ភ្នំពេញ៖ លោកឧត្តមសេនីយ៍ឯក ហ៊ុន ម៉ាណែត អគ្គមេបញ្ជការរងនៃកងយោធពលខេមរភូមិន្ទ និងជាមេបញ្ជាការកងទ័ពជើងគោក តាមរយៈសៀវភៅ​«កូនប្រុសច្បងនាយករដ្ឋមន្រ្តី​ដំណើរ​ឆ្ពោះទៅ​បន្តវេន-ហ៊ុន ម៉ាណែត» បានលើកឡើងថា ពុកម្តាយរបស់លោកជានិច្ចកាលតែងតែផ្តាំផ្ញើកុំឲ្យ​លោក​តាំង​ខ្លួនជាកូនលោកធំ និងកូននាយករដ្ឋមន្រ្តី ដោយត្រូវប្រកាន់ថា ខ្លួនជាចៅកសិករ ព្រោះថា​ពូជពង្ស​វង្សត្រកូល​របស់លោកមិនមែនកើតចេញពីវណ្ណៈអភិជននោះទេ។

នៅត្រង់ទំព័រទី២០នៃសៀវភៅ«កូនប្រុសច្បងនាយករដ្ឋមន្រ្តីដំណើរឆ្ពោះទៅបន្តវេន-ហ៊ុន ម៉ាណែត» ដែល​បានរៀបរៀង និងនិពន្ធដោយអនុរដ្ឋលេខាធិការក្រសួងព័ត៌មាន ឯកឧត្តម ឆាយ សុផល លោក ហ៊ុន ម៉ាណែត បានលើកឡើងថា «ពុក និងម៉ែតែងផ្តាំថា កុំតាំងខ្លួនជាកូនលោកធំ កុំតាំង​ខ្លួនថា ជាកូននាយករដ្ឋមន្រ្តី ហើយកុំមានចរិត​ឆ្មើងឆ្មៃ តែត្រូវដាក់ខ្លួន ដោយតាំងខ្លួនថា ជាចៅ​កសិករ ព្រោះពូជពង្សវង្សត្រកូលរបស់យើង គឺមិនមែនកើតចេញពីវណ្ណៈអភិជនទេ។ ​ការរាប់មនុស្ស មិនត្រូវមើលលើគេមានទ្រព្យសម្បត្តិ ឬជាកូនលោកធំនោះឡើយ​ ព្រោះទ្រព្យសម្បត្តិ និងតួនាទីអាច​បាត់បង់​នៅពេលណាមួយ ប៉ុន្តែទឹកចិត្តល្អ និងការរាប់អានរបស់មនុស្សនៅយូរអង្វែង។ ពុកម៉ែតែងតែរម្លឹកថា កូនៗត្រូវខំរៀន កុំដើរលេងឥតប្រយោជន៍ ព្រោះចំណេះវិជ្ជាសំខាន់សម្រាប់​ខ្លួនឯង ​និងប្រទេសជាតិ»។

ទាក់ទងនឹងសៀវភៅនេះដែរសម្តេចតេជោ ហ៊ុន សែន នាយករដ្ឋមន្រ្តី ​ក៏​បានប្រាប់​អំពីអត្តចរិត របស់​លោក ហ៊ុន ម៉ាណែត ដល់អ្នកនិពន្ធផងដែរថា « ពូគិតថា ម៉ាណែត មានចរិតខុសពីពូខ្លះ នៅក្នុងភាព​ជាអ្នកដឹកនាំ ដែលគេមិនអាចមានភាព ​គេហៅថា របៀប​ដាច់ ណាត់​ ម៉ឺងម៉ាត់ ដូចពូទេ។ គេអាចនៅសង្កេត។ បច្ចុប្បន្ននេះ គេអាចនៅមានការ​គិតគូរ ហើយដែលអាចមានការអូសបន្លាយ មានការ​ពន្យារពេលលើការធ្វើការសម្រេចចិត្ត។ ប៉ុន្តែ​ចំណុច​ខ្លះ​ក៏​មាន​លក្ខណៈដូចពូ ​គឺរបៀបការ​វិភាគ​ វាយតម្លៃសភាពការណ៍ និងរបៀបនិយាយ។ ប៉ុន្តែរបៀបការធ្វើសេចក្ដីសម្រេច និងដាក់ចេញ​នូវបទបញ្ជា គឺយើងរង់ចាំមើល ម៉ាណែត ក្រោយពីក្លាយទៅជានាយករដ្ឋមន្ត្រី។ អាហ្នឹងគឺយើងនឹងពិនិត្យនៅពេលនោះ។ បើពេលនោះ គេមិនដាច់ណាត់ មិនរហ័សរហួនក្នុងការធ្វើ​សេចក្ដីសម្រេចចិត្ត គេនឹងអាចក្លាយទៅជា [អ្នកមាន] ចំណុចខ្សោយ»។

សម្តេចតេជោ បានប្រាប់អ្នកនិពន្ធទៀតថា៖ «ពូសង្កេតឃើញតាំងពីតូច ម៉ាណែត ជាបង​ដែលផ្ដល់ឱ្យប្អូនៗនូវការគោរព ហើយការគោរពនេះ មិនមែនដោយសារ ម៉ាណែត គឺជាបង ដោយធ្វើ​បាប​ប្អូនៗនោះទេ ក៏ប៉ុន្តែគឺចរិតរបស់ ម៉ាណែត ជាចរិតដែលធ្វើឱ្យប្អូនៗមានការគោរព។ បងប្អូនជីដូនមួយក៏មានការគោរព ដោយសារ ម៉ាណែត បានកាន់ចរិត ឫកពា ជាក្មេងដែលមាន​ចរិតលក្ខណៈ ដែលអាចថា ក្នុងចំណោមបងប្អូនទាំងអស់ ​ទោះបីគេមានអាយុច្រើនជាង ម៉ាណែត បន្តិចក៏ដោយ ក៏ប៉ុន្តែគេហាក់ដូចជាបានទទួលស្គាល់ ម៉ាណែត ថា ជាមេរបស់គេ នៅក្នុងចំណោម​ហ្នឹង។ រឿងនេះ វាដូចជាទទួលមរតកពីខ្ញុំ អ៊ីចឹង។ ទៅកន្លែងណាក៏ដោយ ក៏បងប្អូនតែងតែ​មានការ​ផ្តល់តម្លៃ។ ហ្នឹងគឺជាចំណុចល្អរបស់ ម៉ាណែត តាំងពីតូច ដែលធ្វើឱ្យប្អូនៗរបស់​គេគោរព​តាំងពីតូច រហូតមកដល់ពេលនេះ គឺនៅតែមានជាការគោរព…..គឺតាំងពីតូចរហូតដល់ធំ។ ហ្នឹងជាចំណុចល្អ»។

យ៉ាងណាក៏ដោយនៅក្នុងសៀវភៅ «កូនប្រុសច្បងនាយករដ្ឋមន្រ្តីដំណើរឆ្ពោះទៅបន្តវេន-ហ៊ុន ម៉ាណែត»នេះ លោកបានចាត់ទុកឪពុករបស់លោកថា «ជាជនគំរូ» របស់ខ្លួន ព្រោះថា «ពុកជា​មនុស្ស​ដែលបានឆ្លងកាត់តាំងពីជាកូនទាហានទៅជាអ្នកដឹកនាំកម្លាំងរំដោះជាតិ រហូតគាត់បាន​ក្លាយ​ជាអ្នក​ដឹកនាំកំពូលរបស់ប្រទេស។ នេះជាការខិតខំប្រឹងប្រែងរបស់គាត់»។

លោក ហ៊ុន ម៉ាណែត បានប្រាប់អ្នកនិពន្ធថា៖ «មាន៣ចំណុចសំខាន់ៗដែលខ្ញុំចេះចាំពីពុក គឺទី១. ត្រូវគិតគូរដល់ប្រជាជនជាធំ ដោយឈរខាងប្រជាជន និងគ្រប់ពេលវេលា។ ទី២. គិតពីប្រយោជន៍​ជាតិ​ជាធំ និងគ្រប់ពេល និងទី៣. ហ៊ានធ្វើហើយធ្វើឱ្យពិតប្រាកដ និងច្បាស់លាស់ ហើយហ៊ាន​ទទួលខុសត្រូវចំពោះការសម្រេចចិត្ត ​និងសកម្មភាពរបស់ខ្លួន។ ចំណែកម៉ែវិញ ក៏មិនខុសពីពុកដែរ គឺគាត់តែងតែប្រាប់កូនៗ​ឱ្យធ្វើតែអំពើល្អ ​និងចេះជួយគ្នានៅពេលត្រូវការ»។

នៅក្នុងសៀវភៅដដែលនេះ ​លោកហ៊ុន ម៉ាណែត ក៏បានបង្ហាញពីការប្តេជ្ញាចិត្ត ដើម្បីតបស្នងសង​គុណ​ចំពោះគណបក្សប្រជាជនកម្ពុជា ដែលបានផ្តល់ទំនុកចិត្ត ជ្រើសរើសរូបលោកជាបេក្ខជន​នាយក​រដ្ឋមន្ត្រីបន្តវេនពីសម្តេចតេជោផងដែរ ​ដោយលោកមានការប្តេជ្ញាចិត្ត ខិតខំប្រឹងប្រែងឱ្យ​អស់​លទ្ធភាព ​ដើម្បីចូលរួមថែរក្សាសមិទ្ធិផលវិជ្ជមានទាំងអស់នេះ ​ដែលគណបក្សសម្រេចបាន ក៏ដូចជា​ការ​បន្តនូវបុព្វហេតុរបស់គណបក្ស ​ដើម្បីជាតិ ​និងប្រជាជន តាមរយៈការកសាងបន្ថែមនូវ​សមិទ្ធិផល​វិជ្ជមានជូនជាតិ ​និងប្រជាជនជាដើម៕អត្ថបទ៖ បាន ចក់