សៀមរាប៖ ប្រជាពលរដ្ឋប្រមាណ ៧០០គ្រួសារ នៅភូមិទក្សិណ និងភូមិត្រពាំងសេស សង្កាត់គោកចក ក្រុងសៀមរាប បានចូលរួមចាប់ឆ្នោតទទួលយកដី ដើម្បីដូរលំនៅឋានថ្មី​ចេញ​ពីតំបន់រណីយដ្ឋានអង្គរ ដែលពិធីចាប់ឆ្នោត បានធ្វើឡើងនៅសាលាខេត្ដសៀមរាប នៅព្រឹកថ្ងៃទី២៥ ខែសីហានេះ។

ប្រជាពលរដ្ឋបានលើកឡើងថា ការសាងសង់លំនៅឋានរបស់ពួកគេ នាពេលកន្លងមក នៅតំបន់ ឧទ្យានអង្គរនេះ ពុំមានច្បាប់អនុញ្ញាតទេ បើទោះជាសង់យូរហើយក្ដី ប៉ុន្ដែដើម្បីចូលរួមលើកតម្លៃ នៃរមណីយដ្ឋានអង្គរ ពួកគេព្រមស្ម័គ្រចិត្ដប្ដូរទីលំនៅថ្មី ទៅរស់នៅភូមិរុនតាឯក ឃុំរុនតាឯក ស្រុកបន្ទាយស្រីដែលមានចម្ងាយប្រមាណ ៣០គីឡូម៉ែត្រ ពីទីរួមខេត្ដសៀមរាប។

ពួកគេ បានបញ្ជាក់ថា ទំហំដី ដែលរដ្ឋផ្ដល់ឱ្យ ២០គុណនឹង៣០ម៉ែត្រនោះ ​សមល្មមនឹងទទួលយក បាន ប៉ុន្ដែពួកគេស្នើឱ្យមានការអភិវឌ្ឍសាលារៀន ​មន្ទីរពេទ្យ ទីវត្ដអារាម និងមានផ្លូវថ្នល់ប្រកបដោយគុណភាព។

លោក ហាយ យុង តំណាងក្រុមការងារតម្រង់ទិសនៃក្រុមការងារវាស់វែងដីក្នុងតំបន់អង្គរ បាន ឱ្យដឹងថា ជំហានដំបូងនេះ​ ពលរដ្ឋដែលយល់ព្រម ​អាចនឹងចាប់ផ្ដើមរុះរើលំនៅឋានពួកគេនៅ​ចុងឆ្នាំនេះ ប៉ុន្ដែមានប្រជាពលរដ្ឋខ្លះ ​បានរុះរើហើយដែរ។ អាជ្ញាធរនឹងឱ្យពួកគេទៅពិនិត្យក្បាលដី ក្រោយពីការចាប់ឆ្នោតរួចបួនប្រាំថ្ងៃ ខណៈក្រុមការងារ ​កំពុងឈូសឆាយរៀបចំប្ដង់ដីស្របច្បាប់។

លោកបានបញ្ជាក់ថា ទីតំាងដីថ្មីនៅរុនតាឯក ស្រុកបន្ទាយស្រី​ និងមានការអភិវឌ្ឍគ្រប់វិស័យ រួម មានសាលារៀន មន្ទីរពេទ្យ ទីវត្ដអារាម និងមានផ្លូវថ្នល់ខ្វាត់ខ្វែងផងដែរ ៕

អត្ថបទ៖ ឈិត សាវី