សហរដ្ឋអាមេរិក៖ ថ្លែង​នៅ​មហាសន្និបាត​អង្គការ​សហ​ប្រជាជាតិ​កាលពី​ថ្ងៃ​ពុធ លោក​ប្រធានាធិបតី​អាមេរិក Joe Biden បាន​ចោទប្រកាន់​រុស្ស៊ី​ពី​គំនិត​ចក្រពត្តិនិយម និង​ព្យាយាម​លុបបំបាត់​ប្រទេស​អ៊ុយ​ក្រែ​ន​ក្នុងនាម​ជា​រដ្ឋ ខណៈ​ដែល​ទទូច​ថា សហរដ្ឋអាមេរិក​មិនបាន​ព្យាយាម​ដុត​បញ្ឆេះ​ជម្លោះ​នោះ​ទេ មានតែ​កិច្ច​សហប្រតិបត្តិការ​ប៉ុណ្ណោះ​។

លោក Biden ក៏បាន​គាំទ្រ​ការពង្រីក​ក្រុមប្រឹក្សាសន្តិសុខ​អង្គការសហប្រជាជាតិ និង​កំណត់​អំណាច​វ៉េតូ​សម្រាប់​សមាជិក​អចិន្ត្រៃយ៍​របស់​ខ្លួន​ផង​ដែរ​។ សមាជិក​អចិន្ត្រៃយ៍​ដែល​មាន​អំណាច​វ៉េតូ​ទាំង ​៥​ប្រទេស​រួមមាន​ចិន បារាំង សហព័ន្ធ​រុស្ស៊ី ចក្រភព​អង់គ្លេស​ និង​អៀរ​ឡង់​ខាងជើង និង​សហរដ្ឋ​អាមេរិក​។ ​លោក Biden បាន​និយាយ​ថា រុស្ស៊ី​បាន​បំពាន​ដោយ​គ្មាន​ការ​ខ្មាសអៀន​លើ​គោលការណ៍​ស្នូល​នៃ​ធម្មនុញ្ញ​អង្គការសហប្រជាជាតិ គ្មាន​អ្វី​សំខាន់​ជាង​ការ​ហាម​ប្រាម​ដាច់ខាត​លើ​ប្រទេស​ទាំង​ឡាយ​ណា​ ដែល​ដណ្ដើម​យក​ទឹកដី​នៃ​ប្រទេសជិតខាង​របស់​ពួកគេ​ដោយ​ប្រើ​កម្លាំង ដោយ​ចោទ​ប្រកាន់​ទីក្រុង Moscow ពី​ការប៉ុនប៉ង​លុបបំបាត់​រដ្ឋ​អធិបតេយ្យ​មួយ​ចេញពី​ផែនទី​។

​លោក​ក៏បាន​ទទូច​ផង​ដែរ​ថា គ្មាន​នរណា​គំរាមកំហែង​រុស្ស៊ី​ទេ ហើយ​ថា លោក​ប្រធានាធិបតី Vladimir Putin បាន​គំរាមកំហែង​ដោយ​នុយក្លេអ៊ែរ​ប្រឆាំង​អឺរ៉ុប​ទៅវិញ​ទេ ហើយ​បាន​បង្ហាញ​ពី​ភាព​ព្រងើយ​កន្តើយ​ដោយ​គ្មាន​ការពិចារណា សម្រាប់​ការ​ទទួល​ខុស​ត្រូវ​នៃ​របប​មិន​រីកសាយ​អាវុធ​នុយក្លេអ៊ែរ នៅ​ក្នុង​សុន្ទរកថា​ទៅកាន់​ប្រជាជាតិ​ផ្សាយ​តាម​ទូរទស្សន៍​កាលពី​មុន​នេះ​៕

អត្ថបទ៖ សុខមាន