ភ្នំពេញ៖ ឯកឧត្តម ហេង លឹមទ្រី អនុរដ្ឋលេខាធិការក្រសួងទំនាក់ទងជាមួយរដ្ឋសភា ព្រឹទ្ធសភា និងអធិការកិច្ច បានជំរុញទៅប្រជាពលរដ្ឋអាចប្ដឹងមកក្រសួងផ្ទាល់ ឬតាមប្រព័ន្ធអនឡាញ បើមានបញ្ហាផ្សេងៗ និងដើម្បីលុបបំបាត់អំពើពុករលួយ ។

ក្នុងសន្និសីទសារព័ត៌មានស្តីពី សមិទ្ធផលសម្រេចបានរបស់ក្រសួងទំនាក់ទំនងជាមួយរដ្ឋសភា ព្រឹទ្ធសភា និងអធិការកិច្ច នៅថ្ងៃទី៨ ខែកញ្ញា ឆ្នាំ២០២២ ឯកឧត្តម ហេង លឹមទ្រី បានមាន​ប្រសាសន៍ថា រាល់បណ្ដឹងទទួលបានពីស្ថាប័នព្រះមហាក្សត្រ រដ្ឋសភាជាតិ និងរាជរដ្ឋាភិបាល គឺក្រសួងចាត់​សមត្ថកិច្ច ចុះស្រាវជ្រាវជាបន្ទាន់ បើការប្ដឹងតាម​រយៈប្រជាពលរដ្ឋ មកកាន់ក្រសួង​នឹង​ត្រូវពិនិត្យមើលតាមសមត្ថកិច្ចទៅខាងជំនាញផ្ទាល់ ។

ឯកឧត្តម បានបន្តថា មានន័យថា បណ្ដឹងពាក់ព័ន្ធទៅនឹងសមត្ថកិច្ចជំនាញ ក្រសួងនឹងផ្ទេរបណ្ដឹង ទៅ​អង្គភាពស្ថាប័នជំនាញ​ ប្រើសិនបើពាក់ព័ន្ធទៅនឹងដែនសមត្ថកិច្ចរបស់ក្រសួង នឹងចាត់​ប្រតិភូចុះទៅធ្វើការអង្កេតស្រាវជ្រាវ ។

ឯកឧត្តមអនុរដ្ឋលេខាធិការបន្ថែមថា ឧទាហរណ៍ ការចុះបញ្ជីដីធ្លីនោះ ក្រសួងនឹងបញ្ជូនសមត្ថកិច្ច​ទៅក្រសួងរៀបចំដែនដី នគរូបនីយកម្ម និងសំណង់ ដើម្បីពិនិត្យធ្វើការដោះស្រាយ បើកម្មវត្ថុពាក់ព័ន្ធ​ទៅនឹងបទអសកម្ម ឬការឃុបឃិតរំលោភដោយអំណាច នៅក្នុងដំណើរការ​នៃការ​ចុះបញ្ជីដីធ្លី ​នោះគឺជាសមត្ថកិច្ចរបស់ក្រសួងទំនាក់ទំនង​ជាមួយរដ្ឋសភា ​ព្រឹទ្ធសភា​ និងអធិការកិច្ច ដែល​ត្រូវចុះទៅធ្វើការស្រាវជ្រាវលើករណីនេះ ។

គួរបញ្ជាក់ថា ​ចាប់ពីឆ្នាំ២០១៧-២០២២ ក្រសួងទំនាក់ទំនង​ជាមួយរដ្ឋសភា ព្រឹទ្ធសភា និង​អធីការកិច្ច បានទទួលពាក្យបណ្ដឹងសរុបចំនួន ​១៦៤បណ្ដឹង បញ្ជូនទៅស្ថាប័ន​ផ្សេងដោះ​ស្រាយចំនួន ៧៤បណ្ដឹង, តម្កល់ទុកមិនចាត់ការចំនួន ៧បណ្ដឹង, ម្ចាស់បណ្ដឹងស្នើសុំដកវិញចំនួន ៥បណ្ដឹង, គណៈប្រតិភូក្រសួងចុះស្រាវជ្រាវ ​និងដោះស្រាយបានចំនួន ១០៣បណ្ដឹង, បិទបញ្ចប់​សំណុំរឿងចំនួន ២៣បណ្ដឹង, បង្វែរទៅស្ថាប័នផ្សេងដោះស្រាយចំនួន ៩បណ្ដឹង, ធ្វើលិខិតជំរុញ​ការ​ដោះស្រាយចំនួន ២១បណ្ដឹង និងម្ចាស់បណ្ដឹងស្នើសុំជំរុញការដោះស្រាយចំនួន ១៧បណ្ដឹង ៕

អត្ថបទ៖ បាន សុខរិទ្ធិ