ភ្នំពេញ៖ នាសប្តាហ៍ក្រោយនេះ កងទ័ពកម្ពុជា នឹងចូលរួមលំហាត់ហ្វឹកហ្វឺនសង្គ្រោះគ្រោះ​មហន្តរាយ​នៅប្រទេសឡាវ ដើម្បីទទួលបានបទពិសោធនបន្ថែមលើប្រតិបត្តិការរុករកជនរងគ្រោះ​ពីករណី​បាក់ដីសង្កត់​ ឬអគាររលំ។

ថ្លែងប្រាប់BTV News នៅថ្ងៃទី៣ ខែសីហា ឆ្នាំ២០២២ នាយឧត្តមសេនីយ៍ ឥត សារ៉ាត់ អគ្គមេបញ្ជា​ការរង ​នាយសេនាធិការចម្រុះនៃកងយោធពលខេមរភូមិន្ទ និងជាប្រធានលេខាធិការ​ដ្ឋាន​គ្រប់គ្រង​គ្រោះមហន្តរាយនៃក្រសួងការពារជាតិ បានឱ្យដឹងថា យោងតាមកិច្ចព្រមព្រៀងរវាង​រដ្ឋមន្រ្តី​ការពារ​ជាតិកម្ពុជា ឡាវ និងវៀតណាម កាលពីពេលកន្លងទៅ ​គឺឆ្នាំ២០២២នេះ ឡាវត្រូវទទួលធ្វើជាម្ចាស់​ផ្ទះរៀបចំ​ការហ្វឹកហ្វឺនសង្គ្រោះគ្រោះមហន្តរាយ ​ក្រោមប្រធានបទ ទប់ទល់គ្រោះមហន្តរាយដោយ​ធម្មជាតិ ​និងដោយការបាក់ដី។

នាយឧត្តមសេនីយ៍ បន្តថា លំហាត់ហ្វឹកហ្វឺនកងទ័ពរប្រទេសទាំង៣ បានត្រៀមរួចរាល់ទាំង​មធ្យោបាយ ដូចជា ឧទ្ធម្ភាគចក្រ រថយន្ត ទូក អូរប័រ និងសម្ភារៈសម្រាប់ជំនាញជាច្រើនប្រភេទ ខណៈថ្ងៃនេះ ​ក្នុងចំណោមកងទ័ពកម្ពុជាសរុប ៧០នាក់ បានចេញដំណើរទៅកាន់ប្រទេសឡាវ។

នាយឧត្តមសេនីយ៍ ឥត សារ៉ាត់ បញ្ជាក់ថា ​ក្នុងពេលចូលរួមលំហាត់ហ្វឹកហ្វឺននាពេលខាងមុខ កងទ័ព​កម្ពុជា បាននាំនូវសម្ភារៈជំនាញដែលប្រើប្រាស់ក្នុង​ប្រតិបត្តិការកន្លងទៅ ដើម្បីបង្ហាញ​ទៅប្រទេសជាមិត្តផងដែរ។

ជាមួយគ្នានេះ នាយឧត្តមសេនីយ៍​ ឥត សារ៉ាត់ ថ្លែងថា ការរៀបចំលំហាត់ហ្វឹកហ្វឺនក្នុងឆ្នាំនេះ កងទ័ពកម្ពុជា​នឹងទទួលបានការដកពិសោធនថ្មីបន្ថែម ពីប្រតិបត្តិការការរុករកជនរង​គ្រោះពីករណី​បាក់ដីសង្កត់​ ឬអគាររលំជាដើម។

គួរបញ្ជាក់ថា លំហាត់ហ្វឹកហ្វឺនសង្គ្រោះគ្រោះមហន្តរាយ ដែលធ្វើឡើងក្រោមប្រធានទប់ទល់​គ្រោះ​មហន្តរាយ ដោយសារបញ្ហាធម្មជាតិ ​ឬដោយករណីការបាក់ដី ​មានរយៈពេល៨ថ្ងៃ ​ពីថ្ងៃទី០៨ ដល់​ថ្ងៃទី១៦ ខែកញ្ញា ឆ្នាំ២០២២ និងមានកងទ័ពទាំង៣ប្រទេសចូលរួមជិត ៤០០នាក់ ខណៈកង​ទ័ពចូលរួម​ប្រតិបត្តិការ​ហ្វឹកហ្វឺន​របស់កម្ពុជា ​គឺបញ្ជាការដ្ឋាន​ទ័ពពិសេស ​ដែល​ដឹកនាំ​ដោយ​លេខាធិការ​ដ្ឋាន ​សេនាធិការចម្រុះនៃអគ្គបញ្ជាការ ​កងយោធពលខេមរភូមិន្ទ៕ អត្ថបទ សេក ឧត្តម