ភ្នំពេញ៖ ក្រុមហ៊ុន សោម៉ា គ្រុប គឺជាក្រុមហ៊ុនបង្កើតឡើងដោយកូនខ្មែរ ដែលមានវត្តមាន និងកិត្តិនាម ល្បីល្បាញច្រើនឆ្នាំមកហើយនៅក្នុងប្រទេសកម្ពុជា។ ក្រៅពីផ្ដោតសំខាន់លើអាជីវកម្ម ក្រុមហ៊ុន សោម៉ា គ្រុប តែងបានយកចិត្តទុកដាក់ជាប់ជាប្រចាំលើទំនូលខុសត្រូវសង្គម ក៏ដូចជារួមចំណែកសង្គ្រោះភពផែនដីតាមរយៈការថែរក្សាបរិស្ថាន។

ក្រុមហ៊ុន សោម៉ា និងក្រុមហ៊ុនបុត្រសម្ព័ន្ធ កាលពីថ្ងៃសុក្រ ទី ១៦ ខែកញ្ញា នេះ បាន​ប្រារព្ធ​កម្មវិធីជួបជុំ ដើម្បីអបអរសាទរទិវាបៃតង (Green Day) ២០២២ ដោយផ្ដោតលើប្រធានបទ ការ​ប្រើប្រាស់​អគ្គិសនី ទឹក សម្ភារការិយាល័យដោយសន្សំសំចៃ និងការកាត់បន្ថយការប្រើប្រាស់ប្លាស្ទិក ដោយមានការចូលរួមពីថ្នាក់ដឹកនាំ និងបុគ្គលិកក្រុមហ៊ុន សោម៉ា គ្រុប និងបុត្រសម្ព័ន្ធ​ក្រោមការដឹកនាំរបស់អ្នកស្រី ចម ក្រស្នា អគ្គនាយិកា និងជាប្រធានគណៈកម្មាធិការ Soma Initiative ព្រមទាំងមានការអញ្ជើញ​ចូលរួមជាអធិបតីពីសំណាក់ ឯកឧត្តម គិត ច័ន្ទគ្រឹស្នា មន្រ្តីជាន់​ខ្ពស់​ក្រសួងបរិស្ថាន ព្រមទាំងមានលោក ដែក វិមានរស្មី អនុប្រធាននាយកដ្ឋានសំណល់រឹង និងលោក លីម ប៊ុនហុក នាយកប្រតិបត្តិក្រុមហ៊ុន សោម៉ា ខូប៊ែលកូវ៉ធើសឹបផ្លាយ ដែលជាវាគ្មិនសម្រាប់វេទិកាកិច្ចពិភាក្សា។

ប្រធានបទនៃកិច្ចពិភាក្សាក្នុងទិវាបៃតង (Green Day) ឆ្នាំ ២០២២នេះ ផ្ដោតសំខាន់លើសកម្មភាព​ប្រចាំថ្ងៃ​របស់មនុស្សគ្រប់រូប​ ដែលជះឥទ្ធិពលអាក្រក់ទៅលើបរិស្ថាន និងដំណោះស្រាយទាក់ទង​នឹងការជះឥទ្ធិពលទាំងនោះ។ ក្រៅពីការរៀបចំកិច្ចពិភាក្សា ​និងធ្វើការជាក្រុម ទិវាបៃតងឆ្នាំ២០២២ ក៏បានសម្រេចដាក់ចេញនូវគោលនយោបាយស្ដីពីការប្រើប្រាស់អគ្គិសនី ទឹក សម្ភារការិយាល័យ​ដោយសន្សំសំចៃ និងការកាត់បន្ថយការប្រើប្រាស់ប្លាស្ទិកនិងបានដាក់ជូនអ្នក​ស្រី​អគ្គនាយិកាចុះហត្ថលេខាដាក់ឱ្យប្រើប្រាស់ជាផ្លូវការផងដែរ។

គោលនយោបាយដែលបានដាក់ឱ្យប្រើប្រាស់នេះមានគោលដៅសំខាន់២ចំណុចគឺក្រុមហ៊ុន សោម៉ា គ្រុប និងក្រុមហ៊ុនបុត្រសម្ព័ន្ធប្ដេជ្ញាកាត់បន្ថយការប្រើប្រាស់អគ្គិសនី ទឹក សម្ភារការិយាល័យ​ឱ្យបាន១០% រៀងរាល់ឆ្នាំ ​និងប្ដេជ្ញាមិនប្រើប្រាស់ផលិតផលប្លាស្ទិកដែលមិនអាចប្រើប្រាស់ និងកែច្នៃឡើងវិញបាននៅឆ្នាំ២០២៥៕