បាល់ទាត់៖ ក្លិបភ្នំពេញក្រោនបានវាយបកឈ្នះ ក្រុមការពារតំណែងជើងឯកបឹងកេតដោយលទ្ធផល ២-១ ក្នុងជំនួប The Cambodia Classic Match ជើងទី១ នៃលីគកំពូលកម្ពុជា នៅកីឡដ្ឋានខេមបូឌាអ៊ែរកាលពីល្ងាចថ្ងៃទី៦ ខែមេសា ដែលលទ្ធផលនេះបានធ្វើឲ្យក្រុមទាំងពីរ រក្សាកំណត់ត្រា ២ផ្ទុយគ្នា ពោលគឺភ្នំពេញក្រោនបន្ដឈ្នះក្រៅដី ៣ប្រកួតជាប់គ្នា ខណៈបឹងកេតបន្ដចាញ់ក្នុងដី ២ប្រកួតជាប់គ្នានាដើមរដូវកាលថ្មីនេះ។
ជំនួបដ៏ធំក្នុងសប្ដាហ៍ទី៥ នេះ បន្ទាប់ពីអាជ្ញាកណ្ដាលផ្លុំកញ្ចែចាប់ផ្ដើមការប្រកួតភ្លាម ក្រុមទាំងពីរបានបើកការវាយសម្រុកគ្នារៀងៗខ្លួន រហូតដល់នាទី១៨ ក្រោយការបោះបាល់មិនយល់ចិត្តគ្នារវាងខ្សែការពារ និងអ្នកចាំទីភ្នំពេញក្រោន បានបង្កឱកាសឲ្យកីឡាករ ម៉ាត់ នូរុណ ឆក់បានហើយស៊ុតបញ្ចប់ទីតែម្ដង ដែលជួយឲ្យក្រុមបឹងកេតបើកការនាំមុខ ១គ្រាប់មុននៅវគ្គទី១ បន្ទាប់ពីភ្នំពេញក្រោនព្យាយាមវាយបក និងមានឱកាសច្រើនលើកតែធ្វើមិនបានសម្រេច។ ចូលវគ្គទី២ បន្ទាប់ពីលេងបាន ២នាទី អ្នកចាំទីដៃទី១ បឹងកេត ហ៊ុល គីមហ៊ុយ ហាក់មានបញ្ហារបួសបន្សល់ពីការប៉ះទង្គិចគ្នានៅវគ្គទី១ ដែលបង្ខំចិត្តត្រូវប្ដូរចេញភ្លាមៗ ជំនួសវិញដោយអ្នកចាំទី ថា ច័ន្ទរិទ្ធី។ ប៉ុន្ដែក្រោយផ្លាស់ប្ដូរអ្នកចាំទីបាន ៣នាទី ភ្នំពេញក្រោនក៏មានឱកាសវាយបកតាមស្មើ ១-១ ដែលធ្វើសម្រេចដោយកីឡាករ Yudai Ogawa នៅនាទី៥២ ខណៈ ២នាទីបន្ទាប់ខ្សែប្រយុទ្ធអ៊ុយក្រែន Valerii Hryshyn បានបន្ថែម ១គ្រាប់ទៀតឲ្យអតីតក្រុមជើងឯក ៦សម័យនេះបើកការនាំមុខក្រុមម្ចាស់ផ្ទះវិញ។
សម្រាប់រយៈពេលនៅសល់ជាងពាក់កណ្ដាលផ្លូវនៃវគ្គទី២ ក្រុមទាំងពីរបានបង្កើនការវាយសម្រុកគ្នាកាន់តែខ្លាំង ពិសេសក្រុមម្ចាស់ផ្ទះដែលទាមទាររកគ្រាប់បាល់ត្រឡប់មកវិញ តែគ្រប់យ៉ាងបានត្រឹមសោកស្ដាយ សម្រាប់ក្រុមនាគខៀវបឹងកេត បន្ទាប់ពីអាជ្ញាកណ្ដាលផ្លុំកញ្ចែបញ្ចប់ការប្រកួត ដោយជ័យជម្នះបានលើក្រុមសិង្ហក្រហមភ្នំពេញក្រោន ក្នុងលទ្ធផល ២-១ ដែលជាការជម្រះបញ្ជីចាស់ ដ្បិតកាលពីជើងទី១ រដូវកាលមុន ភ្នំពេញក្រោនបានចាញ់បឹងកេត ៣-១ ឯណោះនៅកីឡដ្ឋានខេមបូឌាអ៊ែរវ៉េនេះ។ តាមរយៈជ័យជម្នះនេះ បានធ្វើឲ្យក្រុមភ្នំពេញក្រោនរក្សាកំណត់ត្រាដ៏ល្អ នាដើមរដូវកាលថ្មីជាមួយជ័យជម្នះ ៣ប្រកួតផ្ទួនៗដែលសុទ្ធតែជាការប្រកួតក្រៅដី ដោយ ២ប្រកួតដំបូងបានលត់ក្រុមម្ចាស់ផ្ទះសូលទីឡូអង្គរ ៧-១ និងឈ្នះក្រុមមាន់គកគិរីវង់សុខសែនជ័យ ២-១ ដើម្បីឈរកំពូលតារាងបណ្ដោះអាសន្នដោយមាន ៩ពិន្ទុក្នុងដៃ។ រីឯក្រុមបឹងកេតបានបន្ដកំណត់ត្រាមិនល្អសម្រាប់ ២ប្រកួតក្នុងដីដោយចាញ់ទាំង ២ប្រកួត បន្ទាប់ពីប្រកួតដំបូងចាញ់ក្រុមណាហ្គាវើលដ៏ ១-០ ដែលនាឲ្យពួកគេមិនទាន់មានពិន្ទុរាប់ឡើយ។
ក្រឡេកទៅមើលការប្រកួត ២គូផ្សេងទៀតក្នុងសប្ដាហ៍ទី៥ កាលពីម្សិលមិញ ក្រុមណាហ្គាវើលដ៏ និងក្រុមគិរីវង់សុខសែនជ័យបានស្គាល់ជ័យជម្នះលើកទី២ រៀងខ្លួន ក្នុងនោះក្រុមលោក មាស ចាន់ណា បានយកឈ្នះក្រុមម្ចាស់ផ្ទះអគ្គិសនីកម្ពុជា ដោយលទ្ធផល ៣-១ ខណៈក្រុមមាន់គកគិរីវង់បានយកឈ្នះក្រុមភ្ញៀវខេត្តព្រៃវែង ដោយលទ្ធផល ៣-០។ ជ័យជម្នះនេះបានធ្វើឲ្យក្រុមទាំងពីរមាន ៦ពិន្ទុស្មើគ្នា តែណាហ្គាវើលដ៏ទើបឆ្លងកាត់ ៣ប្រកួតប៉ុណ្ណោះដោយឈ្នះ២ និងចាញ់១ ខណៈគិរីវង់ឆ្លងកាត់ ៤ប្រកួតឈ្នះ២ និងចាញ់ ២ប្រកួត៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
