សៀមរាប៖ ក្រុមហ៊ុន ឌីអឹមជីម៉ូរី (DMG MORI) របស់ជប៉ុន បានចុះអនុស្សរណៈយោគយល់គ្នា​ជាមួយ​ក្រសួង អប់រំ យុវជន និងកីឡា ដើម្បីបង្ហាញអំពីកិច្ចសហប្រតិបត្តិការ ​រវាងប្រទេសទាំងពីរ កម្ពុជា ​និងជប៉ុន ក្នុងវិស័យផលិតកម្មឌីជីថល ក្នុងឧស្សាហកម្ម ៤.០ ខណៈដែលវិស័យនេះ (4IR) នឹងជួយលើកស្ទួយសេដ្ឋ-កិច្ចកម្ពុជានាពេលអនាគតដ៏ខ្លីខាងមុខនេះ។ ពិធីនេះ ធ្វើឡើងនៅ​ខេត្ដសៀមរាប នារសៀលថ្ងៃទី១៨ ខែ កញ្ញាឆ្នាំ២០២២នេះ។

ឯកឧត្ដម អ៊ុំ រម្យនី រដ្ឋលេខាធិការក្រសួងអប់រំ យុវជន និងកីឡា បានមានប្រសាសន៍ថា ប្រទេស កម្ពុជា ​ជាប្រទេសកំពុងអភិវឌ្ឍមួយ នៅឆ្ងាយបន្តិចពី IR 4.0 ​ជាពិសេសបច្ចេកវិទ្យាឧស្សាហកម្ម បច្ចេកវិទ្យាកំរិតខ្ពស់សម្រាប់ផលិតកម្ម។ ដើម្បីអភិវឌ្ឍបន្ថែមទៀតលើវិស័យនេះ រាជរដ្ឋាភិបាល​កម្ពុជា បានបង្កើតចេញជាគោលនយោបាយ យុទ្ធសាស្ត្រ និងកំណែទម្រង់ឧស្សាហកម្ម ឧទាហរណ៍ គោលនយោបាយអភិវឌ្ឍន៍ឧស្សាហកម្មកម្ពុជា ដើម្បីសម្រេចឱ្យបាននូវចក្ខុវិស័យនៃប្រទេស ដែលមាន​ចំណូលមធ្យម កម្រិតខ្ពស់នៅឆ្នាំ២០៣០។

ឯកឧត្ដម បានឱ្យដឹងថា សម្ភារដ៏ទំនើបនេះ នឹងបំពាក់នៅក្នុងសកលវិទ្យាល័យភូមិន្ទភ្នំពេញ ដើម្បី យុទ្ធសាស្ត្រអប់រំ នៃវិទ្យាសាស្ត្រ បច្ចេកវិទ្យា វិស្វកម្ម ​និងគណិតវិទ្យា (ស្ទែម) និងការលើកកម្ពស់​ការស្រាវ ជ្រាវ ការអភិវឌ្ឍន៍ ​និងនវានុវត្តន៍ ក្នុង IR 4.0 ដើម្បីសម្រេចនូវចក្ខុវិស័យរបស់ប្រទេស​ផងដែរ។ សាកលវិទ្យាល័យ នឹងផ្តល់ឱកាសដល់និស្សិតកម្ពុជាទាំងអស់ ​ដែលស្ថិតក្នុងក្រុមចង្កោម រួមមានសាកលវិទ្យាល័យ ​ភូមិន្ទភ្នំពេញ​ វិទ្យាស្ថានបច្ចេកវិទ្យាកម្ពុជា និងវិទ្យាស្ថានជាតិពហុបច្ចេក​ទេសកម្ពុជា ដោយរំពឹងថា និស្សិតបញ្ចប់ការសិក្សា ​នឹងធ្វើការនៅក្រុមហ៊ុនបច្ចេកវិទ្យា ដែល​សហការ​ជាមួយសាកលវិទ្យាល័យបច្ចុប្បន្ននេះ និងនៅពេលអនាគត ពួកគេ ក៏នឹងដើរតួយ៉ាង​សំខាន់​ក្នុងការគាំទ្រដល់ឧស្សាហ-កម្មដទៃទៀត នៅក្នុងប្រទេស ដើម្បីផ្លាស់ប្តូរឆ្ពោះទៅរកការផលិត​ស្វ័យប្រវត្តិ ​និងឆ្លាតវៃថ្មី ​ដែលនឹងធ្វើឱ្យប្រសើរឡើងនូវ​ វិស័យកម្មន្តសាលរបស់ប្រទេស។

សាកលវិទ្យាល័យភូមិន្ទភ្នំពេញ ​មានកិច្ចសហប្រតិបត្តិការពីក្រុមហ៊ុន ​DMG MORI ដែលជា​ក្រុមហ៊ុនបណ្តាក់ទុនរួមគ្នាជប៉ុន-អាល្លឺម៉ង់​ ហើយជាក្រុមហ៊ុនផលិតគ្រឿងម៉ាស៊ីន CNC បច្ចេកវិទ្យា​កំរិត​ខ្ពស់លំដាប់លេខមួយ លើពិភពលោក ​។គេបានចាប់ផ្តើមគម្រោងមួយ ដើម្បីបង្ហាញ​ពីIR4.0ក្នុងវិស័យផលិតកម្ម ​ដែលបានធ្វើឡើងនៅមហាវិទ្យាល័យវិស្វកម្ម នៃសាកលវិទ្យាល័យ​ភូមិន្ទ​ភ្នំពេញ។

បច្ចុប្បន្ននេះម៉ាស៊ីន CNC កម្រិតខ្ពស់ចំនួនបី--LEASERTEC 300 DED hybrid, DMC 85 monoBLOCK និង NLX2500SY ​កំពុងដំណើរការនាំចូលមកកាន់មជ្ឈមណ្ឌល​ CJDM ។ម៉ាស៊ីន CNC បច្ចេកវិទ្យា​កំរិត​ខ្ពស់ទាំង​បី​ដែលមានតែមួយគត់នៅក្នុងប្រទេសកម្ពុជា ​ក្នុងចំណោមបណ្តាប្រទេសអាស៊ាន ដែល​កំពុងធ្វើការយ៉ាង​ជិតស្និទ្ធ​ជាមួយ DMG MORI ​ដែលជាស្ថាបនិកនៃគម្រោងនេះ ដើម្បីរៀបចំ​កម្មវិធីសិក្សាសម្រាប់​មជ្ឈមណ្ឌល​CJDM។

CJDM នឹងបើកជាផ្លូវការក្នុងពេលឆាប់ខាងមុខនេះ ហើយមជ្ឈមណ្ឌលនឹងដើរតួនាទីយ៉ាងសំខាន់​ក្នុងការ​ផលិតធនធានមនុស្ស ​​ការស្រាវជ្រាវ ​ការអភិវឌ្ឍ ​ការច្នៃប្រឌិត និងសេវាកម្មនៅ​ក្នុង​វិស័យផផលិតកម្មឌីជីថលនៅកម្ពុជា៕ អត្ថបទ៖ ឈិត សាវី