ភ្នំពេញ៖ នាយឧត្តមសេនីយ៍ កែវ វណ្ណថន អគ្គនាយករង និងជាអ្នកនាំពាក្យ​អគ្គនាយកដ្ឋាន​អន្តោ​ប្រវេសន៍ ថ្លែងថា ការផ្តល់ប័ណ្ណស្នាក់នៅអចិន្រៃ្តយ៍សម្រាប់ជនបរទេសអន្តោប្រវេសន្ត ដើម្បី​បង្កភាព​ងាយ​ស្រួលក្នុងការគ្រប់គ្រងជនបរទេសអន្តោប្រវេសន្តឲ្យបានម៉ត់ចត់ និងមាន​ប្រសិទ្ធ​ភាព។

ពាក់ព័ន្ធនឹងការគ្រប់គ្រងជនបរទេសអន្តោប្រវេសន្តនៅកម្ពុជា ក៏ដូចជាសម្រួល​ដល់​ការ​ទទួល​បាន​សេវា​សាធារណៈ​ តាមរយៈការផ្តល់ប័ណ្ណស្នាក់នៅអចិន្រ្តៃយ៍ សម្រាប់ជនបរទេសអន្តោប្រវេសន្ត នាយឧត្តមសេនីយ៍ កែវ វណ្ណថន អគ្គនាយករង និងជាអ្នកនាំពាក្យអគ្គនាយកដ្ឋានអន្តោប្រវេសន៍ បានឱ្យដឹងថា ដោយសារក្រសួងមហាផ្ទៃសង្កេតឃើញថា នៅមានក្រសួង ស្ថាប័ន រដ្ឋបាល​ថ្នាក់​ក្រោម​ជាតិ និងវិស័យឯកជនមួយចំនួន ពុំទាន់ជ្រួតជ្រាប និងទទួលស្គាល់​តម្លៃ​ក្នុង​ការ​ប្រើប្រាស់​ប័ណ្ណ​ស្នាក់​នៅ​អចិន្រ្តៃយ៍នៅឡើយ។ នាយឧត្តមសេនីយ៍ កែវ វណ្ណថន បន្តថា ក្នុងន័យនេះ អគ្គនាយកដ្ឋានអន្តោប្រវេសន៍ មានគោលដៅធ្វើយ៉ាងណាឱ្យ​ភាគីពាក់ព័ន្ធ​អាចផ្តល់​សេវាជា​តម្រូវការ​របស់ជនបរទេសអន្តោប្រវេសន្តឱ្យទទួលបានទៅតាមការស្នើសុំរបស់ពួកគេ។

នាយឧត្តមសេនីយ៍ កែវ វណ្ណថន អះអាងថា ការផ្តល់ប័ណ្ណស្នាក់នៅ​អចិន្រ្តៃយ៍​ជនបរទេសអន្តោប្រវេសន្តនេះ​មានសុពលភាព​២ឆ្នាំ ហើយប័ណ្ណនេះ​មិនមែន​មាន​តែ​នៅ​កម្ពុជា​ប៉ុណ្ណោះ សូម្បីតែប្រទេសសិង្ហបុរី និងអាមេរិក​ក៏មានប្រព័ន្ធ​គ្រប់គ្រង​ជន​បរទេស​អន្តោ​ប្រវេសន្ត​ជា​ទម្រង់​ប្រភេទ​ប័ណ្ណ​ប្រភេទនេះដូចគ្នា។

គិតមកទល់ពេលនេះ ក្រសួងមហាផ្ទៃបានផ្តល់ប័ណ្ណស្នាក់​នៅ​អចិន្រ្តៃយ៍ សម្រាប់​ជន​បរទេស​អន្តោ​ប្រវេសន្ត ចំនួន ៦៥,៧១៩ប័ណ្ណ ក្នុងចំណោមជនបទេសអន្តោប្រវេសន៍ចំនួន ៨៩,៧៨៦នាក់ ដែល​ទទួល​បានប្រកាសទទួលស្គាល់ពីក្រសួងមហាផ្ទៃ។

ការផ្តល់ប័ណ្ណស្នាក់នៅអចិន្រ្តៃយ៍ដល់ជនបរទេសអន្តោប្រវេសន្ត សម្រាប់ប្រើប្រាស់​បម្រើ​ជីវភាព​ប្រចាំ​ថ្ងៃ​ដូចជា ការស្នើសុំសេវារដ្ឋបាល សេវាសាធារណៈ សេវាសុខភាព សេវាធនាគារ ការធ្វើ​អាជីវកម្ម ការស្នើសុំធ្វើការងារតាមរោងចក្រ សហគ្រាស និងសកម្មភាព​មួយចំនួន​ដែល​ច្បាប់​អនុញ្ញាត​ សម្រាប់ជនបរទេស៕ អត្ថបទ៖ សេក ឧត្តម