ភ្នំពេញ៖ ឯកឧត្តម អៀង មូលី ទេសរដ្ឋមន្ត្រី ប្រធានអាជ្ញាធរជាតិប្រយុទ្ធ នឹងជំងឺអេដស៍ បាន​បញ្ជាក់ថា រាជរដ្ឋាភិបាលកម្ពុជា បានប្ដេជ្ញាចិត្តដើម្បីសម្រេចបាននូវគោលដៅ ៩៥-៩៥-៩៥ និងធានាថា ការឆ្លងថ្មីនៃមេរោគអេដស៍​ មានចំនួនតិចជាង ៣០០ករណីក្នុងមួយឆ្នាំៗនៅឆ្នាំ២០២៥។

ការថ្លែងរបស់ឯកឧត្តម អៀង មូលី ទេសរដ្ឋមន្ត្រី យ៉ាងដូច្នេះ ក្នុងកិច្ចប្រជុំក្រុមការងារនិរន្តរភាព​ឆ្លើយ​តប នឹងមេរោគអេដស៍ និងជំងឺអេស៍ ​ដោយមានការអញ្ជើញចូលរួមពីលោកស្រី ​Patricia Ongpin នាយិកា ​អង្គការUNAIDS ប្រចាំប្រទេសកម្ពុជា ​និងជាសហប្រធាន នៃក្រុមការងារនិរន្តរភាពឆ្លើយ​តប​នឹងមេរោគអេដស៍ និងជំងឺអេដស៍ ដែលបានបន្តគាំទ្រដល់ការឆ្លើយតបនឹងមេរោគអេដស៍ និង​ជំងឺអេដស៍ ជាពិសេស ​វិស័យនិរន្តរភាព​ និងអន្តរកាល លោកជំទាវ កែវ ចរិយា រដ្ឋលេខាធិការ​ក្រសួង​សេដ្ឋកិច្ច ​និងហិរញ្ញវត្ថុ ​ឯកឧត្តមវេជ្ជបណ្ឌិត ឡូ វាសនាគីរី រដ្ឋលេខាធិការក្រសួង​សុខាភិបាល​ និងឯកឧត្តម ​លោកជំទាវ លោក លោកស្រី តំណាងក្រសួង ស្ថាប័ន និងដៃគូជាតិ អន្តរជាតិ​ពាក់ព័ន្ធ ប្រមាណ៣០រូប, នាព្រឹកថ្ងៃទី១៩ ខែកញ្ញា ឆ្នាំ២០២២ នៅបន្ទប់ប្រជុំអាជ្ញាធរ​ជាតិ​ប្រយុទ្ធនឹង​ជំងឺអេដស៍។

ឯកឧត្តម អៀង មូលី ទេសរដ្ឋមន្ត្រី បានបន្តទៀតថា ការឆ្លើយតបរបស់ប្រទេសកម្ពុជា ចំពោះការ​រាលដាល​នៃមេរោគអេដស៍ត្រូវបានចាត់ទុកថា ​ជារឿងជោគជ័យមួយនៅក្នុងតំបន់ និងក្នុង​ពិភពលោក។ នៅប្រទេសកម្ពុជា៨៤% នៃអ្នកផ្ទុកមេរោគអេដស៍ទាំងអស់បានដឹងពី​ស្ថានភាព​របស់ខ្លួន។ ក្នុងចំណោមដែលដឹងថាខ្លួនមានផ្ទុកមេរោគអេដស៍៩៩ % ​បានធ្វើរោគ​វិនិច្ឆ័យ និង​ទទួលការព្យាបាល និង៩៧% ភាគ រយនៃអ្នកផ្ទុកមេរោគអេដស៍ដែលបានទទួលការព្យាបាល​មាន​អត្រាមេរោគដែលត្រូវបានបង្ក្រាប។ ​សំណួរថ្ងៃនេះ គឺធ្វើដូចម្ដេចដើម្បីគាំទ្រការឆ្លើយតបរបស់​ប្រទេសដើម្បីធានាផ្លូវដើម្បីសម្រេចបាន​នូវគោលដៅ៩៥-៩៥-៩៥ ​នៅឆ្នាំ២០២៥ ប្រកប​ដោយនិរន្តរភាព។

នៅក្នុងសុន្ទរកថានេះ​ បានសង្កត់ធ្ងន់លើចំណុចបួនដូចខាងក្រោម៖១)គម្លាត, ២)និរន្តរភាព/អន្តរកាល, ៣)វិធានការធានានិរន្តរភាព, ៤)ក្រុមការងារនិរន្តរភាពស្តីពី​ការឆ្លើយតប​នឹងមេរោគអេដស៍ និងជំងឺ អេដស៍។

ឆ្លើយតបនឹងគម្លាតខាងលើ ឯកឧត្តម អៀង មូលី បានសង្កត់ធ្ងន់ថា ក្នុងគោលដៅឆ្ពោះទៅ​សម្រេចគោល​ដៅដែលបានកំណត់នៅឆ្នាំ២០២៥ ​ក្រុមការងារនិរន្តរភាពឆ្លើយតប នឹងមេរោគ​អេដស៍ និងជំងឺអេដស៍ ​ដែលដឹកនាំដោយអាជ្ញាធរជាតិប្រយុទ្ធនឹងជំងឺអេដស៍​ និងUNAIDS បាន​ទទួល​ស្គាល់​ពីតម្រូវការកើនឡើង ​ដើម្បីការពារលទ្ធផលដែលបានមកពី​កម្មវិធីមេរោគ​អេដស៍របស់​កម្ពុជា និងបានផ្ដួចផ្ដើមការវាយតម្លៃត្រៀមខ្លួនជា ស្រេចក្នុងអន្តរកាលនិងការបង្កើតផែនទី​បង្ហាញ​ផ្លូវនៃការឆ្លើយតបនឹងមេរោគអេដស៍​ និងជំងឺអេដស៍ ​ប្រកបដោយនិរន្តរភាពក្នុងឆ្នាំ២០១៨ ដោយ​បានរកឃើញនូវហានិភ័យចំនួន១៣ចំណុច ​និងបានលើកអនុសាសន៍២៣ ​ដើម្បីកាត់បន្ថយ​ហានិភ័យ​ទាំងនោះ។

ផែនទីបង្ហាញផ្លូវនិរន្តរភាពត្រូវបានពិនិត្យឡើងវិញក្នុងឆ្នាំ២០២២ ​ជាមួយអ្នកពាក់ព័ន្ធសំខាន់ៗ ដើម្បី​ពិនិត្យមើលថា​ហានិភ័យដែលបានរក ​ឃើញនៅពេលមុននោះ នៅតែបន្តជាហានិភ័យក្នុង​ពេល​បច្ចុប្បន្ន និងអនាគត​ និងកំណត់សកម្មភាព ​អាទិភាពដើម្បីកាត់បន្ថយហានិភ័យទាំងនោះ៕

អត្ថបទ រដ្ឋា