​កោះ​តៃវ៉ាន់៖ នាយករដ្ឋមន្ត្រី​កោះ​តៃវ៉ាន់​លោក Su Tseng-chang បាន​និយាយ​នៅ​ថ្ងៃ​សុក្រ​នេះ​ថា ការ​បាញ់​ទម្លាក់​យាន​ដ្រូ​ន​ពី​សំណាក់​កោះ​តៃវ៉ាន់នៅក្បែរ​តំបន់ឆ្នេរ​សមុទ្រ​របស់​ចិន ដែល​គ្រប់គ្រង​ដោយ​តៃវ៉ាន់​គឺជា​រឿង​ត្រឹមត្រូវ​បំផុតបន្ទាប់ពី​ចេញ​ការព្រមាន​ដដែលៗ ហើយ​ចិន​គួរតែ​រៀន​អត់ធ្មត់​។

​យោធា​របស់​កោះ​តៃវ៉ាន់​បាន​បាញ់​ទម្លាក់​យាន​ដ្រូ​ន​ស៊ីវិល​ មិន​ស្គាល់​អត្តសញ្ញាណ​មួយ​គ្រឿង​ជា​លើក​ដំបូង ដែល​បាន​ហោះ​ចូល​ដែនអាកាស​របស់​ខ្លួនជិត​កូន​កោះ​មួយ​នៅ​ក្បែរ​ច្រក​ទីក្រុង Xiamen របស់​ចិន​កាល​ពី​ថ្ងៃ​ព្រហស្បតិ៍ បន្ទាប់ពី​មេដឹកនាំ​កោះ​នេះ​បាន​ប្ដេជ្ញា​ចាត់វិធានការ​ម៉ឺងម៉ាត់ ដោះ​ស្រាយ​ការ​កើន​ឡើង​ការ​បំពារបំពាន​បែបនេះ​។ ឧបទ្ទវ​ហេតុនេះ​បាន​កើតមានឡើង បន្ទាប់ពី​កោះ​តៃវ៉ាន់​បាន​ត្អូញត្អែរ​ដដែលៗ​ពី​សកម្មភាព​រំខាន​ ដោយ​យាន​ដ្រូ​ន​ពី​ប្រទេស​ចិន និង​កំពុង​ហោះហើរ​នៅ​ជិត​កោះ Kinmen ដែល​កំពុង​កើតឡើង ខណៈ​ទីក្រុង​ប៉េកាំង​ធ្វើ​សម​យុទ្ធ​យោធា​ជុំវិញ​កោះ​តៃវ៉ាន់​។ ​កងកម្លាំង​ចិន​បាន​កំពុង​ធ្វើ​សមយុទ្ធ​ជិត​កោះ​តៃវ៉ាន់​ចាប់​តាំង​ពី​ដើមខែ​សីហា ក្រោយ​ដំណើរ​ទស្សនកិច្ច​របស់​ប្រធាន​សភា​អាមេរិក​លោកស្រី Nancy Pelosi​ ទៅកាន់​កោះ​នេះ​ដែល​ធ្វើ​ឲ្យ​ទីក្រុង​ប៉េកាំង​ខឹង​សម្បារ​៕

អត្ថបទ៖ សុខមាន