បាល់ទាត់៖ ​ទោះបី​សង្គ្រាម​មិនទាន់​បញ្ចប់​ក៏ដោយ អ៊ុយ​ក្រែ​ន​បានចាប់ផ្តើម​រដូវ​កាល​ថ្មី Ukraine Premier League ឆ្នាំ២០២២ របស់ខ្លួន ប៉ុន្តែ​អ្នកគាំទ្រ​មិនត្រូវ​បានអនុញ្ញាត​ឱ្យចូល​ទស្សនា​ឡើយ​។

​ការប្រកួត​បើកឆាក​នៅ​ពហុ​កីឡដ្ឋាន​ជាតិ​អូឡាំពិក​ទីក្រុង Kyiv មានការ​ប្រកួត​រវាង​ក្រុម​២ មកពី​ភាគ​ខាងកើត​ប្រទេស​ដែល​ហែកហួរ​ដោយ​សង្គ្រាម​គឺ Shakhtar Donetsk និង Metalist 1925 នៅក្នុង​កីឡដ្ឋាន​បិទទ្វា​ដែលមាន​ចំនុះ​កៅអី​ទស្សនា 65,000កៅអីដែល​ការប្រកួត​បានបញ្ចប់​ក្នុង​លទ្ធផល 0-0​។​ ​អ៊ុយ​ក្រែ​ន​នៅតែ​ស្ថិតក្រោម​ច្បាប់អាជ្ញាសឹក ហើយ​ការជួបជុំ​ជា​សាធារណៈ​ដ៏​ធំ​ត្រូវបាន​ហាមឃាត់​ក្នុង​រដ្ឋធានី​ មុន​ថ្ងៃបុណ្យ​ឯករាជ្យ​ជាតិ​នៅ​ថ្ងៃ​ពុធ​នេះ ដោយសារ​ការភ័យខ្លាច​នៃ​ការវាយប្រហារ​ដោយ​គ្រាប់​រ៉ុក្កែត​របស់​រុស្ស៊ី​ដែល​អាច​កើតមាន​។​

​មន្ត្រីនគរបាល​មាន​សមត្ថកិច្ច​បាន​ឈរ​យាម​នៅ​គ្រប់​ច្រក​នៃ​កីឡដ្ឋាន បន្ទាប់ពី​កីឡដ្ឋាន​ត្រូវបាន​បិទ​កាលពី​ប្រាំ​មួយខែ​មុន ប៉ុន្តែ​គ្មាន​អ្នកគាំទ្រ​ណា​បង្ហាញខ្លួន​នៅក្បែរ​កីឡដ្ឋាន​ឡើយ​។​ ​កីឡាករ​មកពី​ក្រុម​ទាំង២ ​ដែលមាន​ទង់ជាតិ​អ៊ុយ​ក្រែ​ន​ពណ៌​ខៀវ និង​លឿង​នៅលើ​ស្មា​របស់​ពួកគេបាន​រក្សា​ភាព​ស្ងាត់​មួយ​នាទី ដើម្បី​ឧទ្ទិស​ដល់​វិញ្ញាណក្ខន្ធ​អ្នក​ដែល​បាន​ស្លាប់​ដោយសារ​សង្គ្រាម ខណៈ​ឈ្មោះ​អ្នក​បាត់​បង់ជីវិត​ត្រូវបាន​បង្ហាញ​នៅលើ​អេក្រង់​យក្ស​ក្នុង​កីឡដ្ឋាន​៕

​អត្ថបទ​៖​នាង សុភា​វុ​ធ