ប្រ៊ុយណេ៖ ប្រ៊ុយណេដែលជាប្រធានអាស៊ានកាលពីថ្ងៃចន្ទម្សិលមិញ បានបង្ហាញការគាំទ្ររបស់ខ្លួនចំពោះជំនួបរបស់ក្រុមមេដឹកនាំក្នុងតំបន់ ដើម្បីពិភាក្សាលើដំណើរវិវត្តន៍ចុងក្រោយនៅសហភាពមីយ៉ាន់ម៉ា និងបានស្នើសុំក្រុមមន្ត្រីឲ្យរៀបចំកិច្ចប្រជុំបន្ទាន់មួយ នៅទីក្រុងហ្សាកាតា ប្រទេសឥណ្ឌូណេស៊ី។
សហភាពមីយ៉ាន់ម៉ាបានធ្លាក់ក្នុងវិបត្តិនយោបាយ ចាប់តាំងពីមានរដ្ឋប្រហារយោធាកាលពីថ្ងៃទី០១ ខែកុម្ភៈកន្លងទៅ ដែលបានផ្តួលរំលំរដ្ឋាភិបាលឈ្នះឆ្នោតរបស់លោកស្រី អ៊ុងសាន ស៊ូជី។ ក្រុមសកម្មជនបានអះអាងថា មនុស្សយ៉ាងហោច ៥៥៧ត្រូវបានសម្លាប់ចាប់តាំងពីការបង្ក្រាបយ៉ាងចាស់ដៃ ដោយកងកម្លាំងសន្តិសុខមកលើបាតុកម្ម និងកូដកម្មនៅទូទាំងប្រទេស ជាកន្លែងដែលរបបសឹកយោធាបានរឹតត្បិតការប្រើប្រាស់អ៊ីនធឺណេត។ ឥណ្ឌូនេស៊ីដែលដឹកនាំកិច្ចខិតខំប្រឹងប្រែងរបស់អាស៊ាន ហើយសហភាពមីយ៉ាន់ម៉ាជាសមាជិកដែរនោះ ជំរុញឲ្យមានដំណោះស្រាយតាមរយៈតុចរចា ថ្វីត្បិតតែមានគោលជំហរមិនលូកដៃចូល ឬធ្វើសេចក្តីអធិប្បាយណាមួយ លើកិច្ចការផ្ទៃក្នុងប្រទេសដែលជាសមាជិកក៏ដោយ។ នៅក្នុងសេចក្ដីថ្លែងការណ៍រួមជាមួយម៉ាឡេស៊ី ប្រ៊ុយណេបាននិយាយថា ប្រទេសទាំង២ បានស្នើសុំរដ្ឋមន្ត្រី និងមន្ត្រីជាន់ខ្ពស់របស់ពួកគេ រៀបចំកិច្ចប្រជុំដ៏ចាំបាច់មួយនៅលេខាធិការដ្ឋានអាស៊ាន ស្ថិតក្នុងទីក្រុងហ្សាកាតាប្រទេសឥណ្ឌូនេស៊ី។
សេចក្ដីថ្លែងការណ៍បែបនេះបានធ្វើឡើង បន្ទាប់ពីជំនួបរវាងនាយករដ្ឋមន្ត្រីម៉ាឡេស៊ី លោក មូហ៊ីយីឌីន យ៉ាស៊ីន និងស្តេចស៊ូតង់ប្រ៊ុយណេ ព្រះចៅហាសាណាល់ បូលគៀ កាលពីថ្ងៃចន្ទ។ ពួកគេបាននិយាយថា មេដឹកនាំទាំង២ បានឯកភាពគ្នាឲ្យក្រុមមេដឹកនាំអាស៊ាន ជួបពិភាក្សាដោះស្រាយវិបត្តិនយោបាយនៅសហភាពមីយ៉ាន់ម៉ា។ ទោះបីជាយ៉ាងណាក៏ដោយ ពួកគេមិនបាននិយាយពីពេលវេលានៃការរៀបចំជំនួបនោះឡើយ ដោយគ្រាន់តែពួកគេបង្ហាញពីក្តីកង្វល់ ចំពោះចំនួនមនុស្សស្លាប់កើនឡើងនៅសហភាពមីយ៉ាន់ម៉ា៕
អត្ថបទ៖ សារ៉ាត់
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
