ភ្នំពេញ៖ នាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិ បានក្រើនរំលឹក​ដល់ថ្នាក់ដឹកនំា​នៃអគ្គស្នងការដ្ឋាននគរបាលជាតិ​ ត្រូវយកចិត្តទុកដាក់បង្កើនការក្ដាប់ និង​វិភាគវាយតម្លៃ​នូវ​សភាពការណ៍​ និង​ព័ត៌មាននានា ពាក់ព័ន្ធសន្ដិសុខ ​និងសណ្ដាប់ធ្នាប់សង្គម ជា​ពិសេសសកម្មភាព​ភេរវកម្ម ​ឧក្រិដ្ឋកម្ម និងសកម្មភាពល្មើសច្បាប់ផ្សេងៗទៀត ដើម្បីចាត់វិធាន​ការ​បង្ការ ទប់ស្កាត់ ​និងបង្ក្រាបឲ្យមានប្រសិទ្ធភាពទាន់ពេលវេលា។

ថ្លែងប្រាប់ក្រុមអ្នកសារព័ត៌មានបន្ទាប់ពីឯកឧត្ដម នាយឧត្តមសេនីយ៍ សន្ដិបណ្ឌិត នេត សាវឿន អគ្គ​ស្នងការនគរបាលជាតិ អញ្ជើញប្រកាសចូលកាន់តំណែងជាផ្លូវការ ​អគ្គស្នងការរងនគរបាលជាតិ ចំនួន​៥រូប និងប្រធាននាយកដ្ឋាន ​ចំនួន២រូប ​នារសៀលថ្ងៃទី៣១ ​ខែសីហា ឆ្នាំ២០២២នេះ ឧត្តម​សេនីយ៍ឯក ឆាយ គឹមឃឿន ​អគ្គស្នងការរងនគរបាលជាតិ ​បានបញ្ជាក់ឲ្យដឹងថា បន្ថែម​ពី​លើការណែនាំនេះ ​នាយឧត្តមសេនីយ៍សន្តិបណ្ឌិត ក៏បានជំរុញឲ្យមានការអនុវត្តគោលនយោបាយ «ភូមិ ឃុំមានសុវត្ថិភាព» ​ឲ្យបានសកម្ម​ផុលផុស និងត្រូវយកចិត្តទុក​ដាក់​គ្រប់គ្រង​ឲ្យបាន​ហ្មត់ចត់​នូវ​មុខសញ្ញាគ្រប់ប្រភេទនៅតាមសហគមន៍ ភូមិ-ឃុំ ​ដោយប្រើប្រាស់នូវគ្រប់វិធានការ ដើម្បីបំបាត់​ប្រសិទ្ធភាព​ជាមុន មិនទុកឲ្យមុខ​សញ្ញាមាន​ឱកាសធ្វើសកម្មភាពបង្កអសន្ដិសុខ ឬគ្រោះថ្នាក់​ដល់​អាយុជីវិត និងបង្កមហន្ដរាយដល់ទ្រព្យសម្បត្តិរបស់ប្រជាពលរដ្ឋឡើយ។

សូមជម្រាបថា នាយនគរបាលជាន់ខ្ពស់ត្រូវបានតែងតាំង និងផ្លាស់ប្ដូរតួនាទីនោះរួមមាន៖ ទី១៖ លោកឧត្តមសេនីយ៍ឯក ជីវ ផល្លី ពីប្រធាននាយកដ្ឋានប្រឆាំងការជួញដូរមនុស្ស ទៅ​ជាអគ្គស្នងការរងនគរបាលជាតិ, ទី២៖ លោកឧត្តមសេនីយ៍ឯក ជា ពៅ ពីប្រធាននាយកដ្ឋានប្រឆាំងបទល្មើសបច្ចេកវិទ្យា ទៅជាអគ្គស្នងការរងនគរបាលជាតិ

,ទី៣៖ លោកឧត្តមសេនីយ៍ទោ លន់ សុផាត ពីស្នងការនគរបាលខេត្តក្រចេះ ទៅជាអគ្គស្នងការរងនគរបាលជាតិ, ទី៤៖ លោកឧត្តមសេនីយ៍ទោ កឹង ឃន ពីស្នងការនគរបាលខេត្តស្វាយរៀង ទៅជាអគ្គស្នងការរងនគរបាលជាតិ, ទី៥៖ លោកស្រីឧត្តមសេនីយ៍ទោ រស់ ច័ន្ទសោភា ពីអនុប្រធាននាយកដ្ឋានបុគ្គលិក ទៅជាអគ្គស្នងការរងនគរបាលជាតិ , ទី៦៖ លោកស្រីឧត្តមសេនីយ៍ទោ ស៊ឹម ផាណុំ ពីស្នងការរងនគរបាលរាជធានីភ្នំពេញ ទៅជាប្រធាននាយកដ្ឋានប្រឆាំងការជួញដូរមនុស្ស និង​ការពារអនីតិជននិង ទី៧៖ លោកឧត្តមសេនីយ៍ទោ សុខ នីត្យា ពីអនុប្រធាននាយកដ្ឋាន​កណ្ដាល​នគរបាលសន្ដិសុខ ទៅជាប្រធាននាយកដ្ឋានប្រឆាំងបទល្មើសបច្ចេកវិទ្យា៕

អត្ថបទ៖ បាន ចក់