កំពង់ចាម៖ កម្ពស់ទឹកទន្លេមេគង្គកំពង់ចាម-ត្បូងឃ្មុំ នៅព្រឹកនេះ បានបន្តហក់ឡើង ខណៈប្រទេសកម្ពុជា ទទួលរង​ឥទ្ធិពល​ព្យុះទី១៦ ណូរុ ។

បើយោងតាមសេចក្តីប្រកាសរបស់ក្រសួងធនធានទឹក និងឧ​តុនិយម នៅថ្ងៃទី២៩ ខែកញ្ញា ឆ្នាំ​២០២២នេះ មានឥទ្ធិពលព្យុះទី១៦ ណូរុ បានមកលើអាងទន្លេមេគង្គ ប្រទេសឡាវ ថៃ វៀតណាម និងកម្ពុជា។ ដោយឡែកក្នុងខេត្តកំពង់ចាម ស្ថានភាពទឹកទន្លេមេគង្គខេត្តកំពង់ចាម ​នៅថ្ងៃទី២៩​ខែកញ្ញា ឆ្នាំ២០២២នេះ បានបន្តហក់ឡើងថែមទៀតដល់​កម្ពស់ ១២.៤៣ម៉ែត្រ​ ធៀបទៅ​នឹងថ្ងៃ​ម្សិលមិញ​ទឹកឡើង​កម្ពស់០.០៥ម៉ែត្រ ​ និង​មានភ្លៀងធ្លាក់ស្ទើគ្រប់តំបន់ ។ នេះបើយោង​តាម​របាយកាណ៍ពីលោក អ៊ុម វិបុល ប្រធានមន្ទីរធនធានទឹក និងឧតុនិយម ខេត្តកំពង់ចាម។

ទន្ទឹមនេះដែររដ្ឋបាលខេត្តកំពង់ចាម ​ក៏បានអំពាវនាវដល់អាជ្ញាធរមូលដ្ឋាន និងមន្ត្រីពាក់ព័ន្ធចូលរួម​សហការគ្នាក្នុងការត្រៀមបង្ការទប់ស្កាត់ ​និងឆ្លើយតបការជួយសង្គ្រោះបងប្អូនប្រជាពលរដ្ឋ​ទៅ​រក​ទីទួលសុវត្ថិភាពនៅពេល ​មានគ្រោះមហន្តរាយកើតឡើងដោយសារទឹកជំនន់ និងអាចកើត​ជាយថាហេតុ​ក្នុង​ភូមិសាស្ត្រខេត្តកំពង់ចាម៕