ភ្នំពេញ៖ អនុប្រធានទី១ រដ្ឋសភានៃព្រះរាជាណាចក្រកម្ពុជា ឯកឧត្តមកិត្តិសេដ្ឋាបណ្ឌិត ជាម យៀប បានបញ្ជាក់ចំពោះមុខ ឯកឧត្តម វ៉ង ឈិន (Wang Chen) អនុប្រធានគណៈកម្មាធិការអចិន្ត្រៃយ៍ នៃសភាប្រជាជនចិននៃសាធារណរដ្ឋប្រជាមានិតចិន រដ្ឋសភាកម្ពុជានូវប្រកាន់ខ្ជាប់យ៉ាងម៉ឺងម៉ាត់ នូវគោលការណ៍ចិនតែមួយ និងគោលនយោបាយចិនតែមួយ ។

នៅក្នុងកិច្ចជំនួបតាមរយៈប្រព័ន្ធសិប្បនិម្មិត នាព្រឹកថ្ងៃទី២៦ ខែសីហា ឆ្នាំ២០២២នេះ ឯកឧត្តម ជាម យៀប បានលើកឡើងអំពីការប្រកាន់ខ្ជាប់យ៉ាងម៉ឺងម៉ាត់នូវ “គោលការណ៍ចិន តែមួយ” និង “ គោលនយោបាយចិនតែមួយ។

រដ្ឋាភិបាល និងប្រជាជននៃប្រទេសទំាងពីរ តែងតែរួមសុខរួមទុក្ខជាមួយគ្នា ក្នុងគ្រាដ៏សែនលំបាក នៃការរីករាលដាលជំងឺកូវីដ-១៩ ​ដែល​មហាមិត្តចិនបានផ្តល់ជំនួយវ៉ាក់សាំងប្រឆាំងនឹងវីរុសកូវីដ-១៩ ចំនួន៤២លានដូស ដល់កម្ពុជាហើយបានក្លាយជាប្រទេសដែលផ្គត់ផ្គង់​វ៉ាក់សាំងដ៏សំខាន់បំផុត និង​មាន​សុវត្ថិភាពបំផុតនៅកម្ពុជានោះ។

នៅក្នុងកិច្ចប្រជុំនោះដែរឯកឧត្តម ជាម យៀប ក៏បានថ្លែងអំណរគុណយ៉ាងជ្រាលជ្រៅបំផុតចំពោះ បក្សកម្មុយនីស្តចិន ​និងប្រជាជនចិន ​ដែលបានយកចិត្តទុកដាក់ថែទាំព្រះរាជសុខភាព ព្រះមហាក្សត្រ ព្រះករុណា ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា និងសម្តេចព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរ និងតែងតែជួយឧបត្ថម្ភគាំទ្រដល់ប្រជាជនកម្ពុជា តាំងពីអតីតកាល រហូតដល់បច្ចុប្បន្ននេះផងដែរ។

ថ្លែងនៅក្នុងកិច្ចជំនួបនោះដែរ ឯកឧត្តម វ៉ង ឈិន ក៏បានបានមានប្រសាសន៍លើកឡើងពីចំណង​មិត្តភាព​ដ៏ល្អប្រពៃ​ដែលត្រូវបានកសាងឡើង ​តាំងពីថ្នាក់ដឹកនាំជំនាន់មុន និងបន្តពង្រឹងរហូតមក​ដល់​ថ្នាក់ដឹកនាំបច្ចុប្បន្ន ​នៃប្រទេសទាំងពីរកម្ពុជា-ចិន និងថាភាគីទាំងពីរអាចជំរុញការអនុវត្ត​ផែនការ​ខ្សែក្រវ៉ាត់ ​និងផ្លូវ ការធ្វើទំនើបកម្ម ​សេដ្ឋកិច្ចឌីជីថល ​ការផ្តល់វ៉ាក់សាំង ហើយចិននឹងផ្ដល់​បទ​ពិសោធន៍ក្នុងការផលិតវ៉ាក់សាំងដល់ភាគីកម្ពុជា។

ឯកឧត្តមអនុប្រធានគណៈកម្មាធិការអចិន្ត្រៃយ៍នៃសភាប្រជាជនចិន នៃសាធារណរដ្ឋ​ប្រជាមានិត​ចិន បានលើកឡើងដែរថា​ ប្រទេសទាំងពីរកម្ពុជា-ចិន ពិតជាសហគមន៍ដែល​មានជោគវាសនារួម។ ឯកឧត្តមក៏បានបង្ហាញនូវការពេញចិត្តចំពោះកម្ពុជា ​ដែលបានប្រកាន់ជំហរមុតមាំ គាំទ្រ​ប្រទេសចិន​នៅក្នុងការរក្សាបូរណភាពដែនដីរបស់ខ្លួនផងដែរ។

ឯកឧត្តម វ៉ង ឈិន បានមានប្រសាសន៍ទៀតថា កម្ពុជាបានបើកចំហរកាន់តែទូលំទូលាយក្នុង​ការអភិវឌ្ឍ​សេដ្ឋកិច្ច ​ការផ្លាស់ប្តូរបទពិសោធន៍ ​ដើម្បីសម្រេចបានទំនើបកម្ម ផលិតកម្ម​នៃ​ប្រទេសរបស់ខ្លួន​ ស្របតាមចក្ខុវិស័យរបស់សម្តេចតេជោនាយករដ្ឋមន្ត្រី ក្នុងការនាំកម្ពុជា​អោយ​ឆ្ពោះទៅជាប្រទេសចំណូលមធ្យមឆ្នាំ២០៣០ និងចំណូលខ្ពស់ឆ្នាំ២០៥០៕ អត្ថបទ៖ បាន ចក់