ភ្នំពេញ៖ ក្រសួងសុខាភិបាលបានប្រកាសនៅព្រឹកថ្ងៃនេះថា បុសខ្មែរ ២នាក់ទៀត បានស្លាប់ដោយសារជំងឺកូវីដ១៩នៅព្រឹកថ្ងៃម្សិលមិញ និងនៅយប់ឈានចូលព្រឹកថ្ងៃនេះ ដែលនាំឱ្យចំនួនអ្នកស្លាប់ដោយសារកូវីដ១៩នៅកម្ពុជា កើនដល់ ២៤នាក់។
ក្នុងសេចក្ដីប្រកាសព័ត៌មានរបស់ខ្លួន ក្រសួងសុខាភិបាលនិយាយថា បុរសខ្មែរម្នាក់អាយុ ៤៩ឆ្នាំ ដែលរស់នៅក្នុងភូមិទ្រា៣ ស្ថិតក្នុងខណ្ឌមានជ័យ បានស្លាប់កាលពីវេលាជិតថ្ងៃត្រង់ថ្ងៃទី៧ ខែមេសានៅឯមន្ទីរពេទ្យហ្លួងម៉ែ។
ចំណែកបុរសខ្មែរម្នាក់ទៀតអាយុ ៦៨ឆ្នាំ ដែលរស់នៅភូមិទ្រា៤ ក្នុងខណ្ឌមានជ័យផងដែរនោះ ក្រសួងសុខាភិបាលបញ្ជាក់ថា បានស្លាប់នៅវេលារំលងអាធ្រាត្រឈានចូលថ្ងៃទី៨ ខែមេសានេះនៅឯមន្ទីរពេទ្យហ្លួងម៉ែផងដែរ។
ក្រសួងសុខាភិបាល បញ្ជាក់ថា បុរសអាយុ៦៨ឆ្នាំរូបនេះ ត្រូវបានរកឃើញឆ្លងមេរោគកូវីដ១៩នៅថ្ងៃម្សិលមិញនេះ ហើយត្រូវបានបញ្ជូនទៅព្យាបាលនៅមន្ទីរពេទ្យហ្លួងម៉ែនៅម៉ោង ១:៣០នាទីរំលងអធ្រាត្រ ប៉ុន្តែ បានស្លាប់នៅ ១០នាទីក្រោយមក។
ក្រសួងបញ្ជាក់ទៀតថា បុរសរូបនេះបាត់បង់ស្មារតីទៅហើយអំឡុងពេលបញ្ជូនទៅមន្ទីរពេទ្យដើម្បីជួយសង្គ្រោះបន្ទាន់នោះ។
គិតត្រឹមថ្ងៃនេះ ក្រសួងសុខាភិបាលប្រកាសថា មនុស្ស ២៤នាក់ហើយបានស្លាប់ដោយសារជំងឺកូវីដ១៩នៅក្នុងរយៈពេលមិនដល់១ខែផង ក្រោយពីករណីស្លាប់លើកដំបូងកើតឡើងកាលពីថ្ងៃទី១១ ខែមីនាកន្លងមកនេះ៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
