ភ្នំពេញ៖ គិតត្រឹមឆ្នាំ២០២២នេះ ចំណងការទូតរវាងប្រទេសកម្ពុជា និងប្រទេសវៀតណាម បានឈានដល់ខួបទី ៥៥ឆ្នាំហើយ ដោយភាគីទាំងពីរប្រទេស បានប្ដេជ្ញាបន្តកិច្ចសហប្រតិបត្តិជាមួយគ្នា ធ្វើឲ្យព្រំដែនមានសុខសន្តិភាព រួមទាំងពង្រីកវិស័យពាណិជ្ជកម្ម សេដ្ឋកិច្ចជាដើម ឲ្យកាន់តែកើនឡើងបន្ថែមទៀត ខណៈទំហំពាណិជ្ជកម្មរវាងកម្ពុជា-វៀតណាម ត្រឹម៧ខែ ដើមឆ្នាំ២០២២ មានចំនួនជាង ៧ពាន់លានដុល្លារ។

ក្នុងឱកាសចូលរួមក្នុងពិធីប្រារព្ធខួបលើកទី៧៧ នៃបុណ្យឯករាជ្យជាតិវៀតណាម និងខួបអនុស្សាវរីយ៍លើកទី៥៥ នៃការបង្កើតទំនាក់ទំនងការទូត រវាងកម្ពុជា-វៀតណាម នៅថ្ងៃទី១ ខែកញ្ញា ឆ្នាំ២០២២ ដែលមានអង្គទូតជាច្រើនប្រទេសចូលរួម សម្ដេចមហាពញាចក្រី ហេង សំរិន ប្រធានរដ្ឋសភាជាតិ មានប្រសាសន៍ថា រយៈពេលជាងកន្លះសតវត្សមកនេះ កម្ពុជា-វៀតណាម បានរួមសុខទុក្ខ ស្មាកៀកស្មា និងជួយគ្នាទៅវិញទៅមក ហើយបានជម្នះនូវគ្រប់ឧបសគ្គ តាំងពីដំណាក់កាលដំណ្ដើមឯករាជ្យពីអាណានិគមរហូតបានស្ដារ ការពារ កសាង និងអភិវឌ្ឍប្រទេសរៀងៗខ្លួនឲ្យមានការរីកចម្រើន លូតលាស់ឈានឡើងជាលំដាប់ រហូតមកដល់បច្ចុប្បន្ន។

សម្ដេចពញាចក្រីបានបន្តថា ក្នុងចំណោមសមិទ្ធផលសំខាន់ៗជាច្រើន ដែលប្រទេសទាំងពីរ រួមគ្នាសម្រេចបាន ក្នុងនោះ សមិទ្ធផលជាប្រវត្តិសាស្ត្រដ៏មានតម្លៃ និងមិនអាចកាត់ថ្លៃបាន គឺការកំណត់ដែនសីមាឈរលើស្មារតីសាមគ្គីភាព និងមិត្តភាព សំដៅប្រែក្លាយតំបន់ព្រំដែនកម្ពុជា-វៀតណាម ទៅជាព្រំដែនសន្តិភាព សាមគ្គីភាព កិច្ចសហប្រតិបត្តិការ និងអភិវឌ្ឍន៍។

សម្ដេចប្រធានរដ្ឋសភា បន្ថែមថា ចំពោះវិស័យសេដ្ឋកិច្ចវិញ ប្រទេសទាំងពីសហការគ្នាយ៉ាងជិតស្និទ្ធ គាំទ្រ និងជួយគ្នាទៅវិញទៅមក ក្នុងស្មារតីភាពជឿជាក់ និងទុកចិត្តគ្នា ហើយបានធ្វើឲ្យសេដ្ឋកិច្ចសង្គមមានការអភិវឌ្ឍ រីកចម្រើនយ៉ាងខ្លាំងគួរឲ្យកត់សម្គាល់ ដែលក្នុងនោះវិស័យសេដ្ឋកិច្ច ពាណិជ្ជកម្ម ទេសចរណ៍ និងការវិនិយោគ មានការកើតឡើងឥតឈប់ឈរ។

ឯកឧត្តម Nguyen Huy Tang ឯកអគ្គរដ្ឋទូតវៀតណាមប្រចាំកម្ពុជា បានថ្លែងថា ទំហំពាណិជ្ជកម្មរវាងកម្ពុជា-វៀតណាម នៅឆ្នាំ២០២១ សម្រេចបានជាង ៩ពាន់ ៥រយលានដុល្លារ កើនឡើង៨០ភាគរយ បើធៀបនឹងឆ្នាំ២០២០ ហើយក្នុងអំឡុងរយៈពេល៧ខែ ឆ្នាំ២០២២នេះ សម្រេចបានជិត ៧ពាន់ ៨០លានដុល្លារ។

ឯកឧត្តមបានបន្តថា ភាគីទាំងពីរ ក៏បាននិងកំពុងអនុវត្តនូវយន្តការបើកទូលាយ សម្រាប់សកម្មភាពនាំចេញ និងនាំចូលទំនិញ ទេសចរណ៍អន្តរប្រទេស សម្រួលនីតិវិធីគយ ធ្វើវិសោធនកម្មលើកិច្ចព្រមព្រៀង សំដៅជួយសម្រួលដល់ការធ្វើពាណិជ្ជកម្ម វិនិយោគទៅក្នុងទីផ្សាររបស់ផងគ្នាទៅវិញទៅមក ហើយបង្កើនទំហំពាណិជ្ជកម្មទ្វេភាគី ព្រមទាំងបង្កើតលក្ខខណ្ឌអំណោយផល សម្រាប់ពលរដ្ឋនៅតាមព្រំដែនក្នុងការដោះដូរទំនិញ និងការលើកកម្ពស់ជីវភាពរស់នៅ៕ អត្ថបទ៖ បាន សុខរិទ្ធិ