ភ្នំពេញ៖ វិទ្យាស្ថាន​បច្ចេកវិទ្យា​ក​ម្ពុ​ជា ឬ​ហៅ​កាត់​ថា សាលា​តិច​ណូ បានដាក់​ឱ្យ​ដំណើរការ​គម្រោង SATREPS-២ (​សា​ទ្រី​ព - ធូ) ស្ដីពី​ការបង្កើត​វេទិកា​គ្រប់គ្រង​ហានិភ័យ​ការបំពុល​ខ្យល់​នៅ​កម្ពុជា ក្រោម​កិច្ចសហប្រតិបត្តិការ និង​គាំទ្រ​ថវិកា​ពី​រដ្ឋាភិបាល​ជប៉ុន​ប្រមាណ ៤,៥ លាន​ដុល្លារ​អាមេរិក​។

​ពិធី​សម្ពោធ​បើក​គម្រោង SATREPS-២ ស្ដីពី​ការបង្កើត​វេទិកា​គ្រប់គ្រង​ហានិភ័យ​ការបំពុល​ខ្យល់​នៅ​កម្ពុជា បាន​ប្រព្រឹត្ត​ទៅនា​ថ្ងៃ​ចន្ទ ទី​១៩ ខែកញ្ញា ឆ្នាំ​២០២២ នៅ​វិទ្យាស្ថាន​បច្ចេកវិទ្យា​កម្ពុជា (​សាលា​តិច​ណូ​) ក្រោម​អធិបតីភាព ឯកឧត្តម​បណ្ឌិត អ៊ុម រម្យ​ណី រដ្ឋលេខាធិការ​ក្រសួង​អប់រំ​យុវជន​និង​កីឡា ឯកឧត្តម​បណ្ឌិត ប៉ូ គីម​ថូ នាយក វិទ្យាស្ថាន​បច្ចេកវិទ្យា​ក​ម្ពុ​ជា និងដៃគូរ​ពាក់ព័ន្ធ​ទាំងអស់​រួមមាន​៖ ក្រសួងបរិស្ថាន សាកលវិទ្យាល័យ​វិទ្យាសាស្ត្រ​សុខាភិបាល​, សាកលវិទ្យាល័យ​ជាតិ​គ្រប់គ្រង​, សាកលវិទ្យាល័យ Kanazawa សាកលវិទ្យាល័យ Nakasaki សាកលវិទ្យាល័យ Osaka Ohtani សាកលវិទ្យាល័យ Osaka Metropolitan និង ក្រុមហ៊ុន Partical Plus Co., Ltd.​។​

​តាមរយៈ​កិច្ច​ប្រជុំបាន​បង្ហាញថា ដោយ​យោងតាម​ការណ៍​អង្គការ​សុខភាព​ពិភពលោក ការបំពុល​ខ្យល់​បានធ្វើអោយ​កើនឡើង​នូវ​ជំងឺ​ស្ទះ​ស​សៃ​ឈាម និង​ជំងឺ​ប្រព័ន្ធ​ដង្ហើម និង​បានសំលាប់​មនុស្ស​ប្រមាណ​៧​លាន​នាក់​ជា​រៀងរាល់ឆ្នាំ ហើយ​មនុស្ស ៩៩% នៃ​ប្រជាជន​នៅលើ​ភពផែនដី​យើង ដកដង្ហើម​ដែលមាន​កម្រិតជាតិពុល​ក្នុង​ខ្យល់​លើស​កម្រិត​ស្តង់ដារ​ដែល​បានកំណត់​។

​ទោះបីជា​មិនមាន​របាយ​ការ​ណ៍​ជាក់លាក់​ណាមួយ បញ្ជាក់​ពី​អត្រា​ការស្លាប់​ដោយសារ​ការបំពុល​ខ្យល់​នៅ​កម្ពុជា​ក៏ដោយ តែ​ការសិក្សា​គឺ​ចាំបាច់​ដើម្បី​ស្វែងយល់​ពី កម្រិតជាតិពុល​ដែលមាន​ក្នុង​បរិយាកាសប្រភព​ នៃ​ការបំពុល​ហានិភ័យ​ដែល​អាច​កើតមាន និង​វិធានការ​នានា​ដើម្បី​ទប់ស្កាត់​និង​កាត់បន្ថយ​។​

​ដើម្បី​ចូលរួម​សិក្សា​ជាមួយ​រាជរដ្ឋាភិបាល វិទ្យាស្ថាន​បច្ចេកវិទ្យា​ក​ម្ពុ​ជា (​ឬ​សាលា​តិច​ណូ​) បាន​សហ​ការណ៍​ជាមួយ​ដៃគូ​ក្នុងស្រុក និង​សាលា​ដៃគូ​នៅ​ប្រទេស​ជប៉ុន​មួយចំនួន បង្កើត​គម្រោង​ស្រាវជ្រាវ​មួយ​ក្រោម​កម្មវិធី SATREPS (Science and Technology Research Partnership for Sustainable Development) ដែលមាន​ចំណងជើង​ថា «​ការបង្កើត​វេទិកា​គ្រប់គ្រង​ហានិភ័យ​ការបំពុល​ខ្យល់​នៅ​កម្ពុជា​»​។​

​ឯកឧត្ដម​បណ្ឌិត ប៉ូ គឹម​ថូ នាយក​វិទ្យាស្ថាន​បច្ចេកវិទ្យា​កម្ពុជា បាន​មានប្រសាសន៍ថា គម្រោង​នេះ មានការ​គាំទ្រ​មូលនិធិ​ដោយ JICA / JST ដែល​មាន​រយៈពេល ៥​ឆ្នាំ ចាប់ពី​ថ្ងៃទី១ ខែកក្កដា ឆ្នាំ ២០២២ ដល់​ថ្ងៃទី៣១ ខែមិថុនា ឆ្នាំ ២០២៧ ជាមួយនឹង​ទឹកប្រាក់​ចំនួន​៤,៥ លាន​ដុល្លារ​។​

​ឯកឧត្តម​បណ្ឌិត អ៊ុម រម្យ​ណី រដ្ឋលេខាធិការ​ក្រសួង​អប់រំ​យុវជន និង​កីឡា បាន​មានប្រសាសន៍ថា គម្រោង​នេះ​ពិត​ជាមាន​តួនាទី​សំខាន់​ក្នុង​ការចូលរួម​គ្រប់គ្រង​គុណភាព​ខ្យល់​នៅ​កម្ពុជា​។

ឯកឧត្តម​ ក៏បាន​សម្តែង​សុទិដ្ឋិនិយម​និង​សង្ឃឹមថា​ លទ្ធផល​នៃ​គម្រោង​នេះ​ពិត​ជា​អាចជួយ​ឱ្យ​អ្នកស្រាវជ្រាវ​និង​ប្រជាជន​ខ្មែរ​បាន​យល់​កាន់តែច្បាស់​ពី​ការបំពុល​ខ្យល់​និង​វិធាន​ការចូលរួម​កាត់បន្ថយ​ជាតិពុល​នេះ​ និង​ធ្វើ​ឱ្យ​កាន់​ប្រសើរ​ឡើង​គុណភាព​ខ្យល់​ក្នុង​បរិស្ថាន​ដែល​យើង​ស្រូបយក​ជា​រៀងរាល់ថ្ងៃ​។

​តំណាង​មកពី​ក្រសួងបរិស្ថាន សាកលវិទ្យាល័យ​វិទ្យាសាស្ត្រ​សុខាភិបាល សាកលវិទ្យាល័យ​ជាតិ​គ្រប់គ្រង ក៏បាន​បញ្ជាក់​ពី​ជំហរ​គាំទ្រ​ចំពោះ​គម្រោង​ដ៏​មាន​សារៈសំខាន់​នេះ ដែលជា​ប្រយោជន៍​ដ៏​ធំ​សម្រាប់​ប្រជាជន​ខ្មែរ​និង​មនុស្សជាតិ​ទាំងមូល​។​

​លោក យ៉ាណា​ហ្គា​វ៉ា ស៊ីន​ជី (YANAGAWA Shinji) តំណាង​ចៃ​កា​នៅ​កម្ពុជា​, លោក​សាស្ត្រាចារ្យ YAMAGUCHI Yasushi តំណាង Japan Science and Technology Agency និង​លោក​បណ្ឌិត WADA Takashi នាយក​សាកលវិទ្យាល័យ Kanazawa ក៏បាន​បង្ហាញ​ពី​កង្វល់​ពី​ការបំពុល​ខ្យល់​នា​យុគ្គសម័យ​យើង​នេះ និង​ជូនពរ​ឱ្យ​គម្រោង​នេះ​ទទួល​បាន​លទ្ធផល​ដូច​ការរំពឹងទុក​៕ អត្ថបទ​៖ ចេ​ន សុជាតា​