ប៉ូឡូញ៖ ប្រទេសប៉ូឡូញបានចុះហត្ថលេខាលើកិច្ចព្រមព្រៀង ជាមួយប្រទេសកូរ៉េខាងត្បូងកាលពីថ្ងៃសុក្រដើម្បីទិញរថក្រោះ កាំភ្លើង និងគ្រាប់រំសេវដែលមានតម្លៃ ៥.៨ពាន់លានដុល្លារ ខណៈប្រទេសនៅអឺរ៉ុបមួយនេះបង្កើនសមត្ថភាពការពារ និងទប់ស្កាត់របស់ខ្លួនក្នុងការប្រឈមមុខជាមួយសង្គ្រាមរបស់រុស្ស៊ីនៅអ៊ុយក្រែន។
ឧបនាយករដ្ឋមន្ត្រីប៉ូឡូញលោក Mariusz Blaszczak ជារដ្ឋមន្ត្រីក្រសួងការពារជាតិបានចុះហត្ថលេខាលើកិច្ចសន្យាដើម្បីបញ្ជាក់ និងបានប្រគល់កិច្ចសន្យាទៅឱ្យភាគីកូរ៉េខាងត្បូង នៅមូលដ្ឋានយោធាមួយកន្លែងភាគខាងជើងទីក្រុង Morag ប្រទេសប៉ូឡូញ។ លោក Blaszczak បាននិយាយថា យើងមើលឃើញអ្វីដែលកំពុងកើតឡើងនៅក្នុងប្រទេសអ៊ុយក្រែន យើងមានការសន្និដ្ឋានបាន ហើយយើងដឹងថា វាមានសារៈសំខាន់សម្រាប់សន្តិសុខក្នុងការអភិវឌ្ឍកងកម្លាំងជើងគោក អភិវឌ្ឍកងកម្លាំងរថពាសដែក និងអភិវឌ្ឍកងកម្លាំងកាំភ្លើងធំ។
នៅឆ្នាំនេះ រថក្រោះ K2 ចំនួន ១០គ្រឿងដំបូងនឹងត្រូវបញ្ជូនមកទីនេះមកកាន់ទីក្រុង Morag នៅមូលដ្ឋានយោធា។ រដ្ឋមន្ត្រីប្រទេសកូរ៉េខាងត្បូងបានបញ្ជាក់ពីទំនាក់ទំនងល្អ និងទំនុកចិត្តដែលប្រទេសទាំងពីរបានអភិវឌ្ឍទំនាក់ទំនងពាណិជ្ជកម្ម សង្គម និងវប្បធម៌។ ចូលរួមនៅក្នុងពិធីនេះក៏មានប្រធានរោងចក្រប្រទេសកូរ៉េច្រើននាក់ ដែលជាប់ពាក់ព័ន្ធក្នុងកិច្ចសន្យាព្រមទាំងក្រុមយោធាបញ្ជារថក្រោះប្រទេសប៉ូឡូញ ដែលត្រូវបានគេរំពឹងថានឹងទៅហ្វឹកហាត់នៅប្រទេសកូរ៉េខាងត្បូងក្នុងខែតុលា៕
អត្ថបទ៖ ប៊ុនថន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
