ពិភពលោក៖ មូលនិធិរូបិយវត្ថុអន្តរជាតិ (IMF) បាននិយាយកាលពីថ្ងៃអង្គារថា ការចំណាយលើសុខភាពសាធារណៈមិនធ្លាប់មានពីមុនមក ក្នុងការប្រយុទ្ធប្រឆាំងនឹងការរីករាលដាលឆ្លងជំងឺ COVID-19 ដែលភាគច្រើនធ្វើឡើងដោយសហរដ្ឋអាមេរិក នឹងជំរុញឲ្យកំណើនសេដ្ឋកិច្ចសកលកើនឡើងដល់ ៦% ក្នុងឆ្នាំនេះ ដែលជាអត្រាមិនធ្លាប់មើលឃើញចាប់តាំងពីទសវត្សរ៍ឆ្នាំ១៩៧០ រហូតមក។
IMF បង្កើនការព្យាករណ៍កំណើនសេដ្ឋកិច្ចសម្រាប់ឆ្នាំ២០២១ ពីចំនួន ៥,៥% កាលពីរយៈពេលតិចជាង ៣ខែមុន ជាការឆ្លុះបញ្ចាំងពីទស្សនវិស័យច្បាស់ឆាប់រហ័ស សម្រាប់សេដ្ឋកិច្ចសហរដ្ឋអាមេរិក ពោលគឺ IMF បច្ចុប្បន្នមើលឃើញពីកំណើនសេដ្ឋកិច្ច ៦,៤% សម្រាប់អាមេរិកនៅក្នុងឆ្នាំ២០២១ ដែលជាអត្រាកើនឡើងលឿនបំផុត ចាប់តាំងពីដើមទសវត្សរ៍ឆ្នាំ១៩៨០ រហូតមក។ ការព្យាករណ៍ពីកំណើនសេដ្ឋកិច្ចសហរដ្ឋអាមេរិកបានកើនឡើង ១,៣% ពីការព្យាករណ៍លើកមុន ៥,១% របស់ IMF កាលពីចុងខែមករា និងធ្វើឲ្យអត្រាកើនឡើងជិតទ្វេដង ដែលពួកគេធ្លាប់បានព្យាករណ៍កាលពីខែតុលា ឆ្នាំ២០២០ កន្លងទៅ។ លោកស្រី ហ្គីតា ហ្គូភីណាត ប្រធានផ្នែកសេដ្ឋកិច្ចរបស់ IMF បាននិយាយថា កំណើនសេដ្ឋកិច្ចបែបនេះដោយសារការទ្រទ្រង់សារពើពន្ធកើនឡើង ដែលរួមទាំងកញ្ចប់ថវិកាជំនួយរបស់អាមេរិក ១.៩សែនកោដិដុល្លារ ការពន្លឿនយុទ្ធនាការចាក់វ៉ាក់សាំងបង្ការជំងឺ COVID-19 និងការសម្របខ្លួនតាមសកម្មភាពសេដ្ឋកិច្ច ដើម្បីយកឈ្នះការរឹតត្បិតទប់ស្កាត់ការរីករាលដាលឆ្លងជំងឺ COVID-19។
លោកស្រី ហ្គូភីណាត បាននិយាយប្រាប់សន្និសីទសារព័ត៌មានថា ថ្វីត្បិតតែមានភាពមិនច្បាស់លាស់ខ្លាំងលើការរីករាលដាលឆ្លងជំងឺ COVID-19 ក៏ដោយ ច្រកចេញពីវិបត្តិសេដ្ឋកិច្ចសុខភាពអាចមើលឃើញកាន់តែច្បាស់ជាងមុន។ ទោះបីជាយ៉ាងណាក៏ដោយ លោកស្រីបានព្រមានថា ការីករាលដាលឆ្លងជំងឺ COVID-19 នៅមិនទាន់យកឈ្នះនោះទេ ហើយករណីឆ្លងជំងឺដ៏កាចសាហាវមួយនេះ នៅតែបន្តកើនឡើងនៅតាមប្រទេសជាច្រើន៕
អត្ថបទ៖ សារ៉ាត់
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
