កំពង់ចាម៖ សមិទ្ធផលថ្មីៗ កំពុងកើតឡើងជាហូហែរ សម្រាប់អ្នកស្រុកកោះសូទិន ក្នុងខេត្តកំពង់ចាម ខណៈ ការដ្ឋានស្ថាបនា ផ្លូវបេតុងអាមេ មួយខ្សែ ប្រវែងជាង១០០០ម៉ែត្រ ដែលតភ្ជាប់ចំនួន៣ភូមិ នៃឃុំកំពង់រាប កំពុងត្រូវបានស្ថាបនាសម្រេច ៧០ភាគរយហើយ។

កត្តាសុខសន្តិភាព បានធ្វើឲ្យប្រទេសជាតិមានការជឿនលឿន ការអភិវឌ្ឍរីកចម្រើន ដូចសព្វថ្ងៃនេះ។ ប្រជាពលរដ្ឋ ដែលរស់នៅក្នុងភូមិកំពង់ស្តី ឃុំកំពង់រាប នៃស្រុកកោះសូទិន ខេត្តកំពង់ចាម បានបង្ហាញអារម្មណ៍សប្បាយរីករាយ ខណៈពួកគេទទួលបានសមិទ្ធផលថ្មីជាច្រើន និងបានគាំទ្រចំពោះការខិតខំរបស់រាជរដ្ឋាភិបាលកម្ពុជា ដែលប្រែក្លាយ ពីតំបន់លំបាកធ្វើដំណើរ​ឲ្យ​មានការរីកចម្រើន។

ក្នុងពិធីបើកការដ្ឋានស្ថាបនាផ្លូវបេតុងនៅឃុំកំពង់រាប នៃស្រុកកោះសូទិន កាលពីថ្ងៃទី០១ ខែកញ្ញាម្សិលមិញ លោក លឿង រ៉ាម៉ូ អភិបាលរងស្រុក បានលើកឡើងថា ផ្លូវបេតុងមួយខ្សែនេះ នឹង​ផ្តល់អត្តប្រយោជន៍​ជាច្រើនដល់ប្រជាពលរដ្ឋជួយកាត់​បន្ថយការចំណាយពេលធ្វើដំណើរ និង​ការដឹកជញ្ជូនផលិតផលកសិកម្មទៅទីផ្សារ។ លោក បានស្នើឲ្យពលរដ្ឋថែទាំ សមិទ្ធផល​ទាំងអស់នេះ ​ឲ្យយូរអង្វែងតដល់កូនចៅទៀត៕ អត្ថបទ៖ ថុង សីហា