ភ្នំពេញ៖ ក្រសួងវប្បធម៌និងវិចិត្រសិល្បៈ ក្រសួងព័ត៌មាន និងក្រសួងកិច្ចការនារី នៅថ្ងៃទី០១ ខែកញ្ញានេះ បានកោះហៅម្ចាស់ផលិតកម្មមហាហង្ស ដែលទទួលខុសត្រូវលើការរៀបចំ កម្មវិធី MISS GRAND CAMBODIA មកធ្វើការស្ដីបន្ទោសណែនាំ ចំពោះការផ្សព្វផ្សាយរូបភាពល្បែង និងភាពសិចស៊ីហួសហេតុក្នុងកម្មវិធីរបស់ខ្លួន។
ក្រសួងបានបញ្ជាក់ឱ្យ អ្នករៀបចំកម្មវិធីទាំងអស់ដែលពាក់ព័ន្ធនឹងវប្បធម៌ ត្រូវស្នើសុំការគាំទ្រ ពីក្រសួងធ្វើការពិនិត្យដើម្បីចៀសកំហុសឆ្គង។ រូបភាពល្បែងស៊ីសង ក៏ដូចជារូបភាពសិចស៊ីនៅក្នុងកម្មវិធី MISS GRAND CAMBODIA មួយរយៈមុន បង្កឱ្យការរិះគន់ពីប្រជាពលរដ្ឋយ៉ាងខ្លាំង។
ករណីនេះ ក៏ត្រូវបានសម្ដេច នាយករដ្ឋមន្ត្រីលើកឡើងផងដែរកាលពីថ្ងៃម្សិលមិញ អំពីការមិនពេញចិត្តរបស់មហាជន។ បញ្ហានេះ ក្រសួងពាក់ព័ន្ធ រួមមានក្រសួងវប្បធ៌ម និងវិចិត្រសិល្បៈ ក្រសួងព័ត៌មាន និងក្រសួងកិច្ចការនារី បានហៅភាគីម្ចាស់ផលិតកម្មមហាហង្ស ជាអ្នករៀបចំការប្រកួត MISS GRAND CAMBODIA មកអប់រំណែនាំ ស្ដីបន្ទោស ដើម្បីកុំឱ្យមានបញ្ហាខុសឆ្គងបែបនេះ កើតឡើងជាថ្មី។
ពាក់ព័ន្ធនឹងបញ្ហានេះ ឯកឧត្តម ឡុង ប៉ុណ្ណាស៊ីរីវត្ថ ជាអ្នកនាំពាក្យក្រសួងវប្បធម៌ទទួលស្គាល់ថា កម្ពុជា មិនមានស្តង់ដារក្នុងការកំណត់ភាពសិចស៊ីនោះទេ។ បន្ទាប់ពីបញ្ចប់ការអប់រំណែនាំនេះ ឯកឧត្តម ឡុង ប៉ុណ្ណាស៊ីរីវត្ថ ជាអ្នកនាំពាក្យក្រសួងវប្បធម៌ និងវិចិត្រសិល្បៈលើកឡើងជាវិធានការ ដែលតម្រូវឱ្យម្ចាស់កម្មវិធីដែលមានការផ្សព្វផ្សាយពាក់ព័ន្ទនឹងវប្បធ៌មជាតិ ត្រូវតែស្នើសុំការគាំទ្រពីក្រសួងវប្បធ៌ម ដើម្បីមន្ត្រីជំនាញ ចុះត្រួតពិនិត្យភាពត្រឹមត្រូវដោយផ្ទាល់។
ពាក់ព័ន្ធនឹងកំហុសឆ្គងនេះ ខាងភាគីក្រុមហ៊ុន ក៏បានទទួលស្គាល់នូវចន្លោះខ្វះខាត ភាពខុសឆ្គងរបស់ខ្លួនផងដែរ ខណៈការស្លៀកសំលៀកបំពាក់ក្នុងកម្មវិធី MISS GRAND CAMBODIA នេះ គឺមានការរិះគន់ជាខ្លាំងពីសាធារណជនទូទៅ...៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
