ភ្នំពេញ៖ រដ្ឋមន្ត្រីថាមពលប្រទេសអាស៊ាន បានបើកវេទិកា ពិភាក្សាលើបញ្ហាប្រឈម ស្តីពីអព្យាក្រឹតភាពកាបូន និងសន្តិសុខថាមពល គឺជាការឆ្លុះបញ្ចាំងអំពីវិបត្តិថាមពល ស្របពេលដែលពិភពលោកកំពុងជួបប្រទះ នឹងជាការ ស្វែងរក ដំណោះស្រាយទាំងអស់គ្នាក្នុងពេលបច្ចុប្បន្ន ខណៈតម្លៃប្រេង និងឧស្ម័នធម្មជាតិកំពុងកើនឡើង។
ឯកឧត្តម ស៊ុយ សែម រដ្ឋមន្ត្រីក្រសួងរ៉ និងថាមពល លើកឡើងនៅក្នុង ការបើកវេទិកាថាមពលអាស៊ីបូព៌ាលើកទី៥ ក្រោមមូលបទ“បញ្ហាប្រឈមអាស៊ាន ស្តីពីអព្យាក្រឹត្យភាពកាបូន និងសន្តិសុខថាមពល” នៅថ្ងៃទី១២ ខែកញ្ញា ឆ្នាំ២០២២ នេះថា គំនិតផ្តួចផ្តើមនៃការបង្កើតមូលបទ “បញ្ហាប្រឈមអាស៊ាន ស្តីពីអព្យាក្រឹតភាពកាបូន និងសន្តិ សុខថាមពល” សម្រាប់វេទិកានាពេលនេះ គឺសំដៅឆ្លុះបញ្ចាំងអំពីវិបត្តិថាមពលដែលពិភព លោកកំពុងជួបប្រទះ និងរកដំណោះស្រាយទាំងអស់គ្នា នៅពេលបច្ចុប្បន្ន។
ឯកឧត្តម បន្តថា បញ្ហាពាក់ព័ន្ធជាមួយវិស័យថាមពល មានការវិវត្តយ៉ាងឆាប់រហ័ស ចាប់តាំងពីមានសង្គ្រាម រវាងរុស្ស៊ី និងអ៊ុយក្រែន។ បញ្ហានេះ មុនពេលមានវិបត្តិសង្គ្រាមរវាងរុស្ស៊ី និងអ៊ុយក្រែន ពិភពលោកទាំងមូល គឺធ្វើយ៉ាងណាជំរុញការកាត់បន្ថយការប្រើប្រាស់ឥន្ធនៈហ្វូស៊ីល លើកកម្ពស់ការបើប្រាស់បច្ចេកវិទ្យាទំនើប និង បង្កើនប្រភពថាមពលកកើតឡើងវិញ និងថាមពលស្អាត ទៅក្នុងល្បាយផលិតថាមពលចម្រុះ ក៏ប៉ុន្តែដោយសារ ការកើនឡើងនៃវិបត្តិសង្គ្រាមនេះ ដំណើរការគម្រោងប្រយុទ្ធប្រឆាំងនឹងបំរែបម្រួលអាកាសធាតុសម្រាប់ពិភពលោក ត្រូវបានថមថយ ហើយជំនួសមកវិញបន្ទាន់ នូវការគិតគូរអំពីផែនការអភិវឌ្ឍន៍ថាមពលសារជាថ្មី និងដំណោះ ស្រាយបន្ទាន់លើគ្រប់លក្ខខណ្ឌ ដើម្បីដោះស្រាយវិបត្តិសន្តិសុខថាមពល ក្នុងអំឡុងពេលនៃការកើនឡើងតម្លៃប្រេង និងឧស្ម័នធម្មជាតិ។
ចំពោះបណ្តាប្រទេសមួយចំនួនធំ ជាពិសេសប្រទេសអភិឌ្ឍន៍ បានបង្ខំចិត្តងាកមករកការវិនិយោគ និងបន្តវិនិ យោគលើថាមពលដើរដោយធ្យូងថ្មវិញ ព្រមទាំងសម្រេចចិត្តពន្យារពេលគោលដៅអព្យាក្រឹតភាព កាបូនរបស់ខ្លួន ដើម្បីរក្សាឱ្យបាននូវសន្តិសុខថាមពល សម្រាប់ការអភិវឌ្ឍប្រទេសខ្លួនជាមុន។
ទោះក្នុងស្ថានភាពនេះក៏ដោយ ពិភពលោកចាំបាច់ណាស់ត្រូវធ្វើការអភិវឌ្ឍអន្តរកាលថាមពល ប្រកបទៅដោយ ភាពរលូន ទន្ទឹមគ្នានឹងការកាត់បន្ថយការប្រើប្រាស់ប្រព័ន្ធផលិតថាមពលដើរដោយឥន្ធនៈហ្វូស៊ីល ឱ្យបានជា អប្បបរមា ដូច្នេះប្រទេសទាំងអស់ត្រូវប្តេជ្ញាចិត្តចូលរួមបន្តសកម្មភាព នៃបញ្ហាអាកាសធាតុ ដែលត្រូវបាន កំណត់ជាចំណុចអាទិភាពសម្រាប់ប្រយុទ្ធប្រឆាំងនឹងបំរែបម្រួលអាកាសធាតុ តាមរយៈការពង្រឹង កិច្ចសហប្រតិបត្តិការ និងការផ្សារភ្ជាប់ទំនាក់ទំនងជាមួយគ្នា ដើម្បីស្វែងរកដំណោះស្រាយទៅតាមធនធាន ទំនួល ខុសត្រូវនិងសមត្ថភាពរបស់ប្រទេសនីមួយៗរៀងៗខ្លួន ក្នុងការឆ្លើយតបទៅនឹងបញ្ហាអាកាសធាតុផង និងការ អភិវឌ្ឍថាមពលរបស់ប្រទេសផង៕ អត្ថបទ៖ សុន រ៉ាឌី
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
