​​ប៉ា​គី​ស្ថាន៖ យោងតាម​ក្រុមមន្ត្រី​បាន​និយាយ​កាលពី​ថ្ងៃអាទិត្យ​ថា អាជ្ញាធរ​នៅ​ភាគខាងត្បូង​ប្រទេស​ប៉ា​គី​ស្ថានមាន​ផែនការ​ទម្លាយ​ផ្លូវ​ហាយវ៉េ Indus របស់​ប្រទេស ជា​បណ្តាញ​ត​ភ្ជាប់​ការដឹកជញ្ជូន​ដ៏​សំខាន់ដើម្បីឱ្យ​ទឹក​ហូរ និង​ទប់ស្កាត់​ទឹកជំនន់​នៅក្នុង​ទីក្រុង Dadu​។​

​ទឹកជំនន់​ពី​ភ្លៀង​មូសុង និង​ការ​រលាយ​ទឹកកក​នៅ​ភាគ​ខាងជើង​ប្រទេស​ប៉ា​គី​ស្ថាន​ បានធ្វើ​ឲ្យ​ប៉ះពាល់​ដល់​មនុស្ស ៣៣លាន​នាក់ និង​បណ្តាល​ឲ្យ​មនុស្ស​យ៉ាងហោចណាស់ ១,៣៩៦​នាក់​ស្លាប់, រងរបួស ១,២៧២៨​នាក់ និង​បាន​បំផ្លាញ​លំនៅឋាន ផ្លូវថ្នល់ ផ្លូវ​រថភ្លើង សត្វ​ចិញ្ចឹម និង​ដំណាំ​។ ​ប្រទេស​ប៉ា​គី​ស្ថាន​ប៉ាន់ប្រមាណ​តម្លៃ​នៃ​ការខាតបង់​មាន​ចំនួន​ ៣០​ពាន់​លាន​ដុល្លារ ហើយ​ទាំង​រដ្ឋាភិបាល និង​អគ្គលេខាធិការ​អង្គការសហប្រជាជាតិ​លោក Antonio Guterres បានដាក់​កំហុស​លើ​បញ្ហា​ទឹកជំនន់ អាកាសធាតុ​ក្តៅ​ខ្លាំង និង​ការបំផ្លាញ​ដោយ​គ្រោះធម្មជាតិ​បណ្តាលមកពី​បម្រែបម្រួល​អាកាសធាតុ​។​ ​យ៉ាងហោចណាស់​មាន​តំបន់​ចំនួន​៣ ​នៅក្នុង​ស្រុក Dadu ដែល​ផ្លូវ​ហាយវ៉េ Indus បាន​ជន់​លិចដោយចរាចរណ៍​ត្រូវបាន​ផ្អាក​ជាច្រើន​សប្តាហ៍ ខណៈ​ផ្លូវ​ហាយវ៉េ​ផ្សេងទៀត​របស់​ប្រទេស​ប៉ា​គី​ស្ថាន​ដែល​ត​ភ្ជាប់​ភាគ​ខាងជើង និង​ខាងត្បូង​ក៏​រង​ផលប៉ះពាល់​ធ្ងន់ធ្ងរ​ដោយ​ទឹកជំនន់​។

​ទីភ្នាក់ងារ​អង្គការសហប្រជាជាតិ​បានចាប់ផ្តើម​ការងារ​ លើ​ការវាយតម្លៃ​តម្រូវការ​របស់​ប្រទេស​ប៉ា​គី​ស្ថាន ដើម្បី​រៀបចំ​ផែនការ​កសាង​ឡើងវិញ​ក្រោយ​គ្រោះមហន្តរាយ។​ ​លោក Guterres បាន​ថ្លែងប្រាប់​អ្នកសារព័ត៌មាន​កាលពី​ថ្ងៃ​សៅរ៍​ថា សហគមន៍​អន្តរជាតិ​ចាំបាច់​ត្រូវធ្វើ​ការងារ​បន្ថែមទៀត​ ដើម្បី​ជួយ​បណ្តា​ប្រទេស​ដែល​រងគ្រោះ​ខ្លាំង​បំផុត​ដោយ​ឥទ្ធិពល​នៃ​បម្រែបម្រួល​អាកាសធាតុ ដោយ​ចាប់ផ្តើម​ពី​ប្រទេស​ប៉ា​គី​ស្ថាន៕

អត្ថបទ៖ ប៊ុនថន