បាល់ទាត់៖ ស្ថានីយទូរទស្សន៍ BTV-News បានទទួលសិទ្ធិជាដៃគូផ្សាយផ្ទាល់ការប្រកួតមិត្តភាពអន្តរជាតិចំនួន ២ប្រកួតរបស់ក្រុមជម្រើសជាតិកម្ពុជា និងក្រុមជម្រើសជាតិយុវជនអាយុក្រោម ២៣ឆ្នាំកម្ពុជានាចុងខែកញ្ញា ឆ្នាំ២០២២ នេះ។
សម្រាប់ក្រុមជម្រើសជាតិ U23 កម្ពុជានឹងត្រូវជួបក្រុមជម្រើសជាតិ U23 ជប៉ុននាថ្ងៃទី២០ ខែកញ្ញា ខណៈក្រុមជម្រើសជាតិកម្ពុជានឹងត្រូវប្រកួតមិត្តភាពអន្ដរជាតិ ជាមួយក្រុមជម្រើសជាតិបង់ក្លាដែសនាថ្ងៃទី២២ ខែកញ្ញានៅក្នុងវិមានកីឡដ្ឋាននៃពហុកីឡដ្ឋានជាតិមរតកតេជោតែមួយគត់។ គួរដឹងថា ក្រុមជម្រើសជាតិរបស់កម្ពុជាទាំង ២ក្រុមក្រោមការដឹកនាំរបស់អ្នកចាត់ការទូទៅលោក Keisuke Honda បានបង្ហាញបញ្ជីឈ្មោះបឋមដែលត្រូវធ្វើតេស្ដកាយសម្បទារួចហើយ ដោយក្រុមធំនៃក្រុមគោព្រៃកម្ពុជាគឺបានកោះហៅកីឡាករ ៤៣នាក់មកធ្វើតេស្ដ ខណៈក្រុមជម្រើសជាតិ U23 កម្ពុជាបានកោះហៅកីឡាករ ៣៥នាក់មកធ្វើតេស្ដនាថ្ងៃទី១៣ ខែកញ្ញា ដើម្បីចម្រាញ់កីឡាករចុងក្រោយត្រៀមការប្រកួតមិត្តភាពអន្ដរជាតិនាពេលខាងមុខ៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
