អ៊ុយ​ក្រែ​ន៖ រុស្ស៊ី​បាន​បោះបង់ចោល​បន្ទាយ​សំខាន់​របស់​ខ្លួន​នៅក្នុង​ភាគ​ឦសាន​ប្រទេស​អ៊ុយ​ក្រែ​ន ជាការ​ដួល​រលំ​ភ្លាមៗ​នៃ​ខ្សែត្រៀម​ជួរមុខ​ដ៏​សំខាន់​មួយ​ក្នុងចំណោម​ខ្សែត្រៀម​ជាច្រើន​នៃ​សង្គ្រាម​នេះ បន្ទាប់ពី​កងកម្លាំង​អ៊ុយ​ក្រែ​ន​បាន​វាយ​រុល​ទៅ​មុខ​យ៉ាង​លឿន​។

​ការ​ដួល​រលំ​យ៉ាង​ឆាប់រហ័ស​នៃ​ទីក្រុង Izium ក្នុង​ខេត្ត Kharkiv គឺជា​ការ​បរាជ័យ​ដ៏​ធ្ងន់ធ្ងរ​បំផុត​របស់​ទីក្រុង Moscow ចាប់តាំងពី​កងទ័ព​របស់ខ្លួនត្រូវបាន​បង្ខំ​ឲ្យ​ត្រឡប់ក្រោយ​ចេញពី​រដ្ឋធានី Kyiv កាលពី​ខែមីនា​។ ការបរាជ័យ​នេះ​អាច​បង្ហាញ​ពី​ចំណុច​ប្រែប្រួល​ភ្លាមៗក្នុង​សង្គ្រាម​រយៈពេល​ ៦​ខែ ដោយ​ទាហាន​រុស្ស៊ី​រាប់​ពាន់​នាក់​កំពុង​បោះបង់ចោល​ឃ្លាំង​គ្រាប់រំសេវ និង​យុទ្ធោបករណ៍ ខណៈ​ពួកគេ​ដកថយ​។ កងកម្លាំង​រុស្ស៊ី​បាន​ប្រើ​ទីក្រុង Izium ជា​មូលដ្ឋាន​ភស្តុភារ សម្រាប់​យុទ្ធនាការ​មួយ​ក្នុងចំណោម​យុទ្ធនា​ការ​សំខាន់ៗ​ជាច្រើន​របស់​ខ្លួន ក្នុងការ​វាយប្រហារ​រយៈ​ពេល ​១​ខែ​ពី​ភាគ​ខាងជើង​នៅ​ជិត​តំបន់ Donbas ដែល​មាន​តំបន់ Donetsk និង Luhansk​។

​ទីភ្នាក់ងារសារព័ត៌មាន​រដ្ឋ​រុស្ស៊ី TASS បាន​ដកស្រង់​សម្ដី​របស់​ក្រសួងការពារជាតិ​រុស្ស៊ី​ដោយ​និយាយ​ថា ខ្លួន​បាន​បញ្ជា​ឲ្យ​កងទ័ព​ចាក​ចេញពីតំបន់​ក្បែរ​នោះ និង​បង្កើន​ប្រតិបត្តិការ​ពង្រឹងកម្លាំង​នៅ​កន្លែង​ផ្សេងទៀត​នៅ​ជិត​ខេត្ត Donetsk​។ សារព័ត៌មាន TASS បាន​រាយការណ៍​ថា ប្រធាន​រដ្ឋបាល​របស់​រុស្ស៊ី​នៅ​ក្នុង​ទីក្រុង Kharkiv បាន​ប្រាប់​ប្រជាពលរដ្ឋ​ឲ្យ​ចាក​ចេញពី​ខេត្ត​នេះ និង​ជម្លៀស​ចូល​ទៅ​ប្រទេស​រុស្ស៊ី​ដើម្បី​សង្គ្រោះ​ជីវិត៕

អត្ថបទ៖ សុខមាន