ភ្នំពេញ៖ ពលរដ្ឋងាយរងគ្រោះ រស់នៅក្នុងខណ្ឌឫស្សីកែវ រាជធានីភ្នំពេញ នៅថ្ងៃទី៧ខែកញ្ញានេះ បានបង្ហាញការសប្បាយចិត្ត បន្ទាប់ពីទទួលបានអំណោយពីអង្គការមូលអង្គការមូលនិធិអភិវឌ្ឍន៍មុស្លិមកម្ពុជា។ពួកគាត់ថា អំណោយទាំងអស់នេះ បានចូលរួមចំណែកដោះស្រាយជីវភាពប្រចាំថ្ងៃបានមួយកំរិត។
ការលើកឡើងនេះ បានធ្វើឡើងក្នុងឱកាស ឯកឧត្តមបណ្ឌិត អូស្មាន ហាស្សាន់ ទេសរដ្ឋមន្ត្រីទទួលបន្ទុកបេសកកម្មពិសេស និងជាប្រធានអង្គការមូលនិធិអភិវឌ្ឍន៍មុស្លិមកម្ពុជា អមដំណើរជាមួយតំណាងស្ថានតួកគីប្រចាំប្រទេសកម្ពុជា និងលោកអភិបាលខណ្ឌឬស្សីកែវ អញ្ជើញជាអធិបតីក្នុងពិធីសំណេះសំណាល សួរសុខទុក្ខ និងចែកអំណោយជូនដល់ប្រជាពលរដ្ឋងាយរងគ្រោះ ចំនួន៦០០គ្រួសារ ស្ថិតនៅខណ្ឌឬស្សីកែវ រាជធានីភ្នំពេញ។
ឯកឧត្តមបណ្ឌិត អូស្មាន ហាស្សាន់ មានប្រសាសន៍ដែរថា ការផ្ដល់ជូននូវអំណោយថ្ងៃនេះ គឺដើម្បីចូលរួមជាមួយរាជរដ្ឋាភិបាលក្នុងការជួយសម្រាលជីវភាពប្រជាពលរដ្ឋ ហើយអំណោយថ្ងៃនេះផងដែរ ផ្ដល់ជូនបងប្អូនប្រជាពលរដ្ឋដោយមិនប្រកាន់ពីជាតិសាសន៍ និងសាសនានោះឡើយ។
ឯកឧត្តមទេសរដ្ឋមន្ត្រី ក៏បានរំលឹកពីគុណតម្លៃនៃសន្តិភាពដែលកម្ពុជាទទួលបាន ក្រោមការដឹកនាំរបស់សម្តេចតេជោ ហ៊ុន សែន ប្រមុខរាជរដ្ឋាភិបាលកម្ពុជា ដែលបានធ្វើឲ្យកម្ពុជា ក្លាយជាប្រទេសដែលទទួលបានសុខសន្តិភាព ស្ថេរភាពនយោបាយ និងអភិវឌ្ឍន៍លើគ្រប់វិស័យ។ សម្ដេចតេជោ បានធានាមកនូវសុខដុមរមនារវាងជាតិសាសន៍ និងសាសនានៅកម្ពុជា គ្មានការរើសអើង គ្មានការប្រកាន់ពូជសាសន៍ និងសាសនានោះទេ។
អំណោយដែលពលរដ្ឋ ៦០០គ្រួសារ ទទួលបាននៅពេលនេះ រួមមាន៖ក្នុងមួយគ្រួសារទទួលបាន អង្ករ ២០គីឡូក្រាម និងគ្រឿងបរិភោគផ្សេងៗជាច្រើនទៀត៕ អត្ថបទ៖ទូច សោភ័ណ
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
