាណត្តិទី២ ។

សម្តេច បានបញ្ជាក់ថា រដ្ឋសភាកម្ពុជា ​បានប្រកាន់ខ្ជាប់គោលការណ៍ពហុភាគីនិយម ដោយផ្អែក​លើច្បាប់ដែលមានអង្គការសហប្រជាជាតិជាស្នូល ក្នុងការពង្រឹងសាមគ្គីភាពអន្តរជាតិ៕

អត្ថបទ សេក ឧត្តម